15
Mönö Kraistkö mötmötŋi wuataŋgöba malme.
1 Mötnaripninan köhöikŋi akzawi, neŋön mönö naninaŋgörök laŋ söŋgaiba nanini imbi-imbi malbinbuk. Tosatŋi yeŋgö mötnaripŋinan lölöwöröŋi aiga tötöpinpinöŋ köna oŋgita törörök qahö wuataŋgömakzei, neŋön i urukalem ak eŋgiba lömbötŋini bisimegö bauköm eŋgibin. 2 Nini mohot mohot mönö alaurup-ninan ölöwakŋeaŋgö dop mötmöriba ak eŋgimakin. Mewö ak eŋgiba uruŋini möhamgögetka köhököhöi miwikŋaime. 3 * Sum 69.9Kraistnöŋ mewöyök nanŋaŋgörök nanŋi imbi-imbi qahö söŋgaiba ahökmö, Buŋa keu kiaŋgö dop ak waŋgigetka malök, “Ambazip keu töhöreŋ jiba gi jim gihimakzei, yeŋgö keuŋinan mönö nuŋguiga sihimbölöŋi mörakzal.” Keu mewö ahöza.
4 Anutunöŋ neŋgöra sihimŋi kewö mörakza: Neŋön kapaŋ köla köhöiba kinda Buŋa Kimbi oyoŋninga urunini naŋgöiga mewö miaŋön jörömqöröm aka malbin. Miaŋgöra Buŋa keu pakpak mönöwök ohogeri, Anutunöŋ mönö miaŋgö dop kusum neŋgimamgö mötza. Miaŋgöra mi ohoget ahöza. 5 Anutunöŋ mönö nanŋak uruŋini naŋgöiga ölöp kapaŋ köla kin köhöime. Yaŋön mönö Uŋaŋi eŋgiiga inahöm eŋgiiga sutŋine uru jöhöjöhö aka Kraist Jisösgö mötmötŋi wuataŋgöba malme.
6 Mewö mala ölöp urumohot qakŋe numbuŋini mindiriba Anutu, Kembunini Jisös Kraistkö Iwiŋi mi möpöseiba malme. Anutunöŋ eŋön mewö aka malmegöra mörakza. Mewö.
Ölöwak Buŋanöŋ kantri tosatŋe anda kayök.
7 Kraistnöŋ iŋini möt aŋgön köla köyan köl eŋgimakzawi, miaŋgö dop iŋini mönö mewöyök köyan köl aŋguba malme. Anutugö qetbuŋaŋan sehimapköra mönö mewö aka malme. 8 Nöŋön keu ölŋi ki jimam: Anutunöŋ keuŋi keuŋi Juda könagesö neŋgö bömönurupnini yeŋgöra jiba jöhöyöhi, miaŋön ölŋambuk akŋapköra mörök. Miaŋgöra Kraist melaiiga Anutugö Buŋa keu ölŋan köhöimapköra aka Juda neŋgö sutnine eta welen qem neŋgiba malök. 9 * 2 Sml 22.50; Sum 18.49Juda nini welen qem neŋgiba malökmö, kantri tosatŋi yeŋön mewöyök yaŋgö ak-kömukömuŋi möta miaŋgöra Anutu möpöseiba malje. Miaŋgö keuŋi mi Buŋa Kimbinöŋ kewö ohoget ahöza,
“Miaŋgöra nöŋön kantri tosatŋi yeŋgö sutŋine mala möpöseim gihiba qetbuŋagan sehimapköra liŋet kölakŋam.”
10 * Dut 32.43Miaŋgö keuŋi kun mi kewö jiba ohoget ahöza,
“Anutunöŋ Juda nini möwölöhöm neŋgiiga könagesöŋi aka söŋgaimakzin. Kantri tosatŋi iŋini mönö nembuk toroqeba söŋgaiba köiraŋ ala malme.”
11 * Sum 117.1Miaŋgö keuŋi kun mi kewö,
“Kian kantrigö kambu pakpak iŋini mönö Kembu möpöseiba malme. Gölme dop maljei, iŋini mönö körek ‘Anutu saiwap!’ jiba liŋet köla malme.”
12 * Ais 11.10Kezapqetok azi Aisaia yaŋön mewöyök miaŋgö keuŋi kewö jii ahöza,
“Azi qetŋi Jesi yaŋgö andöjalöŋan mönö sötŋi jula wahöta ambazip gölme dop galöm köl eŋgima.
