1 A Hanu Kiripiripi i ta kavakava i ta maea, muri ma, na nilobona parava ta ge valai, i ranga e huriki bara ri ha taroa a Vure. Lakea bara ri vakatubu ni muri mai a ngava taminga i valai ne huriki a hanitu. 2 A maka ngava taminga nga, e huriki a bakovi na taminga bara ri tamilalu ni tovo polo ne huriki, ta i muholi. A niluhoi ne ria i marogo kesi, i uka ma ri hatakia a naro hale ne ria. 3 *Vuh 9:3; Rom 14:6; 1Ko 10:30-31Ri tovo e huriki nahea ri gi parangi, nahea ri gi kani a kania ranga. Pali a Vure i ratarike lobo a kania si gi kani. I ngaru hita e huriki si luhoi torea, si lohoka na ngava muholi, si gi kani si gi kavurikea. 4 A ta maea, a vuhuna si lohoka vona, a maki lobo a Vure i ratarike i kamumu. Nahea si gi taki ge hale. Si gi kavurikea a Vure, si gi bole. 5 Si gi rata mavonga, a vuhuna a nitana Vure turana nivasileki ne hita i rata a maki ni kani lobo i kamumu.

6 Ioe bara o taki e huriki a turane hita vona a maka ngava nga, bara ioe a vora kamumu ne Isu Kristo. Ioe bara o longo mai a nitana Vure, a ngava muholi, ra o ramai, bara o koru rike kamumu. 7 *1Tim 1:4Naha ni longo mai a maka nuverei tavula na malala. O toni a bulumu, o koru rike na narona Vure. 8 O lohoka vona, a bakovi i rehi na rihiva i ngarua a kakaina ge gao. Bara i tovo mule a kakaina ge gao. Ra nitovo iea bara i tuhori popote a viri. Pali a viri i tovo mulea ge ramai a narona Vure, bara i tuhori mule hatekea. Bara i habi a maki kamumu vona ngane koea na malala, muri ma meli na hunu.

9 A ngava nga i muholi hateka, e huriki ri gi longoa ri gi longo maia. 10 *1Tim 2:3-4Lakea si luhoi torea a Vure mahuri, ra viri i korimule e huriki, re huriki ri luhoi torea. I mavonga, si gi rura, si gi leho hateka.

11 A maka ngava nga, o vakuku e huriki, o tovo ria. 12 *Tit 2:15Na matane huriki a tara na Vure iene, o vakasiri ria a naro kamumu na ngavamu, na rabumu, na hini o ngaru hateka e huriki, na hini o luhoi torea a Vure, na hini i uka ma o rata kilala a naro hale. Ri gi matai ioe, ri gi ngaru ni ramai a naromu. Lakea i uka ma ri gi tepu ioe na hini ioe a riau. 13 O gi tala a Hinere ne huriki, ri gi longoa. O vara e huriki, o tovo e huriki. Muri ma bara valai. 14 *2Tim 1:6Naha ni mata taroa a maki kamumu a Vure i habi tavulea vomu na tahuna e huriki a gare na lotu ri ru langa a limane ria vomu, ri habi a nita propet vomu.

15 O rata vakaroro a maki nga, o habi a hatemu ne ria, lakea e huriki lobo bara ri matai ioe o koru rike na naro na Vure. 16 O matakari kamumu a naromu. O matakari kamumu a ngava o tovo e huriki vona. Ioe bara o rata mavonga vakaroro, bara o korimule ioe turana e huriki ri longo a ngavamu.