1 Neŋön Anutu möt nariinga keunini jim teköiga solanizin. Miaŋgöra Kembunini Jisös Kraistnöŋ mönö nam köl neŋgiiga Anutubuk luai miwikŋaiba maljin. 2 Mewöyök Jisös Kraist möt nariinga nam köl neŋgiiga kalem möriam buŋa qem aŋgubingö könaŋi miwikŋaiba nalö kewöŋe kalem möriam uruŋe maljin. Anutugö asakmararaŋ uruŋe aŋgotpingö jörömqöröm aka söŋgaimakzin.

3 Miaŋgörök qahö söŋgaimakzinmö, wahöjaliŋ möta miaŋgöra mewöyök söŋgaimakzin. Köŋjiliŋ möta mökösöŋda mewö miaŋön kapaŋkölköl miwikŋaibin. Mi möta miaŋgöra söŋgaimakzin. 4 Kapaŋkölköl miwikŋaiba esapesapnöŋ köhöiba kinbin. Esapesap-nöŋ köhöiba kininga jörömqörömninan köhöimakŋa. 5 Anutunöŋ Uŋa Töröŋi al neŋgiiga köna asuhuiga urukalemŋi mokoiga urunine geiga maljin. Miaŋgöra jörömqöröm aka oyaeŋkoyaeŋ akingö al mamböta gamumamusum qahö miwikŋaibin.

6 Miaŋgö könaŋi kewö: Nini mutuk lölöwöröŋi ösumnini qahö malini, Kraistnöŋ mönö nalö diŋdiŋi miaŋgöreŋök kömumba ambazip aŋgöjörakninambuk neŋgö sohopnini meyök. 7 Kunöŋ Köna keu törörök wuataŋgöba diŋdiŋi akzawi, ala mewöŋaŋgöra kunŋan ölöp qahö kömumbawak? Mi möriga osibawakmö, kunöŋ urukalem gwötpuk ambazip ak eŋgimakzawi, alaŋi kunŋan yaŋgöra aka ölöp sileŋi köleŋda kömumamgö mötpawak.

8 Ambazipnöŋ mewö ahakzinmö, Anutunöŋ uruŋan jöpaköm neŋgimakzawi, yaŋön mi kewö kondelök: Yaŋön Kraist melaiiga eta mutuk aŋgöjörak ambazip malini, nalö miaŋgöreŋök mönö neŋgöra aka kömuyök. 9 Kömuiga nalö kewöŋe sepŋan saŋgoŋda jim teköm neŋgiiga solaniba maljin. Töndup mi korembeŋi ewö aiga ölŋan mönö könaŋgep kewö asuhuma: Anutunöŋ siŋgisön-dokö urukönöpŋi aukŋe kondeliga yuai kanjamŋambuk gölmenöŋ asuhuma. Mi asuhuiga Anutugö jeŋe solanŋi akzinaŋgöra Jisösnöŋ mönö jeŋberereŋ miaŋgöreŋök meköm neŋgiiga oyaeŋkoyaeŋ akin.

10 Nini mutuk Anutugö kerökurupŋi malini, nalö miaŋgöreŋ nanŋi Nahönŋi melaii kömumba miaŋön töwanini ahiga Anutubuk ala-ala ahin. Ahini, miaŋön korembeŋi akzapmö, ölŋi bohonŋan könaŋgep kewö asuhuma: Töwanini ali Anutugö alaurupŋi malinga Jisösnöŋ köhöiba maljawaŋgöra mönö amqeba meköm neŋgiiga oyaeŋkoyaeŋ akin. 11 Kembunini Jisösnöŋ Anutugö amötqeqe nupŋi meiga Anutunöŋ töwanini ali yambuk ala-ala ahini, miyöhök qahöpmö, ölŋa Anutubuk jöpaköm aŋguba kinda köiraŋ köla söŋgaimakzin. Mewö.

12  * Jen 3.6Azi mohotnöŋ siŋgisöndok gölmenöŋ kondoriga asuhuyök. Anutunöŋ siŋgisöndok miaŋgö likepŋi aliga kömup asuhuyök. Miaŋgö dop ambazip körek neŋön siŋgisöndok aka malinga kömupnöŋ miaŋgöra ambazip körek pakpak dop köl neŋgii maljin. 13 Mutuk Köna keu qahö asuhuiga nalö miaŋgöreŋ mewöyök siŋgisöndok lök aukŋe asuhuba ahöyökmö, Köna keu qahö ahöiga siŋgisöndokö keuŋi mi qahö jim kewöta laŋ malget.

