20
Jitŋememe yeŋön Jisösgö kukösumŋaŋgö qesiget.
Mat 21.23-27; Mak 11.27-33
1 Jisösnöŋ jöwöwöl jikenöŋ öŋgöba ambazip kambu kusum eŋgiba Ölöwak Buŋa jim asarim eŋgiba malök. Nalö kunöŋ mewö aiga jike nup galöm aka Köna keugö böhi yeŋön kantrigö jitŋememe tosatŋi yembuk Jisösgö jeŋe kaŋgotket. 2 Kaŋgota kewö qesim waŋgiget, “Gi kiaŋgöreŋ yuai akzani, mi mönö daŋön jim kutum gihiiga ahakzan? Miaŋgö kukösumŋi mi daŋön gihiyök? Mi jinöŋga mötpin.”
3 Qesim waŋgigetka kewö meleŋ eŋgiyök, “Nöŋön mewöyök qesim eŋgibi mi jiget mötmam. 4 Jonöŋ ambazip o-melun mem eŋgiba malöhi, yaŋön miaŋgö kukösumŋi mi denikeyök meyök? Suep Toŋan waŋgiyök me gölme toŋan waŋgiget?”
5 Mewö meleŋ eŋgiiga sutŋine eraum möta kewö jiget, “ ‘Kukösumŋan Suepnöhök asuhuyök,’ mewö jibin ewö, yaŋön mönö kewö jima, ‘Mewö aiga iŋini i mönö wuanöŋgöra qahö möt narim waŋgiget? Mi qahö dop kölja.’ 6 Könagesö pakpak yeŋön Jongöra ‘Kezapqetok azia akza,’ jiba mi köhöikŋanök möt nariba malje. Miaŋgöra ‘Gölme ambazipnöhök asuhuyök,’ jibin ewö, yeŋön mönö irimŋini seholiiga kötnöŋ neŋgume.” 7 Keu mewö kewöta kewö meleŋget, “Kukösumŋan denikeyök ahuyöhi, nini mi qahö mötzin.”
8 Mewö meleŋgetka Jisösnöŋ kewö jii mötket, “Mewö aiga nöŋön mewöyök yuai ki ahakzalaŋgö kukösumŋi daŋön niŋgiyök, mi qahö jibi mötme.” Mewö.
Wain kösö nup galöm bölöŋi, mieŋgö dopkeu
Mat 21.33-46; Mak 12.1-12
9 *Ais 5.1Jisösnöŋ könahiba ambazip dopkeunöŋ kewö jii mötket, “Azi kunŋan wain kösö nup köla kömörök. Köl kömöta nup galöm tosatŋi miwikŋaim eŋgiba jiiga nupŋi memba ölŋaŋgö bahöŋi nanŋini memba bahöŋi toŋi waŋgimegöra böröŋine alök. Böröŋine ala eŋgömosöta kantri kunöŋ anda nalö köröpŋi malök.
10 “Mala mali ölŋi öliyöhaŋgö nalöŋi (yambu 5) töriiga miaŋgöreŋ welenqeqeŋi kun melaim waŋgiiga galöm yeŋgöreŋ anda wain nup ölŋaŋgö bahöŋi waŋgimegöra jiyök. Jiyökmö, nup galöm yeŋön i kömbinöŋ qeba wuataŋgögetka böröŋi börak liliŋgöyök. 11 Miaŋgö andöŋe welenazi kun melaim waŋgiiga anökmö, i mewöyök kömbinöŋ qeba gamu qem waŋgiba wuataŋgögetka böröŋi börak liliŋgöyök. 12 Liliŋgöiga nup toŋan welenazi kun kunbuk melaii aniga ambemŋi karöbut ahökmö, i mewöyök sepgwörörök qeba nup yaigepŋe gilget geyök.
13 “Mewö aketka wain nup toŋan keu jaruba jiyök, ‘Mönö denöwö akŋamto? Nani wölböt nahöni mönö melaibiga ani i eka göda qeme me denöwö?’ 14 Mewö jiba nahönŋi melaiiga anökmö, wain nup galöm yeŋön i eka sutŋine kewö eraum möta jiget, ‘Yaŋön mönö börösamotŋaŋgö toŋi akŋa. Ayop, i mönö qein kömuiga wain kösö nup kiaŋön mönö nanine buŋanina akŋa.’ 15 Mewö jiba gilgetka nup yaigepŋe geiga qeget kömuyök. Wain nup toŋan mi möta mönö denöwö ak eŋgima?
