10
Awanöm aŋgömosötmosötkö keuŋi
Mat 19.1-12; Luk 16.18
1 Jisösnöŋ wahöta Kaperneam miri mosöta Jordan o kutuba likepŋe anda mötöteiba eta kunbuk o mi kutuba Judia prowinsnöŋ kayök. Kaiga ambazip kambulelembenöŋ kunbuk yaŋgöreŋ tokogetka akmalöhi, miaŋgö dop kunbuk kusum eŋgiyök.
2 Kusum eŋgiiga Farisi (Köna keugö kapaŋkölköl) tosatŋan yaŋgöreŋ kaba keugö bötaknöŋ örömapkö esapköm waŋgiba kewö qesim waŋgiget, “Azinöŋ anömŋi mosötmawi, mewö miaŋön Köna keu oŋgitma me qahö?”
3 Qesim waŋgigetka meleŋda kewö jii mötket, “Mosesnöŋ miaŋgö keuŋi denöwö jim kutum eŋgiiga ahöza?”
4 *Dut 24.1-4; Mat 5.31Mewö jii möta kewö jiget, “Azinöŋ aŋgömosötmosöt papia ohoba anömŋi ölöp mosötma. Mosesnöŋ mewö jim kutui ahöza.”
5 Mewö jigetka kewö jim eŋgiyök, “Yaŋön mönö uruköhöikŋinaŋgöra aka jimkutukutu mewö ohom eŋgiyök. 6 *Jen 1.27; 5.2Ohom eŋgiyökmö, Anutunöŋ könakönahiŋe yuai pakpak miwikŋaiyöhi, nalö miaŋgöreŋök ‘Azi aka ambi malmegöra miwikŋaim eŋgiyök.’ 7 *Jen 2.24Miaŋgöra azinöŋ mönö iwinamŋi etkömosöta anömŋaŋgöreŋ anda qekötahöiga 8 yetkön sile mohot aka malmahot. Mewö aka toroqeba yahöt qahö akzahotmö, sile mohot aka malmahot. 9 Anutunöŋ azi aka ambi mindirim etkiyöhi, ambazip kunŋan mönö i kude mendeŋ etkima.”
10 Jisösnöŋ mewö jiba miri uruŋe öŋgöiga gwarekurupŋan keu miaŋgöra kunbuk qesim waŋgiget. 11 *Mat 5.32; 1 Kor 7.10-11Qesim waŋgigetka kewö jii mötket, “Azi kunöŋ anömŋi wuataŋgöba ambi kun memawi, yaŋön mönö qesabulum sero yoŋgorö akŋa. 12 Mewöyök ambi kunöŋ apŋi wuataŋgöba azi kun memawi, yaŋön mönö qesabulum sero yoŋgorö akŋa.” Mewö.
Jisösnöŋ nahönbörat kötuetköm eŋgiyök.
Mat 19.13-15; Luk 18.15-17
13 Ambazip tosatŋan nahönbörat morömorö eŋguaŋgita Jisösnöŋ eŋgömisirimapköra yaŋgöreŋ kagetmö, gwarek yeŋön ambazip mi jim qetal eŋgiget. 14 Mewö aketmö, Jisösnöŋ mi eka uruŋi böliiga kewö jii mötket, “Nahönbörat moröŋi mönö eŋgömosötketka nöŋgöreŋ kame. Anutunöŋ ambazip mewö mia bemtohoŋi buŋa qem eŋgima. Miaŋgöra i kude jöhöm eŋgime. 15 *Mat 18.3Nöŋön keu ölŋi kun kewö jibi mötme, “Kunŋan Anutugö bemtohoŋi mi nahönbörat ewö buŋa qahö qem aŋgumawi, yaŋön mönö miaŋgö uruŋe aŋgotmamgö osima. 16 Mewö jiba tambuŋe ala dohongöm eŋgiba böröŋi nöröpŋine ala kötuetköm eŋgiyök. Mewö.
