1 *Kol 3.20Nahönbörat eŋgöreŋ ahakmeme diŋdiŋi mi kewö: Iŋini mönö Kembubuk qekötahöba iwinamyahötŋini yetkö jitŋiri tem köla wuataŋgöba malme. 2 *Eks 20.12; Dut 5.16; Kol 3.21Anutunöŋ jöjöpaŋ keu 1-2-3 mieŋgö teteköŋe töwa likepŋi neŋgimamgö qahö jii ahözapmö, jöjöpaŋ keu jaŋgö 4 mi törömunŋambuk. Mutuk kewö jiza, “Iwinamyahötki mönö göda qem etkiba malman.” Keu mi tem kölinga Anutunöŋ töwa likepŋi neŋgimamgö keuŋi kewö jöhöi ohoget ahöza, 3 “Göda qem etkinöŋga Anutunöŋ töhötmöriam gihiiga toroqeba gölmenöŋ nalö köröpŋi malman.”

4 Nahönböraturupŋinan irimsesewöl akepuköra iwi eŋön mönö urukanjam kude ak eŋgiba malme. Mewö qahöpmö, Kembugö Köna keu tem kölmegöra kusum eŋgiba miaŋgö dop mindiŋgöm eŋgigetka qarime. Mewö.

5 *Kol 3.22-25Welenqeqe iŋini mönö gölme qakŋe galömurupŋini yeŋgö keuŋini Kraistkö keu ewö tem köla jöraŋtauat kude ahakŋe. Keuŋini oŋgitpepuköra sömbuŋini möta jönömŋinambuk undui malme. Urugeŋmoŋ kude aka böŋ kinda aka memba malme. 6 Köŋdöwoŋ aketka ambazipnöŋ eŋgek sorimegöra qahöpmö, uruŋini nupnöŋ ala memba Anutugö jitsihitŋi wuataŋgöba Kraistkö welenqeqe tandök ahakŋe. 7 Gölme ambazip welen qem eŋgiba mewö miaŋön Kembugö welenŋi qemakzin. Mewö möta nupŋini mönö Kembugö jeŋe dop kölmawaŋgö dop uruölöwakpuk memba malme.

8 Keu ki mönö mötme: Eŋgö sutŋine tosatŋan nup toŋi malje aka tosatŋan toŋini töwa qahö öne welen qem eŋgiba etqeqeŋi malje. Mi töndup denike yeŋön nup ölöpŋi mi me mi memakzei, Anutunöŋ mönö miaŋgö töwaŋi al eŋgiiga buŋa qem aŋgume. Keu mia mönö mötmöriba malme.

9 *Dut 10.17; Kol 3.25; 4.1Tourup aka welenqeqe eŋgö Kembuŋini mohot yaŋön Suep mire malja. Yaŋön ambazip tosatŋi qahö eŋgek soriba tosatŋi qahö qepureim eŋgimakzapmö, dop mohotnöŋ kewöta keunini jim teköm neŋgima. Galöm iŋini mi möt kutuzeaŋgöra mönö welenqeqe alaurupŋini simin titit ölöpŋi dop mohot ak eŋgiba öröm könöpkönöp memtöröp qemtöröp mosöta malme. Mewö.

10 Kimbini tekömamgö aiga keu kewö ohozal: Iŋini Kembubuk qekötahöba kingetka kukösumŋi ketaŋan mönö inahöba töngum eŋgiiga köhöimakŋe.

11 Bölöŋaŋgö Toŋan silenöŋ alalgö mötmöt areŋ könaŋi könaŋi alakzawi, iŋini mi mesohol köla kin köhöimegöra mönö Anutugö wahijamba pakpak memba kölget gem aŋgum teköiga malme.

12 Nini gölme ambazip sep busuŋinambuk yembuk bim qahö aumakzinmö, bem suahö galöm aka iwiluhut bölöŋi bölöŋi tuarenjoŋ ak eŋgibingöra kinjin. Bem suahö galöm bölöŋi Suep gölme sutŋire jakömbuak dumŋine kinda kembu ahakzei, mönö mi qetal eŋgimakzin. Mewöyök pom böhi öŋgöŋgöŋi eretŋi sutnine panamangö öme tohoŋgö azi ipŋi mala öröyuai pakpak galöm kölakzei, neŋön mönö yembuk yarö gilakzin. 13 Miaŋgöra tuarenjoŋ ak eŋgibingöra mönö Anutugö jurujamba lökŋanök memba kölget gem aŋguiga kinme. Mewö kingetka kerökŋinan nalö bölöŋe eŋgubingö gangömakŋei, nalö miaŋgöreŋ mönö ölöp amqeba yarö gila tötal eŋgime aka yarö mi teköiga ölöp miri gölmeŋine kanjam köla kinme.

