1 Alanini Fibi (Foibe) yaŋön Senkria urumeleŋ könagesögö nup meme ambia akza. Yaŋön Rom eŋgöreŋ kamawi, i köyan kölmegöra mönö qesim eŋgiba böröŋine aljal. 2 Yaŋön ambazip gwötpuk aka ni mewöyök bauköm neŋgiba malök. Miaŋgöra Anutugö ambazip sarakŋan alaurupnini köl öröm eŋgimakzini, miaŋgö dop Fibinöŋ kaiga i mönö Kembugö qetŋe köuluköba köl öröm waŋgime. Eŋgöreŋ kaba yuai kungöra osibawak, miaŋgöreŋ mönö bauköm waŋgime.

3 *Apo 18.2Awanömyahöt Prisila aka Aqila Kraist Jisösbuk kinjahori, neŋakyahötni yetköra mönö nöŋgöreŋ yaizökzökni jigetka mötmahot. 4 Yetkön mönö nöŋgöra aka malmalŋiri köleŋda kömumbitkö ahot. Nöŋönök qahö möpöseim etkizalmö, kantri tosatŋe urumeleŋ könagesö kambuŋi kambuŋi yeŋön mönö mewöyök yetköra saiwap jimakze.

5 Urumeleŋ könagesö miriŋire tokomakzei, yeŋgöra mewöyök mönö nöŋgö yaizökzökni jigetka mötme. Eisia prowinsnöŋ nup membiga ölŋi mutukŋan asuhuiga Epainetus yaŋön uruŋi meleŋda Kraistkö buŋa ahöhi, wölböt alani yaŋgöra mönö nöŋgöreŋ yaizökzökni jigetka mötma. 6 Marianöŋ eŋgöra aka nup ketaŋi memba malöhi, yaŋgöra mönö nöŋgöreŋ yaizökzökni jigetka mötma. 7 Andronikus aka Junias tinitosolomyahötni yetkön mutuk Kraistköreŋ qekötahöyohotka nöŋön yetkö andöŋire uruni meleŋbiga miaŋgö andöŋe nömbuk kösö mire malin. Aposol yeŋön yetköra mötketka sutŋine öŋgöŋgöŋi akzahot. Yetköra mönö nöŋgöreŋ yaizökzökni jigetka mötmahot.

8 Wölböt alani Ampliatus Kembubuk kinjawi, yaŋgöra mönö nöŋgöreŋ yaizökzökni jigetka mötma. 9 Neŋaknini Urbanus Kraistpuk kinjawi aka wölböt alani Stakis yetköra mönö nöŋgöreŋ yaizökzökni jigetka mötmahot. 10 Apeles Anutunöŋ esapesap waŋgiiga dop köli Kraistpuk qekötahöba kinjawi, yaŋgöra mönö nöŋgö yaizökzökni jigetka mötma. Aristobulusbuk miri mohot maljei, yeŋgöra mönö nöŋgöreŋ yaizökzökni jigetka mötme. 11 Tinitosolomni Herodion yaŋgöra mönö nöŋgöreŋ yaizökzökni jigetka mötma. Narsisusbuk Kembu qekötahöba miri mohot maljei, yeŋgöra mönö nöŋgöreŋ yaizökzökni jigetka mötme.

12 Trifina aka Trifosa ambi yahöt mietkön nup ketaŋi memba Kembubuk kinjahori, yetköra mönö nöŋgöreŋ yaizökzökni jigetka mötmahot. Wölböt ambi alani Persis yaŋön Kembugöra nup keta bölökŋi memba maljawi, yaŋgöra mönö nöŋgöreŋ yaizökzökni jigetka mötma. 13 *Mak 15.21Rufus yaŋön Kembugö nupŋi ölöp kötökŋi memakzawi aka yaŋgö namŋi nalö dop ni tok nahönŋi ewö köyan köl niŋgiba malöhi, yetköra mönö nöŋgöreŋ yaizökzökni jigetka mötmahot.

14 Asinkritus, Flegon, Hermes, Patrobas, Hermas aka urumeleŋ alaurup tosatŋi yembuk maljei, yeŋgöra mönö nöŋgö yaizökzökni jigetka mötme. 15 Filologus, Julia, Nereus nenŋambuk aka Olimpas aka ambazip sarakŋi tosatŋi pakpak yembuk maljei, yeŋgöra mönö nöŋgöreŋ yaizökzökni jigetka mötme.

16 Urumeleŋ alaurup sutŋine mönö aŋgum aŋguba nemböŋini suhuba jölöŋini jiba malme. Kraistkö urumeleŋ könagesö pakpak yeŋön mönö yaizökzökŋini algetka eŋgöreŋ kaza. Mewö.