Jisösnöŋ azi pomŋi kungö qambaŋ keu jiyök.
Mat 19.16-30; Luk 18.18-30
17 Jisösnöŋ könahiba köna anmamgö ahiga azi kunöŋ ösumŋan yaŋgöreŋ kayök. Kaba wösöŋe geba simin köla kewö qesim waŋgiyök, “Böhi ölöpŋi, nöŋön mönö denöwö aka malmal köhöikŋaŋgö buŋa qem aŋgubileŋak?”
18 Qesim waŋgiiga kewö jii mörök, “Nöŋgöra ‘Böhi ölöpŋi,’ mi wuanöŋgöra jizan? Anutu mohotŋan ölöpŋi akza. Azi kunŋan i ewö ölöpŋi qahö akza. 19 *Eks 20.12-16; Dut 5.16-20Gi jöjöpaŋ keu ki möt teközan,
‘Ambazip kun kude qenöŋ kömuma. Sero yoŋgorö kude akŋan. Yoŋgorö kude meman. Jitnöŋ alal keu kude jiman. Kalöpköba yoŋgorö kude meman. Iwinamgi mönö göda qem etkimakŋan.’ ”
20 Mewö jii möta kewö jiyök, “Böhi, mi pakpak mönö gwaböneyök tem köla mala kotzal.”
21 Mewö jiiga Jisösnöŋ uba eka urukönömŋan jöpaköm waŋgiba kewö jii mörök, “Mohot kungöra kewö osizan: Gi mönö anda sukinapki pakpak söŋgöröŋi memegöra alnöŋ moneŋ kaiga ambazip wanapŋi engiman. Mewö aknöŋga sukinapki ketaŋi (guli masapugi milyön kinagi ewö) ketaŋi mi Suep mire ahöm gihima. Mewö aka ni nuataŋgöba kaman.” 22 Jisösnöŋ mewö jiyökmö, sukinapŋi gwötpuk ahöyöhaŋgöra aka keu mi möta uruŋi bosoleiiga wösöbirik aka jeŋi asöliiga öne mosöta anök.
23 Mosöta aniga Jisösnöŋ ui anda kaiga gwarekurupŋi kewö jii mötket, “Yei! Ambazip moneŋ inapŋinambuk yeŋön mönö Anutugö bemtohoŋnöŋ aŋgotpingö lömböriba kupuk-kapak akŋe.”
24 Mewö jiiga gwarek yeŋön mi möta welipkögetmö, Jisösnöŋ toroqeba kewö jii mötket, “Gupanurupni, ambazip denike yeŋön moneŋ inapŋini möt narimakzei, yeŋön mönö Anutugö bemtohoŋ uruŋe aŋgotpingö lömböriba kupuk-kapak akŋe. 25 Mi kewö jim tuarimam: Sömbup ketaŋi kamel mi kondi kinimŋe ölöp qahö aŋgotma. Miaŋgö dop ambazip pomŋi yeŋön Anutugö bemtohoŋ uruŋe aŋgotpingö lömböriba qaköme.”
26 Mewö jii möta aurum tililiŋgöba nanŋinaŋgöra kewö jiget, “Opopoŋ! Ambazip daŋön mönö Suepkö buŋaya akawak?”
27 Mewö jigetka Jisösnöŋ uba eŋgeka kewö jiyök, “Ambazipnöŋ mi esapköba osiba qakömakzemö, Anutunöŋ mewö qahö ahakza. Anutunöŋ mönö yuai pakpak ölöp ahakza. Yaŋön yuai kun aka memamgö qahö osiba qakömakza.” Mewö.