16 Yaŋön mönö nanŋak kaba nup galöm mi köndeŋ eŋgima aka nup galöm dölökŋi miwikŋaim eŋgiba wain kösö nupŋi yeŋgö böröŋine alma.” Jisösnöŋ dopkeu mewö jii möta jiget, “Mi qahö dop kölja. Yapmakek!” 17 *Sum 118.22Jigetmö, Jisösnöŋ i törörök eŋgeka kinda kewö jiyök, “Buŋa Kimbigö keu kun kewö ahöza,
‘Miri meme yeŋön köt tandö kun andö qeba öne mosötket taröhi, miaŋön mönö tandö kömbönaŋi aiga miwikŋaiget.
Miaŋön tiŋgiriga mirinöŋ mönö gororoŋgöba eta kölma.’ Keu miaŋgö könaŋi denöwö?
18 Miaŋgöra kewö jibi: Kunŋan tandö bohonŋi miaŋgöreŋ tötöŋgata eta qemawi, mi mönö sileŋi kutumutumapmö, ain tandö miaŋön jöla tala kungö qakŋe eta kölmawi, mi mönö körek qözömözözamgöma.”
19 Jisösnöŋ mewö jiiga Köna keugö böhi aka jike nup galöm yeŋön keu miaŋgö könaŋi möt asariba kewö jiget, “Dopkeu mi mönö neŋgöra jiza.” Miaŋgöra i nalö miaŋgöreŋök memba jöhöbingö mötketmö, ambazip kambu yeŋgöra keŋgötŋini möta osiget. Mewö.
Takis alalgö Jisös esapköm waŋgiget.
Mat 22.15-22; Mak 12.13-17
20 Juda jitŋememe yeŋön Jisösgö jegalöm meget. Mewö memba keuŋi kun qiwitipköi keugö bötaknöŋ öröi gwaröhöm waŋgimegöra aka azi tosatŋi melaim eŋgiget yaŋgöreŋ kaget. Opotöröp aka premiö yeŋgö böröŋine al waŋgibingö möta Buŋa keu ölöpŋi jiji tandök aka qesiba keuŋaŋgö kezap alget.
21 Areŋ mewö ala qesiba kewö jiget, “Böhi, nini göhö könagi mötzin. Göŋön keu diŋdiŋi jiba kusum neŋgimakzan. Göŋön ambazip tosatŋi qahö eŋgek soriba tosatŋi qahö qepureim eŋgimakzanmö, dop mohotnöŋ kewöt neŋgimakzan. Mewö aka Anutugöreŋ köna mi keu ölŋaŋgö dop kusum neŋgimakzan. 22 Miaŋgöra nini sisa-kiŋgöra takis ala miaŋön Mosesgö Köna keu siŋgibin me qahö?”
23 Mewö jigetmö, Jisösnöŋ isimkakalek areŋini möt kutuba kewö jii mötket, 24 “Ölöp silwö moneŋ (Kina 5) kun kondel niŋgigetka eki. Dagöreŋ imut aka qet mi miaŋgöreŋ ohoget ahöza?” “O, mi sisa-kiŋgöreŋ,” mewö meleŋda jiget.
25 Jigetka kewö jii mötket, “Mewö aiga yuai sisa-kiŋgö imutŋambuk buŋaŋi akzawi, mi mönö yaŋgöra al waŋgime. Yuai kun Anutugö buŋaya akzawi, mi mönö Anutugö buŋa qeme.” 26 Jisösnöŋ mewö jiyöhaŋgöra ambazip kambu yeŋgö jeŋine keugö bötaknöŋ al waŋgibingö osiba keuŋaŋgöra welipköba keu bök kinget. Mewö.
Kömupnöhök wahötwahötkö Jisös esapköm waŋgiget.
Mat 22.23-33; Mak 12.18-27
27 *Apo 23.8Sadyusi böhi pati yeŋön “Kömugeri, yeŋön kude wahötme,” jiba malget. Yeŋgöreŋök tosatŋan Jisösgö jeŋe kaŋgota kewö qesim waŋgiba 28 *Dut 25.5jiget, “Böhi, Mosesnöŋ kewö jim kutum neŋgiyök ahöza, ‘Azi kun ambi meiga nahönbörat qahö ahui kömuiga munŋan ölöp malöŋi memba mala gwölönarök qiwikŋaim waŋgiiga datŋaŋgö qet bisiba malma.’
29 “Mötnöŋ! Nalö kunöŋ darumun 7 malget. Datŋini mutukŋan ambi memba mala gwölönarökŋi qahö öne mala kömuyök. 30 Kömuiga munŋan malöŋi mi meyök. 31 Miaŋgö andöŋe munŋi kunŋan ambi miyök meyök. Mewöŋa mewö darumun 7 pakpak yeŋön ambi mohok miyök memba gwölönarök qahö mala kömum teköget. 32 Kömugetka tekögetka qöndökŋi malöŋini mi mewöyök kömuyök. 33 Göŋön ‘Kömugeri yeŋön guliba wahötme,’ jizanmö, nini mi qahö möt narizin. Mötnöŋ, azi 7 pakpak mi öröröŋ wahötpeak ewö, ambi mohok mi anömŋina meget malöhaŋgöra aka mönö dagö anömŋa akawak?”
