1 O urumeleŋ alaurupni, Anutunöŋ mewö ak kömum neŋgiyö-haŋgöra nöŋön mönö uruŋini kewö kuŋgum eŋgizal: Iŋini mönö ak-kömukömuŋi mi urukönömŋinan mötmöriba miaŋgö dop kitipŋi meleŋ waŋgiba waikŋi memba möpöseiba malme. Mewöyök nanŋini sileŋini mi Anutugö kötön naluha alme. Mewö alme ewö, iŋini mönö guliba sarakŋi aketka Anutunöŋ nalukŋini mi ehi dop köli sihimŋi mörakŋa.

2 Mutuk gölmegö ahakmeme bölöŋaŋgö areŋi wuataŋgöba malgetmö, nalö kewöŋe mewö kude toroqeba ahakŋe. Mewö qahöpmö, mönö urumötmötŋinan kölöŋaiiga letota malme. Mewö mala Anutunöŋ eŋgöra sihimŋi denöwö mötzawi, mi jaruba ölöp köhöiba kewöta miwikŋaime. Mi miwikŋaiba miaŋgö dop ahakŋe ewö, mönö köna ölöpŋi wuataŋgögetka dop köl waŋgii aködamunŋinambuk ahakŋe.

3 Siksauk laŋ malbepuköra keu kun jimam. Anutunöŋ kalem möriam niŋgiiga miaŋgö qakŋe kinda körek eŋgöra kewö jizal: Iŋini mönö nanŋini mötket öŋgöŋgöŋi qahö akŋapmö, mohot mohot iŋini mönö törörök möt kutum aŋguba malme. Anutunöŋ mötnarip neŋgiiga miaŋgö ölŋi asuhumakzawaŋgö dop mönö nanŋini kewöt aŋguba miaŋgö dopkeu jiba malme.

4 *1 Kor 12.12Miaŋgö könaŋi kewö: Sileninan mohot akzapmö, sile kitipnini mi gwötpuk. Kitipŋi pakpak mieŋön nup mohot miyöhök qahö memakze. 5 Miaŋgö dop urumeleŋ ambazip neŋön mewöyök gwötpuk maljinmö, töndup Kraistpuk qekötahöba kinda sile ewö ölŋi mohot akzin. Mohot akzinmö, nanŋök nanŋök neŋön mönö toroqem aŋguba mohotŋe nup meinga dop köli kinjin.

6 *1 Kor 12.4-11Anutunöŋ kalem möriamŋi neŋgiyöhaŋgö dop nup memegö mötmöt kalem murutŋi murutŋi buŋa qem aŋguba maljin. Kunöŋ kezapqetok nupkö mötmöt kalemŋi buŋa qem aŋguza ewö, yaŋön mi mönö nupnöŋ alakŋa. Mötnaripŋan töndangöm waŋgi-makzawaŋgö dop nupnöŋ ala Anutugö keuŋi jiba malma. 7 Kungöra welenqeqe nupkö mötmöt kalemŋi waŋgiyök ewö, miaŋgö dop mönö tosatŋi pöndaŋ bauköm eŋgiba malma. Kungöra böhi qaqazu nup memapkö mötmöt kalemŋi waŋgiyök ewö, yaŋön mönö memburik-qemburikŋi qahö pöndaŋ tosatŋi kusum eŋgiba malma.

8 Kungöra uru naŋgönaŋgö nupkö mötmöt kalemŋi waŋgiyök ewö, yaŋön mönö pöndaŋ kapaŋ köla ambazip uruŋini kuŋguba naŋgöm eŋgiba malma. Tosatŋan yuaigöra mözöröŋgöba osigetka kungöra i naŋgöm eŋgimapkö mötmöt kalemŋi waŋgiyök ewö, yaŋön mönö koŋgwarakŋi qahö pöndaŋ naŋgöm eŋgiba malma. Kungöra galömkölköl nupkö mötmöt kalemŋi waŋgiyök ewö, yaŋön mönö zeŋ kinda tosatŋi galöm köl eŋgiba malma. Kungöra urukalem nupkö mötmöt kalemŋi waŋgiyök ewö, yaŋön nup mi mönö sösöŋgai qakŋe memba malma. Mewö.

