1 Mua o huriki a hategu, a ngava nga a Vure i ta muholi ne hita. I mavonga, si gi lohopile a maka rabu hale ri vakakatoki a kakaine hita, a hanune hita. Si gi mangenge na Vure, si gi bele malamala.

2 Mu ngaru iau na hatene mua. I uka ma a rata halea tara viri. I uka ma a vakahalea tara viri. I uka ma a tamia tara viri ga bole a moni vona. 3 A ngava iea a takia, i uka ma a padi virihi mua. A taki pali mua, mua a hategu. Bara si made palupu, bara si mate palupu. 4 A ta kavakava ne mua, i uka ma a mangenge. A vivi hateka ne mua. Na tahuna a luhoi mule mua, a niluhoi iea i luke iau. Na tahuna a bole a maregoa, a vivi hateka a vuhuna a luhoi mua.

5 *2Ko 2:13Na tahuna a bele na tabeke ne Masedonia, i uka ma a malo ranga. Na tanga lobo a lakea vona e huriki ri rata tuhare iau. Pali iau tara, a loho pae pae. 6 Pali a Vure i vakatora vakaroro a niluhoi ne huriki, i vakatorea a niluhoi nau na tahuna e Titus i bele. 7 E Titus tara i vakalongo iau ne mua, i taki iau vona a hini mu vakatorea a niluhoi vona. Na tahuna i ta mavonga, i vakatora tabua a niluhoi nau. I taki iau ne mua ta mu pasimata ni matai iau, mu kilu vona a maka maregoa mu vakabele. E Titus i vakalongo iau ne mua, mu ngaru hateka ni ramai a nitagu. Na tahuna i vakalongo iau vona a maka ngava nga, iau a vivi hateka. 8 *2Ko 2:4A raukea muga a here lakene mua i rata mua mu dodo, pali i uka ma a kilu vona a raukea a herea. I muholi a kilu popote muga. Pali a matakilaka vona na tahuna mu gia a raukea iea, mu dodo na parava popote kunana. 9 Ngane a vivi. I uka ma a vivi vona a hini mu dodo. A vivi a vuhuna a nidodo i rata mua mu pulo a vilone mua. A nidodo ne mua i valai na Vure, lakea i uka ma a vakamarego mua.

10 *Mat 27:3-5; Hib 12:16-17Na tahuna a viri i dodo na rabu hale vona ge manga a hini a Vure i ngarua ge rata, bara i pulo a vilona, i bole a nimahuri vakaroro. I uka ma ge kilu vona. Pali a viri i dodo na nidodo na malala, i uka ma ge pulo a vilona, i uka ma ge bole a nimahuri vakaroro. Bara i mate. 11 Mu dodo na nidodo i valai na Vure, lakea i rata mua mu ngaru hateka ni vakasiri manga i uka ma mu tahoka a ngava vona a nimava iea. Mu tahate kamumu vona a maregoa i vakabele a bakovi iea. Mu mangenge hateka na maki i ratea. Mu ngaru hateka ni matai iau. Mu vakamadihi kamumua ra viri i vakabelea a maregoa iea. A maki lobo mu rata, mu vakasiri manga mu uka ngava vona a maki iea. 12 Ra raukea a here mugea, a herea i uka ma ga pelekado a viri i rata a naro hale, o ga kori a viri ni rata virihi na naro hale vona. A here lakene mu gu matakilaka vona na matana Vure manga mu togo iau. 13 Na naro iea mu vakatorea a niluhoi nau. Mu vakatorea a niluhoi ne Titus, lakea na tahuna i valai koea, a masia i vivi hateka, lakea iau tara a vivi. 14 Hosi a vakalongoa e Titus a bibi rike hateka mua. Muri i vano i made turane mua, i uka ma a maruhu. A ngava a takia i muholi, i manga a ngava lobo a taki mua vona i muholi kunana. 15 Ngane e Titus i ngaru hateka tabu mua, a vuhuna i luhoi mule a hini mu longototo ia, mu taguia, mu togoa. 16 Ngane a vivi hateka, a vuhuna a lohoka hateka ne mua, mu rata a maki lobo a Vure i ngaru.