Jisösgö nup memegö töwaŋi
28 Pitönöŋ keu mi möta meleŋda Jisös kewö jii mörök, “Mötnöŋ, neŋön mönö yuai pakpak mosöta gi guataŋgöba kain.”
29 Mi möta Jisösnöŋ kewö jiyök, “Nöŋön keu ölŋi kun kewö jibi mötme: Kunŋan nöŋgö aka Ölöwak Buŋagöra aka yuai kun mosöröhi, - mi jike miriŋi, darumunŋi, nenbehötŋi, iwinamŋi, nahönböratŋi me nup kisiŋi - mi eŋgömosöriga Anutunöŋ mönö miaŋgö likepŋi oŋgita meleŋ waŋgiiga sehima. 30 Kunŋan yuai mi mosöröhi, Anutunöŋ mönö salupŋe mi 100:kö dop toroqeba waŋgiiga nanŋi buŋaya akŋa. Gölmegö malmalnöŋ sesewerowero uruŋe malmapmö, jike miri, darumun, nenbehöt, iwinam, nahönbörat aka nup kisi mi mönö salupŋe ahum waŋgima aka nalö könaŋgepŋe malmal köhöikŋi teteköŋi qahö buŋa qem aŋguma. 31 *Mat 20.16; Luk 13.30Mewö asuhumapmö, mutukŋi eŋgöreŋök gwötpukŋan dagibezupŋi aketka dagibezupŋi yeŋgöreŋök gwötpukŋan mutukŋi akŋe.” Mewö.
Kömumamgö keuŋi jiiga karöbut ahök.
Mat 20.17-19; Luk 18.31-34
32 Jisösnöŋ gwarekurupŋi yembuk Jerusalem sitinöŋ öŋgöbingöra gölme köna anget. Jisösnöŋ mutuk aniga gwarekurupŋan andöŋe anda welipköget aiga ambazip andöŋine kageri yeŋön mönö keŋgötŋini mötket. Mewö aketka Jisösnöŋ gwarekurupŋi 12 mi kunbuk öröm eŋgiba könahiba kusum eŋgiyök. Yaŋgöreŋ yuai asuhumawi, keu mi jim asariba kewö jiyök, 33 “Mötket, nini Jerusalem öŋgöbin. Miaŋgöreŋ kunŋan Suep gölmegö azi ölŋi mamalolo mem waŋgiiga jike nup galöm aka Köna keugö böhi yeŋgö böröŋine gema. Yeŋön kömumapkö keuŋi jim teköba kian gawman yeŋgö böröŋine al waŋgime. 34 Al waŋgigetka mepaiköba söutkölap qeba ihilek wahiŋambuknöŋ tauköm waŋgime. Tauköm waŋgiba qegetka kömuma. Kömumba wehön karöbut teköiga kömupnöhök wahötma.” Mewö.
Jeims Jon yetkön yuaigöra ulerohot.
Mat 20.20-28
35 Jisösnöŋ mewö jiiga Jebedigö nahönyahötŋi Jeims aka Jon yetkön yaŋgöreŋ anda kewö jiyohot, “Böhi, niri yuai kungöra ulet gihiziri mi ak netkimangö mötzit.”
36 Jiyohotka qesim etkiyök, “Iŋiri wani yuai ak etkimamgöra mötzahot?”
37 Qesim etkiiga kewö jiyohot, “Göŋön ölöp jim kutunöŋga niri göhö asakmararaŋnöŋ eu öŋgöba kunöŋ börögi ölŋe aka kunŋan börögi qaniŋe tata yuai pakpak galöm kölbinak.”
38 *Luk 12.50Mewö Jiyohotmö, Jisösnöŋ kewö jii mörohot, “Iŋiri miaŋgö könaŋi qahö möt yaköba uletzahot. Nöŋön qambi asölŋambuk nemami, iŋiri mi ölöp nemba sihimbölö mötmahot me qahö? Jöm nöŋgwambuknöŋ melun mem niŋgimei, iŋiri mi memahot me qahö?”