34 Mewö jigetka Jisösnöŋ kewö meleŋnök, “Nalö kewöŋe gölme kiaŋgöreŋ ambazip awanöm aka malahakze. 35 Mi malahakzemö, ambazip uruŋini meleŋgetka Anutunöŋ eka möri dop köliga kömupnöhök wahöta miri gölme kun euyaŋgöreŋ aŋgota malmei, yeŋön miaŋgöreŋ qahö amime.
36 “Miaŋgö könaŋi kewö: Mötnarip ambazip guliba kömupnöhök wahötmei, yeŋön Anutugö nahönböraturupŋi akze. Yeŋön Suep garata tandök ewö aka kunbuk qahö kömumemö, teteköŋi qahö mal öŋgöme. 37 *Eks 3.6Mötket! Kömugeri, yeŋön guliba wahötmegö keuŋi mi Mosesnöŋ mewöyök naŋgöba jiyök. Ip köhösönöŋ könöp bölam ahuba qahö jem kutuyöhi, yaŋön mi eka kösohotŋi ohoi miaŋgöreŋ keu kewö ahöza, ‘Nöŋön Anutu Abrahamgö Kembu, Aisakö Kembu aka Jeikobkö Kembuya mala kota maljal.’ 38 Isik bömön karöbut yeŋön Anutubuk mala mal köhöiba öŋgöme. Körek köhöiba maljei, yeŋön mönö malmalŋini Anutugöra malje. Miaŋgöra Anutunöŋ köhömuŋi yeŋgö Kembuŋini qahöpmö, malmal köhöikŋi maljei, mönö yeŋgö Kembuŋina akza.”
39 Jisösnöŋ mewö meleŋniga Köna keugö böhi tosatŋan meleŋda kewö jiget, “Böhi, mi törörök jizan.” 40 Mewö jiba keu kun kunbuk qesim waŋgibingö kölköldömdöm aka mosötket. Mewö.
Kraist mi kiŋ Deiwidkö Kembuŋi aka gwölönarökŋi.
Mat 22.41-46; Mak 12.35-37
41 Jisösnöŋ keu kun kewö jii mötket, “Kraistnöŋ Kiŋ Deiwidkö gwölönarökŋi akzawi, tosatŋan keu mi denöwögöra jimakze? 42 *Sum 110.1Deiwidnöŋ nanŋak keu kewö jiiga Sumbara (Buŋa liŋet, sam) Kimbinöŋ ahöza,
‘Anutunöŋ kinda nöŋgö Kembuni kewö jii mörök, Göŋön mönö kaba nöŋgö böröni ölŋe tatnöŋga
43 nöŋön nalö sutŋe kerökurupki tim tötala luhut al eŋgiba göhö köna tambö gwaröŋe al eŋgimam.
Nalö mi kam kuŋgumawaŋgö dop mönö asakmararaŋnöŋ ki tatman.’
44 Deiwidnöŋ mewö jiba qetŋi ‘Nöŋgö Kembuni’ jiza. ‘Kembuni’ jiba mönö denöwö aka yaŋgö gwölönarökŋi mohot akawak?” Mewö.
Urumeleŋgö silesile malmalgö galöm meme keu
Mat 23.1-36; Mak 12.38-40; Luk 11.43
45 Jisösnöŋ gwarekurupŋi yeŋgöra keu kewö jiiga ambazip kambu pakpak mi mötket, 46 “Köna keugö böhi yeŋgöra mönö galömŋini memba malme. Yeŋön maluku köröpŋi löŋgöta anda kaba kondel aŋgubingö mörakze. Maketnöŋ me könanöŋ ambazip eŋgeketka jölöŋini jimegö mörakze. Mewöyök köuluk mire qaikŋe eu tatpingö sihimŋi mörakze aka közölömbuaŋnöŋ dum tatat mutukŋe jegep tatpingö mörakze. 47 Yeŋön malö yeŋgöreŋ miri yuai bidaŋda gagabe köla eŋguaŋgirakze aka qetbuŋaŋini asuhumapköra köuluk köröpŋi köuluköba töptöpŋine qemakze. Miaŋgöra Anutunöŋ keuŋini jim teköba likepŋi öŋgöŋgöŋi meleŋni qakŋine öŋgöma.” Mewö.