14 *Ais 11.5; 59.17Wahijambaŋini mönö kewö löŋgöt aŋgume: Keu ölŋanök jijigö irimuŋgaŋi mönö anjöŋine jöhöba kinme. Ahakmeme solan sorokŋi mi töptöpŋine göwaŋgöwaŋ (kapa maluku) ewö köla sel jöhöm aŋguba kinme. 15 *Ais 52.7Köna esu böŋtöŋök löŋgöta ölöp töndangöba tiba anakzin. Miaŋgö dop iŋini mönö luaigö Buŋaŋi jim sehibingö jöjörögetka miaŋön bohon köl eŋgima. 16 Jurujamba miembuk toroqeba saiwa bohonŋi qetŋi mötnarip mi mönö buŋa qem aŋguba sundan teŋgöba kinakŋe. Bölöŋaŋgö Toŋan neŋgeriba qönsihim neŋgimamgöra möta timbi liŋgipŋi mulahakzawi, miaŋgö esapesap könöpŋi pakpak mönö suman miaŋön qeapköba aŋgön köl aŋgumakŋe.

17 *Ais 59.17Anutugö Amötqeqe Toŋi i mönö buŋa qem aŋgume. Buŋa qem aŋguba kunbuk letotmei, dom-amöt miaŋön mönö nöröpŋini ain irikmarik ewö turuba aŋgön köl eŋgimakŋa. Uŋa Töröŋan bimgö sou ketaŋi neŋgizawi, mi Anutugöreŋ Buŋa keu. Mi mewöyök mönö buŋa qem aŋguba urukönömŋine ala bimŋini miaŋön qemakŋe. 18 Wahöjambaŋini pakpak mi löŋgöt aŋguba mönö nalö dop Anutu köuluköba qesiba malme. Uŋa Töröŋan eŋguasöta inahöm eŋgimakzawaŋgö dop mönö uletnöŋ sahöt waŋgimakŋe. Mönö pöndaŋ uruguliguli mala sundan Anutugö ambazip sarakŋi pakpak yeŋgöra aka kapaŋ köla köulukömakŋe.

19 Nöŋgöra mewöyök kewö köulukömakŋe, “Anutu, gi mönö keu kötŋi diŋdiŋi Pol waŋginöŋga göhö Ölöwak Buŋagi tölapŋi mi keu jitŋan jimawaŋgö dop jim asariba awösamkakahök kinda uru kuŋgum eŋgimakŋa.” 20 Nöŋön Ölöwak Buŋa miaŋgöra aka Anutugö jitŋememe azi bohonŋi akzalmö, nupŋi memakzalaŋgöra aka nalö kewöŋe kösö mire tatzal. Miaŋgöra Buŋa keu mi Anutugö jeŋe dop kölmawaŋgö dop awösamkakahök jiba malmamgöra mönö köuluköba malme. Mewö.

21 Wölböt alani Tikikus yaŋön nöŋgö kösohotni alma. Yaŋön Kembubuk qekötahöba nupŋi memburik-qemburikŋi qahö memakza. Kiaŋgöreŋ denöwö aka memba tarakzali, mi pakpak jiiga iŋini mewöyök mi mötme. 22 Neŋön denöwö maljin tatzin, iŋini kösohot mi mötmegöra Tikikus melaim waŋgibiga Efesus eŋgöreŋ kama. Yaŋön kaba urukölalep eŋgiiga ölöp bönjöŋ malme.

23 Iwi Anutu aka Kembu Jisös Kraist yetkön mönö urumeleŋ alaurup eŋgöreŋ luai qeba urukalem ak eŋgiba mötnaripŋini mem köhöimakŋa. 24 Ambazip Kembunini Jisös Kraist nalö teteköŋi qahö jöpaköba malmei, Anutugö kalem möriamŋan mönö körek embuk ahöba ahöm öŋgöma. Mewö.