Mewö ak eŋgiiga jörömqörömŋini yaŋgöreŋ ala bauköm eŋgimapköra mamböta malme.”
Keu walŋi miaŋön mönö nalö kewöŋe ölŋambuk ahakza.
13 Uŋa Töröŋaŋgö ösumŋan mönö naŋgöm eŋgiiga jöröm-qörömŋinan köhöiba pöwöwöm akŋapköra mötzal. Miaŋgöra jörömqöröm Toŋi Anutu yaŋön mönö luai qem eŋgiba sösöŋgai pakpak miaŋön uruŋini kokolak qema. Mewö köuluköbiga ölöp Anutu möt narim waŋgiba oyaeŋkoyaeŋ akingö mamböta malme. Mewö.
Keu köhöikŋi mi denöwögöra ohozal?
14 O urumeleŋ alaurupni, nanak eŋgöra kewö möt köhöizal: Iŋini mönö tönpin qahö maljemö, Anutunöŋ yuai pakpak ölöpŋi uruŋine ali kokolak qeiga mötmöt könaŋi könaŋi miwikŋaiba miaŋön ölöp goro qeba kusum aŋgubinaŋgö dop akze. 15 Mewö akzemö, töndup keu mi ölum eŋgubapuköra möta mieŋgö könaŋini mi kunbuk köl gulim eŋgizal. Anutunöŋ kalem möriam niŋgiiga miaŋgö qakŋe kinjalaŋgöra mönö awösamkakak qakŋe keu köhöikŋi tosatŋi ohom eŋgizal.
16 Miaŋgö könaŋi kewö: Anutunöŋ kian kantri eŋön uruŋini meleŋgetka Uŋa Töröŋan mem sarahim eŋgimapköra mörakza. Mutuk jöwöwöl ohogetka köwakŋan öŋgöi Anutunöŋ söŋgaizapma, miaŋgö dop nalö kewöŋe Anutunöŋ ambazip gölme dop buŋaŋi aketka eŋgeka söŋgaimamgöra awöweŋgömakza. Miaŋgöra Ölöwak Buŋaŋi kantri tosatŋi yeŋgö sutŋine jim sehimamgö jiba nupŋi qakne aliga miaŋgö dop urugö nup galöm aka Kraist Jisösgö welenŋi qemakzal.
17 Miaŋgöra Kraist Jisösbuk qekötahöba kinda Anutugö nupŋi membiga qetbuŋa niŋgiiga sileni memba öŋgöba awösamkakak kinjal. 18 Kraistnöŋ kantri tosatŋi yeŋön Anutugö jitŋi tem kölmegöra möta sölölöhöba kuŋgum niŋgimakzawi, miaŋön mönö nam köl niŋgiiga keuni jiba ahakmemeni ahakzal. Keu tosatŋi laŋ jim sehisehigö awösamkakakŋi mi qahö ahöm niŋgiza.
19 Uŋa Töröŋaŋgö ösumŋan mönö nam köl niŋgiiga aŋgöletot aiwesök kukösumŋinambuk asuhuget. Nöŋön Jerusalem siti mosöta kantriŋi kantriŋi liliköba anda mala mala Yuropkö siti qetŋi Ilirikum miaŋgöreŋ aŋgoral. Mewö gölme dop liliköba Kraistkö Ölöwak Buŋa mi jim asarim eŋgim teköyal. 20 Kunöŋ tandö kuŋguiga kunŋan kaba nanŋi miriŋi miaŋgö qakŋe memba mönö keuŋambuk akŋa. Miaŋgö dop kunöŋ Kraistkö keuŋan mötnaripkö tandö lök kuŋgui kinöhi, nöŋön mönö kaba yaŋgö tandö qakŋe töndangöba kinda uruŋini toroqeba möhamgöba mem köhöim eŋgimamgö tököba malal. Urugö nup mutukŋi memba miaŋön aködamuni miwikŋaimamgö kapaŋ köla malal. Miaŋgöra ambazip denike yeŋön Kraistkö qetŋi qahö möta tönpin malgeri, nöŋön Ölöwak Buŋa yeŋgöra jim asarimamgö awöweŋgöba malal. 21 * Ais 52.15Miaŋgö keuŋi Buŋa Kimbinöŋ kewö ohoget ahöza,
“Denike yeŋön keuŋi qahö jiget mötkeri, yeŋön mönö mala i ekŋe. Denike yeŋön könaŋi mutuk qahö möta tönpin malgeri, yeŋön mönö mala mi möt asarime.”