17 O urumeleŋ alaurupni, nöŋön uruŋini kewö kuŋguba jizal: Ambazip tosatŋan uru mendeŋmendeŋ asuhumapkö nam kölakzei, yeŋgöra mönö je galöm mem aŋguba malme. Urumohotkö silik ölöpŋi kusum eŋgigetka mötzemö, keu mi qetala kösawöraŋ keu tosatŋi miaŋön uruŋini kuŋgugetka bölii qaköba erakze. Ambazip mewöŋi mi mönö eŋgömosöta tikep malme. 18 Ambazip mewöŋan mönö nanini Kembunini Kraistkö nupŋi qahö memakzemö, nanŋini sihimŋinaŋgö dop asuhumapköra tuaköpek jiba nanŋini welen qem aŋgumakze. Kelök keu ölöpŋi ölöpŋi nahömŋambuk jiba ambazip geŋmoŋini qahö yeŋgö uruŋini kuŋguba tilipköm eŋgimakze.

19 Iŋini Ölöwak Buŋa tem köla wuataŋgömakzei, keu mi körek neŋgö kezapnine geiga mötzin. Miaŋgöra nöŋön eŋgöra aka önöŋi qahö söŋgaimakzal. Mewö akzalmö, iŋini kewö aka malmegöra mötzal: Mönö bölöŋi akingö mötkutukutuŋini mosötketka etma. Ölöpŋi akingö mötkutukutuŋini mi mönö pöndaŋ köl guliba mem qarime. 20 Luai Toŋi Anutu yaŋön mönö Satan ösumok töjöjahöi eŋgö bapŋine eri köiraŋ köla söŋgaiba malme.

Kembunini Jisösgö kalem möriamŋan mönö embuk ahöma.

21 *Apo 16.1Nöŋgö neŋakni Timoti yaŋön mönö yaizökzökŋi ali eŋgöreŋ kaza. Nöŋgö tinitosolomurupni Lusius, Jeison aka Sosipater yeŋön mewöyök yaizökzökŋini algetka eŋgöreŋ kaza.

22 Tertius nöŋön Polgö keuŋi möta kimbi ki ohozali, nöŋön mewöyök Kembubuk kinda yaizökzökni albiga eŋgöreŋ kaza.

23 *Apo 19.29; 1 Kor 1.14; 2 Tim 4.20Gaiusnöŋ miriŋi jim teköi malbiga urumeleŋ könagesö pakpak yeŋön mewöyök ki kaba tokogetka nene köisirik al neŋgimakzawi, yaŋön mönö yaizökzökŋi aliga eŋgöreŋ kaza. Erastus yaŋön siti pomŋaŋgö ofis uruŋe takis moneŋ galöm kölakzawi aka urumeleŋ alanini Qartus yetkön mönö yaizökzökŋiri alohotka eŋgöreŋ kaza. 24 Kembunini Jisös Kraistkö kalem möriamŋan mönö embuk ahöma. Keu mi ölŋa.

25 Ölöwak Buŋa keu ölŋi mi möpŋaŋgö möpŋeyök mala kotketka miaŋgöreŋ tölapŋe ahöyök. Mewö ahöiga Jisösnöŋ eta indela jim asariiga möta jim sehimakzal. Buŋa keu miaŋgö dop Anutunöŋ mönö köhöiba mötnaripŋini mem köhöiiga ölöp zeŋ kin köhöime. Miaŋgöra neŋön mönö Anutugö qetbuŋaŋi möpöseininga sehimakŋa.

26 Mutuk Buŋa keu ölŋan asa-asambötŋe ahöba korökmö, nalö kewöŋe kezapqetok ambazip kulem ohoget ahözawaŋgö dop mönö aukŋe asuhuyök. Anutunöŋ nalö dop mala kota teteköŋi qahö mal öŋgömawi, yaŋön ambazip kambuŋi kambuŋi neŋön urunini meleŋda Buŋa keu möt nariba tem köla malbingöra mötza. Miaŋgöra nup kewö membingö jim kutum neŋgiyök, “Iŋini mönö anda gölme dop liliköba Buŋa keu jim asariba malme.” Keu miaŋgö dop neŋön Buŋa keu mi ambazip kambu pakpak mötmegöra jim asariba malin.

27 Anutu nanŋök mötkutukutu Toŋi akzawi, neŋön mönö Jisös Kraistkö qetŋe yaŋgö qetbuŋaŋi möpöseininga nalö teteköŋi qahö aködamunŋambuk ahöm öŋgöba ahöma. Keu mi ölŋa.