1 *Gi 21:4E Moses i tabana ni vara, i ta maea, “Muri si ngalakapulo, si hamule lakea na malala golea, si ramaia a dala lakea na Dari Vururu. Si ramai kunanea a ngava e BAKOVI DAGI i taki hita vona pali. Si laho viliha na parava i kupo na lolo na robo e Idom.

2 “Muri e BAKOVI DAGI i taki iau, i ta maea, 3 ‘A parava i kupo mu laho halui a maka lolo nga. Ngane mu laho sike.’ 4 *Vuh 36:8I taki iau ga taki mua vona a nita vakalohoka iea, ‘Ngane bara mu laho polo na maka lolo ne Idom, ra malala ne huriki a viri ne mua, ra kabune Esau. Bara ri mangenge ne mua, 5 pali mua naha ni rata tuhare ria. A vuhuna iau i uka ma ga habia ne mua tara tabekena malala ne ria. Ra robo e Idom a habia na kabune Esau. 6 Mu kona kunana a maki ni kani a naru vona a robo iea, mu vano.’

7 “E BAKOVI DAGI a Vure ne hita, i rata lobo a maka maki ne mua ri bele kamumu. I matakari kamumu mua na tahuna mu laho na malala golea na pida i ravulu va, i made turane mua i uka ma mu bala vona tara maki.

8 “Muri si laho tabu si polotaroa a malala na kabu ne Esau, si pahapidea a dala i vakatubu na tanga e Elat e Esion-Geber i lakea na Dari Mate. Si kau marogo, si lakea na malala golea na robo e Moab.

9 *Vuh 19:37 “Lakea e BAKOVI DAGI i taki iau i ta maea, ‘Naha ni rata hale e huriki a Moab, re huriki nga, e huriki a hamone Lot. Naha ni rata a vabinga ne ria, a vuhuna a habia ne ria a tanga e Ar. Iau i uka ma ga habi ne mua tara tabekena malala ne ria.’

10 “(A kabune Emim ri made vona hosi a tanga e Ar. Re huriki nga ri ala kupo, ri gao hateka, ri ola manga e huriki a Anak. 11 Ri manga e huriki a Anak lakea ni gale ria, ria e huriki a Repaim, pali e huriki a Moab ri gale re huriki nga, a Emim. 12 Hosi e huriki a Hori ri made o Seir, pali e huriki a hamone Esau ri ratapile ria ri bolea a robo ne ria ri made vona. Muri e huriki a Israel ri rata manga e huriki a Esau ri bolea a robo e BAKOVI DAGI i habia ne ria.)

13 “Muri e BAKOVI DAGI i ta maea, ‘Mu pesi rike mu tulupoloa a naru e Sered.’ Lakea si tulupoloa a naru. 14 *Gi 14:28-35Muri na pida i ravulu tolu a polona i polotolu (38), na tahuna si pe e Kades-Barnea i valai i harena na tahuna si tulu poloa a naru e Sered, e huriki a bakovi na vabinga ri tababana ni mahuri vona a tahuna iea, ria lobo ngane ri mate pali. I ramaia a ngava e BAKOVI DAGI i taki. 15 Muholi hateka, e BAKOVI DAGI i tahoka a rongova dagi ne ria, lakea i vakalobo liu ria.

16 “Muri ne huriki a bakovi na vabinga ri mate lobo pali, 17 e BAKOVI DAGI i taki iau, 18 ‘Mona bara mu laho polo na kurukuruna malala ne huriki a Moab na dala lakea o Ar. 19 *Vuh 19:38Na tahuna mu tabukoi vona a malala ne huriki a Amon re huriki a hamone Lot, naha ni ratea tara maki ge rata ria ri gi tahate o mu gu vakatubu a vabinga ne ria, a vuhuna iau a habia pali ne ria a malala iea, i uka ma ga habia ne mua tara tabekena malala ne ria.’