22 * Rom 1.13Nup mewöŋan jöhöm niŋgiyöhaŋgöra mönö nalö dop eŋgöreŋ kamamgö osiba malal. Mewö.
Polnöŋ Rom anmamgö areŋi alök.
23 Mewö malalmö, liliköba urukuŋgukuŋgu nup mutukŋi memba gölme pakpak möt eŋgizini, miaŋgöreŋ mi mem teköba malal. Urugö nup mutukŋi memamaŋgö gölmeŋi mi nalö kewöŋe kunbuk qahö ahöza. Mewöyök iŋini eŋgekŋamgö sihimŋi möta malbiga yambu (yara) gwötpuk lök teköyök. 24 Miaŋgöra kantri qetŋi Spein anmami, miaŋgö könaŋe mönö eŋgöreŋ kamamgö areŋi ala eŋgekŋamgö jörömqöröm aka kewö mötzal: Eŋgeka embuk sösöŋgai aka borom kun köisirik tatpiga bauköm niŋgigetka ölöp köna toroqeba Spein anmam.
25 * 1 Kor 16.1-4Mewö mötzalmö, nalö kewöŋe Jerusalem sitigö könagesö sarakŋi naŋgöm eŋgibingöra miaŋgöreŋ anmam. Miaŋgöreŋ andagun eŋgöreŋ kamam. 26 Masedonia aka Akaia prowins yahöt mietkö urumeleŋ könagesö kambuŋi kambuŋi yeŋön mönö Jerusalem sitigö ambazip sarakŋi bauköm eŋgibingö keu jöhöget. Anutugö ambazip sarakŋi wanapŋi maljei, mönö yeŋgöra keu jöhöba naluk gwötpuk ketaŋi ala mindirigetka mi membagun anda eŋgimam.
27 * 1 Kor 9.11Mewö akingö uru sösöŋgai möta keu jöhöba mindimindiri naluk ketaŋi mi alget. Mewö almegö tosa ahöm eŋgiiga algetka ölŋa dop kölja. Anutunöŋ Juda könagesö kötuetköm neŋgimamgö keuŋi jii ahöiga kötumötuet miaŋön kian kantriŋi kantriŋi dop köla qakŋine öŋgöi malje. Miaŋgöra kian kantri yeŋgöreŋ tosa ahöiga likepŋi meleŋda kalemŋinan Juda könagesögö wanapŋi bauköm eŋgigetka dop kölja. 28 Nöŋön kalem mi memba anda böröŋine albi nupni miaŋön teköiga miaŋgö andöŋe eŋgömosöta kusukŋanök eŋgöreŋ kaba eŋgekagun toroqeba Spein anmam. 29 Eŋgöreŋ kamami, nalö miaŋgöreŋ mönö Kraistkö kötumötuetŋi mi körek memba kaba eŋgimam. Mewö möt yaközal.
30 O urumeleŋ alaurupni, nöŋön Kembu Jisös Kraistpuk qekötahöba kinda kewö uru kuŋgum eŋgizal: Uŋa Töröŋan jöpaköba naŋgöm eŋgimakzawaŋgö dop mönö nöŋgöra Anutu köuluköba malme. Aum-mörimakzali, miaŋgöreŋ mönö uruka-lemŋinan bauköm niŋgiba malme.
31 Judia prowinsnöŋ anda ambazip Kraistköra yaŋgiseŋ ahakzei, yeŋgö böröŋine gebileŋbuköra mönö Anutugö köulukögetka sel jöhöm niŋgibawak. Mewöyök naluk kalem ketaŋi memba Jerusalem anda ambazip sarakŋi yeŋgö böröŋine albiga dop köli sihimŋi mötmegöra mönö köuluköba malme. 32 Mewö köulukö-getka Anutunöŋ sihimŋi mötza ewö, nöŋön mönö sösöŋgai qakŋe eŋgöreŋ kaba embuk köisirik tata körö-ölöwak qem niŋgigetka malmam. 33 Luai Toŋi Anutu yaŋön mönö körek embuk kinma. Keu mi ölŋa.