9 Mönö geŋmoŋ mosöta törörök urukalem ak aŋguba malme. Bölöŋi sisit memba andö qeba malme. Ölöpŋaŋgöra ak eŋgiiga miaŋgöreŋ mönö qekötahöba malme. 10 Urumeleŋ alaurupŋini mi mönö guŋbönjönjöŋ qakŋe ak eŋgiba törörök jöpaköm aŋguba malme. Göda qem aŋgubingö kapaŋ kölakzei, miaŋgöreŋ mönö awöweŋgöba möpöseim aŋguba malme.

11 Uruŋinan mönö kude sörauba löwörimapmö, köulukögetka Uŋa Töröŋan inahöm eŋgiiga urukönöpnöŋ kinda Kembugö nup memba malme. 12 Jörömqöröm aka sösöŋgainöŋ malme. Kahasililiŋ möta mökösöŋda malme. Mönö böŋ kinda Anutu köuluköba malme. 13 Anutugö ambazip sarakŋan yuaigöra osizei, i mönö bauköm eŋgiba malme. Mönö ambazip köl öröm eŋgiba mohotŋe tata nene nem sösöŋgai ahakŋe.

14 *Mat 5.44; Luk 6.28Sesewerowero ak eŋgimakzei, ambazip mi mönö kude qesuahöm eŋgimemö, mönö Anutu köulukögetka kötuetköm eŋgimakŋa. 15 Söŋgaizei, yembuk mönö bauköba söŋgaime. Sahötzei, yembuk mönö bauköba sahötme. 16 *Qam 3.7Mönö urumohot ak aŋguba luainöŋ malme. Nanŋinaŋgöra mönö kude mötket öŋgöma. Jakbak-öraŋböraŋ kude akŋemö, ambazip eretŋi mönö ala ak eŋgiba malme. Nanŋinaŋgöra mötketka mötkutukutu ambaziwa maljeaŋgö dop kude akŋa.

17 Jinöŋ jibi, nuŋgunöŋ guhubi, aknöŋ aki mi kungöra kude akŋe. Ambazip körekŋan silik tosatŋi mieŋgöra mötketka ahakmeme ölöpŋi akzei, mi mönö kapaŋ köla memba malme. 18 Yuai kungöreŋ qahö qaköze ewö, mönö köhököhöi ahöm eŋgizawaŋgö dop kapaŋ köla ambazip körek yembuk luainöŋ malme.

19 *Dut 32.35Keu kun mi Buŋa Kimbinöŋ kewö ohoget ahöza, “Nöŋön mönö bölöŋaŋgö likepŋi meleŋbiga qakŋine öŋgöma. Mi nöŋgö nuwa. Kembu nöŋön mewö jizal.” Miaŋgöra wölböt alaurupni, iŋini nanŋinak bölöŋaŋgö likepŋi kude meleŋmemö, mi Anutugöra mosötketka irimŋan seholiiga eŋgö kitipŋi meleŋda meköm eŋgima.

20 *Qam 25.21-22Miaŋgöra mi nanŋinak kude meleŋmemö, Buŋa keu ki mönö wuataŋgöba malme, “Kerökan nenegö kömuza ewö, i mönö nene gumohom waŋgiman. Göhö kerökan ogö mötza ewö, i mönö o waŋginöŋga nema. Mewö aka göhöreŋ silik ölöpŋi miaŋön mönö uru kuŋgum waŋginöŋga gamuŋi möta mosötpawak.” Keu mi mönö wuataŋgöba malme. 21 Kunŋan silik bölöŋi miaŋön luhut al gihibapukmö, nangak mönö silik ölöpŋi aka miaŋön luhut al waŋgiba silikŋi bölöŋi mi koyoŋaniman. Mewö.