20 “(Ra malala iea, ni taki ta malala ne huriki a Repaim, a vuhuna hosi ri made vona a tabeke iea. Pali e huriki a Amon ri gale re huriki nga, ria e huriki a Samsum. 21 Ria ranga ri koru ola manga e huriki a Anak. Ri ala kupo ri gao hateka. Pali e BAKOVI DAGI i vakalobo ria. Lakea e huriki a Amon ri bolea a malala ri made vona. 22 I manga kunana a naro e BAKOVI DAGI i ratea ne huriki a hamone Esau, ra ri made ngane na maka lolo ne Idom. E BAKOVI DAGI i vakalobo e huriki a Hori, lakea e huriki a Idom ri bolea a malala ne ria ri made vona. 23 Ri manga kunana e huriki a Kaptor na bodu e Krit ri vakalobo e huriki a Avim, ra ri made tabukoi na dari i vano i harena tano o Gasa. Ri bolea a malala ne huriki a Avim ri made vona).

24 “Si pe mulea e Moab, lakea e BAKOVI DAGI i taki hita i ta maea, ‘Mu malaga mu tulupoloa a naru e Arnon. Ngane ga rua na limane mua a bakovi o Amor e Sihon, a hariki ne Hesbon, turana a malala vona. Mu pesi rike mu vaubi vona mu bolea a malala vona. 25 Mona ga rata e huriki na tanga lobo ri gi mangenge hateka ne mua. Na tahuna ri longo a rane mua bara ri mangenge hateka ne mua.’

26 “Na tahuna mu made na malala golea ne Kedemot, a rudu ranga vinuru ri lakea na hariki e Sihon o Hesbon. 27 Ri lokovonga ri bele, lakea ri takia ri ta maea, ‘Ioe go longo ne mia, mi gi laho polo vona a robo vomu? Mi gi ramai kunana a rosi. 28 I uka ma mi gi bole tavula a maki ni kani a naru. Bara mi kona. Mi ngaru ni laho polo kunana vona a robo vomu, 29 mi gi tulu poloa a naru e Iordan, mi gi bele vona a malala e BAKOVI DAGI a Vure ta ge habia ne mia. E huriki a hamone Esau ri made na robo e Idom, e huriki a Moab ri made na tanga e Ar, ria lobo ri longo ne mia mi gi laho polo na robo ne ria.’

30 “Pali a hariki e Sihon o Hesbon i uka ma i longo ne hita si gi laho polo vona a robo vona. A vuhuna e BAKOVI DAGI a Vure ne hita i rata ia i uka ma i longo mai hita, i ngarua ge habia na limane mua, mu gu bole poloa a malala vona.

31 “Lakea e BAKOVI DAGI i taki iau, ‘Iau a vakatubu ni habia na limane mua a hariki e Sihon turana a maka malala vona. Mu bolea a malala iea mu made vona.’

32 “Muri e Sihon i bele turane huriki a tara vona ri gi vaubi turane hita, tabukoi na tanga e Iahas. 33 Lakea e BAKOVI DAGI, a Vure ne hita, i tuhori hita si rabalakia, turana e huriki e tuna bakovi, a tara na vabinga vona. 34 Na tahuna iea kunana si bole lobo a tanga vona si ratapile. Si rabalaki lobo e huriki a bakovi, a ngatavine, a koma, i uka tara viri ge mahuri. 35 Si bole a maka sipsip a bulmakau, turana a maki lobo na maka tanga. 36 E BAKOVI DAGI a Vure ne hita i tuhori hita si ratapile a maka tanga, i vakatubu na tanga e Aroer, tabukoi na naru e Arnon, na tanga i pesi na gagana naru, i vano i harena na robo ne huriki a Gilead. I uka tara nure ge tora hateka na tanga nga, ge rege mule hita. 37 Pali e BAKOVI DAGI a Vure i ta kari hita, nahea si gi lakea tabukoi na malala ne huriki a Amon, o na naru e Iabok, o na maka tanga ri pesi na lolo.”