14 Adamgö nalöŋeyök könahiba laŋ mala kotketka Mosesgö nalöŋe Köna keu asuhuyök. Ambazip nalö sutŋe miaŋgöreŋ siŋgisöndok aketmö, Adamnöŋ köna walöŋnöhi, miaŋgö dowök qahö walöŋda malgetmö, kömupnöŋ töndup i mewöyök galöm köl eŋgii malget.

Adam, azi mutukŋi yaŋön mönö azi kun kamawaŋgö söpsöpŋa ahök.

15 Söpsöpŋa ahökmö, könaŋiri mi öröröŋ qahö akzahot. Adamnöŋ Köna keu walöŋda eri siŋgisöndok asuhum sehiba ambazip gwötpuk dop köl eŋgiiga kömumba malget. Mi kömupkö könaŋi akzapmö, oyaeŋkoyaeŋ akingö könaŋi mi kun. Mi kewö: Azi mohot Jisös Kraist yaŋön nam köl neŋgiba kalem möriamŋi indeliga Anutugö kalemŋan aukŋe asuhuba ambazip gwötpuk dop köla qesalöpköm neŋgiyök. 16 Toroqeba kewö jimam: Köna yahöt mi öröröŋ qahö akzahot. Azi mohotnöŋ siŋgisöndok aiga Anutunöŋ keuŋi jim teköiga siŋgisöndok ambazip körek neŋön könöp siagö buŋaya akzin. Mi gölme azigö könaŋi akzapmö, Suep azigö könaŋi mi kun. Mi kewö: Nalö gwötpuk Anutugö Köna keu walöŋninga kalemŋi kondela jim teköm neŋgiiga solanimakzin.

17 Mi dumge jimam: Azi mohotnöŋ Köna keu walöŋda kömup kondoriga ambazip körekmakörek kömumba maljin. Adamgö siŋgisöndoköra aka kömupnöŋ körek dop köla galöm köl neŋgii laŋ malin. Mi köna etqeqeŋi akzapmö, Anutu ösum-mumuŋaŋgö könaŋi mi kewö: Ambazip nini solanŋi akingö kalemŋi mi keleŋmaleleŋ buŋa qem aŋguba kalem möriamŋaŋgö uruŋe maljini, neŋön mönö oyaeŋkoyaeŋ akin. Azi mohot Jisös Kraist yaŋön naŋgöba inahöm neŋgiiga suahö * Jembon oŋi nene (Siawari keunöŋ qariwe ilikŋi nene) ewö köhöiba mal öŋgöbin.’ ewö köhöiba mal öŋgöbin.

18 Dumge kunbuk jimam: Azi mohotnöŋ Anutugö Köna keu walöŋda eri Anutunöŋ keuŋi jim teköiga ambazip körek neŋön könöp siagö buŋaya ahin. Mewöŋanök azi kunŋan solanŋi akingö kondoriga urunini meleŋninga Anutunöŋ ölöp ambazip pakpak neŋgö keunini jim teköiga solaniba köhöiba mal öŋgöbin. 19 Dumge kunbuk kewö jimam: Azi mohotnöŋ qeqetal aka siŋgisöndok bohon köli sehiiga ambazip sehisehiŋi neŋön meleŋda siŋgisöndok ambazip ahin. Mewöŋanök azi kunŋan Anutugö jitŋi tem köla siŋgisöndokninaŋgö töwaŋi aliga köna asuhuiga Anutunöŋ ambazip sehisehiŋi neŋgö keunini jim teköiga solanibin.

20 Mutuk öne laŋ mala kotketmö, Mosesgö nalöŋe Anutunöŋ Köna keu ambazip siŋgisöndokŋini möt kutumegöra toroqem eŋgiyök. Mi toroqem eŋgiyökmö, mi mötketka siŋgisöndokŋinan sehiba aukŋe asuhuyök. Mewö aiga Anutunöŋ mönö kalem möriamŋi mewöyök mem sehiiga siŋgisöndok oŋgita asuhuyök. 21 Siŋgisöndokö kukösumŋi mi ketaŋi. Miaŋgöra siŋgisöndok ahinga miaŋön galöm köl neŋgiiga köhömuŋi mala kömumba mala korin. Anutugö kalem möriamŋi miaŋön mönö mewöŋanök kukösumŋambuk akza. Jisös Kraist Kembuninan solanibingö kondoriga Anutunöŋ keunini jim teköiga diŋgiba malmal köhöikŋi miwikŋaiba nalö teteköŋi qahö mal öŋgöbin. Mewö.