1 Na tahuna iea a hariki e Herod*E Herod Agripa e tubune hariki Herod, ra viri i matakari na tahuna e Isu ni poda. i vakatubu ni ratapile e huriki a tara ne Kristo. 2 I rabalakia na bainat e Iakop, e tukane Ioanes. 3 Na tahuna i matai e huriki a Iuda ri vivi vona a naro i ratea, i lakavua e Petrus. I ratea a naro iea na Habu na Bret i Uka Is. 4 I ru dilia na bavi, i ru ia na limana nugumaheto ala ravulu a polona i polotara, ri gi tagaria. E Herod i ngaru ni dava ge lobo taro a habu na Nipagepolo, muri ge vakapesia na matane huriki, ni gi pelekado. 5 E Petrus i made na bavi, pali e huriki a tara ne Kristo ri vasileki na Vure na parava lobo, ge koria.

6 Na rodo muga na parava e Herod ta ge bole talea e Petrus ni gi pelekado, e Petrus i mahita na koropalana a nugumaheto ala rua. Ri kolotatea na sen i rua. E huriki a nugumaheto ranga ri tagari na logo na bavi. 7 A agelo ne Bakovi Dagi i bele vakaturutu tabukoi ne Petrus, a nipara dagi i parai a bavi. A agelo i ubia na kamagane Petrus, i vangoa, i ta maea, “O pesi rike malaviriri.” Lakea a sen i maparu tala na limane Petrus.

8 Muri a agelo i takia, i ta maea, “O rodo a varakia, a vahapolo vomu.” Lakea e Petrus i rata mavonga. Muri a agelo i takia, i ta maea, “O kavitagu ioe vona varakia ola vomu, o muri nau.” 9 Lakea e Petrus i muri vona, ru pagitala na bavi. Pali i uka ma i lohoka vona ge muholi a maki i ratea a agelo. I pahaluhoi ta i vurena kunana. 10 *Apo 5:19Ru vano, ru laho polo vona a tagari. Muri ru laho polo vona tabu a tagari tara. Muri ru bele na poridala ni rata na aen i pagitala lakea na tanga dagi. A logo na poridala i mata ka tavula muga, lakea ru pagitala. Na tahuna ru laho basi popote pali na dala, a agelo i marakavelu vona.

11 Na tahuna e Petrus i matakilaka vona a maki i bele vona, i ta maea, “Ngane a lohoka vona e Bakovi Dagi i rudua a agelo vona i valai, i korimule iau na limane Herod, i korimule iau na maka naro e huriki a Iuda ri luhoi ta ri gi rata virihi iau vona.”

12 Lakea na tahuna i matakilaka vona a hini i uka ma i vurena, i vano maia a ruma ne Maria, e kinane Ioanes, a rana tara e Markus, ta ge matai e huriki ri vapopo, ri vasileki vonga. 13 Na tahuna i bele na ruma, i tutulidi. A vora ngatavine i valai, a rana e Roda, ta ge matai a viri i tutulidi. 14 Na tahuna i longokilalea a lohone Petrus, i vivi hateka, i longokaburungi ni talea a logo. I nunu hamule, i vakalongo e huriki, i ta maea, “E Petrus i pesi polovavo!”

15 Pali ri takia, ri ta maea, “Ioe a manga!” Pali i ta kinigao mai ria ta e Petrus muholi. Pali ria ri taki ia, ri ta maea, “Ma ga agelo vona.”

16 Pali e Petrus i tutulidi mavonga polovavo. Na tahuna ri talea a logo, ri turutu vona. 17 Pali e Petrus i totokari ria na limana, nahea ri gi ta. Muri i vakalongo ria vona e Bakovi Dagi i tuli tala navia na bavi. Muri i taki ria, i ta maea, “Mu vakalongo e Iakop turana e huriki ranga ri luhoi torea e Kristo, mu vakalongo ria na maki i bele nau. Muri i pe ria, i lakea na tabeke tara.

18 *Apo 5:22-24Na hatelanga e huriki a tagari ri turutu, ri luhoi legelege hateka vona e Petrus i uka ma ia vonga. 19 Muri e Herod i longoa e Petrus i ha na bavi, lakea i taki e huriki ri gi matakanea, pali i uka ma ri matavisia. Lakea i nana kado e huriki a tagari, pali ri keri ni ta, lakea i vakuku ni gi rabalaki.

Muri e Herod i pea e Iudea, i lakea o Sisaria ta ge made popote vonga.

20 E Herod i madihi a hatena vona e huriki na tanga e Tair e Sidon. Lakea e huriki nga ri vadili vapopo, ri puru, ri gi masia. Na tahuna ri bele vonga, ri ta taro turana e Blastus, a bolekori tara ne Herod, ri takia ge pesi turane ria. Muri ri lakea ne Herod, ri takia ri ngaru ni made turana na nivalemu, a vuhuna a maki ni kani lobo ne ria, ri bole na robo i matakari e Herod.

21 Na parava ni ru ri gi ta turana, e Herod i bagetu na varakia na hariki, i made na gula hariki vona, i habi a ngava ne huriki. 22 Lakea e huriki ri gale tala, ri ta maea, “Ra bakovi dagi i ta ta, i uka ma a bakovi tavula. Ia a vure!” 23 *Dan 5:20Malaviriri kunana a agelo ne Bakovi Dagi i rabalakia, a vuhuna i uka ma i kavurikea a Vure. I rike vona a gilanga dagi, i kania a maka mata kiroko, i mate.

24 *Ais 55:11Pali na parava lobo e huriki ala kupo ri longo a nitana Vure, ri luhoi torea.

25 *Apo 11:29-30; 15:37Na tahuna iea e Barnabas e Saulus ru vakalobo a leho ne rua o Ierusalem, ru turea e Ioanes, a rana tara e Markus, to hamule sike o Antiok.