39 Jii möta jiyohot, “Mi ölöp membit.”
Jiyohotka kewö jii mörohot, “Mi ölŋa! Nöŋön qambi asölŋambuk nemami, iŋiri mi mewöŋanök nemahot aiga jöm nöŋgwambuknöŋ melun mem niŋgimei, miaŋön mönö iŋiri mewöyök melun mem etkime. 40 Mem etkimemö, nöŋgö böröni ölŋe me qaniŋe daŋön tatmahori, nöŋön keu mi jim kutumamaŋgö dop qahö. Anutunöŋ dum yahöt mi denike yetköra mözözömgöyöhi, mi mönö yetköra etkiiga nömbuk tata galöm kölmahot.” Mewö.
Galöm ölŋan mönö welenqeqeya akza.
41 Jeims Jon yetkön mewö ulerohotka alaurupŋi 12 yeŋön mi möta könahiba urubölö aket. 42 *Luk 22.25, 26Mewö aketmö, Jisösnöŋ eŋgoholi kagetka kewö jii mötket, “Gölmegö kantriŋi kantriŋi mieŋgö jembonŋinan galöm köl eŋgibingö jizei, yeŋön mönö azi kembu tandök ak eŋgimakze. Yeŋgö ketaŋamŋinan mönö keu jim kutuba mindiŋgöm eŋgiba kukösumŋini kondelakze. Iŋini könaŋini mi ölöp mötze. 43 *Mat 23.11; Mak 9.35; Luk 22.26Eŋgö sutŋine silik mewö ahöbapukmö, kunŋan eŋgö sutŋine ketaŋamŋini akŋamgö mötzawi, yaŋön mönö welen qem eŋgiba malma. 44 Mewöyök kunŋan eŋgö sutŋine mutukŋi malmamgö mötzawi, yaŋön mönö körek eŋgö nembö bapŋine mala welenqeqeŋini omaŋi akŋa. 45 Suep gölmegö azi ölŋan mönö mewöyök silik mewöŋi kondela nanŋi welen qem waŋgimegöra aka qahö kayök. Qahöpmö, welen qem eŋgiba ambazip sehisehiŋi yeŋgö sohopŋini memamgöra aka eta malmalŋi köleŋda mosötma.
Bartimeus jeŋi gömöliiga mem ölöwahök.
Mat 20.29-34; Luk 18.35-43
46 Jisösnöŋ gwarekurupŋi yembuk Jeriko sitinöŋ kaget. Kaba siti mi mosötpingö aketka ambazip kambulelembenöŋ eŋguataŋgöba andöŋine kaget. Mewö kagetka jegömöl azi qetŋi Bartimeus, Timeusgö nahönŋi yaŋön moneŋ aka nene waŋgimegö ulet eŋgiba köna jitŋe tarök. 47 Tariga “Nazaret-azi Jisösnöŋ kaza!” jiget möta könahiba kewö qerök, “Jisös Deiwidkö gwölönarökŋi, mönö ak-kömum niŋgiman!”
48 Mewö qeriga gwötpukŋan bök tatmapköra qetal waŋgigetmö, yaŋön mönö kapaŋ köla qerök. “Deiwidkö gwölönarökŋi, mönö ak-kömum niŋginöŋ!”
49 Qeriga Jisösnöŋ dörök ala kewö jiyök, “Ölöp qetketka ki kama.” Mewö jiiga jegömöl azi mi qeta kewö jiget mörök, “Göhöra qeza. Mönö mötkurumkurum mosöta wahöta kaman.”
50 Mi möta malukuŋi qeköba gila pöraŋ wahöta kinda Jisösgöreŋ anök.
51 Aniga kewö qesim waŋgiyök, “Alani, nöŋön wani yuai ak gihimamgöra mötzan?” Mewö qesim waŋgiiga jegömöl azinöŋ jiyök, “Ketaŋamni, ni jeni kunbuk umamgöra mötzal.”
52 Mewö jiiga Jisösnöŋ kewö jii mörök, “Mötnaripkan mönö mem ölöwak gihiza. Mönö ölöp anman.” Mewö jii möta jeŋan miaŋgöreŋök tohoiga uba andöŋine Jisös wuataŋgöba anök. Mewö.