1 E Moses i tababana ni vara, i ta maea, “Muri si ngalakapulo si sike na tabeke meli na dala lakea na robo e Basan, lakea a hariki e Og i valai turana e huriki a nugumaheto vona ri gi vaubi ne hita tabukoi na tanga e Edrei. 2 Lakea e BAKOVI DAGI i taki iau i ta maea, ‘Naha ni mangenge vona, a habia pali na limane mua, turana e huriki a tara vona, a maka malala vona lobo. Bara o rata kunanea vona a naro o rata virihi e Sihon a hariki o Amor i matakari o Hesbon.’

3 “Lakea e BAKOVI DAGI i habia na limane hita a hariki e Og o Basan turana e huriki a tara vona, lakea si rabalaki lobo ria. 4 Na tahuna iea si bole lobo a maka tanga, i uka ma si bole kalevea tara. Si bole na robo e Argob a tanga i ravulu polotara (60). Re Argob a robo na hariki e Og. E Og i made na tanga e Basan i matakaria a robo iea. 5 Ra maka tanga nga ri tahoka a nure-kedo ni tura halui ria vona, ri tora hateka, a maka nitukari ne ria ranga ri tora hateka. A maka tanga kiroko i kupo ri uka a nure-kedo. 6 Si ratapile liu a maka tanga, si rabalaki e huriki a bakovi, a ngatavine, a koma. Si rata kunanea a naro i manga a hini si rata virihi a hariki e Sihon vona, na tanga e Hesbon. 7 Pali si bole lobo a maka bulmakau a sipsip, a mahala vona a maka tanga nga.

8 “Na tahuna iea kunana si bole a malala ne Sihon e Og, ra hariki ne Amor. Ra tabekena malala nga ri tabuli na nirikena haro na naru e Iordan, i vakatubu na naru e Arnon na tabeke tano i vano i harena o Hermon na tabeke meli. 9 Pali e huriki a Sidon ri galea ra lolo e Hermon, e Sirion. E huriki a Amor ri galea e Senir. 10 Si bole lobo a maka tanga ri tabuli na bila na lolo, si bole a maka robo ne huriki a Gilead a Basan, i vano i harena na tanga e Saleka e Edrei. Ra maka tanga nga ri tabuli na malala na hariki e Og.

11 “A hariki e Og, ia a nilobona a hariki ne huriki a Repaim. A kiri vona ni rata na aen. A niolana kiri iea i va a mita vona, a nibolana i rua a mita vona. Ra kiri iea i tababana na tanga e Raba na robo e Amon.

12 “Na tahuna si bole pali a maka tanga nga, a habi ne huriki a kabu ne Reuben ne Gad ra malala i vakatubu na tanga e Aroer, tabukoi na naru e Arnon. A habia ne ria tabu a tabekena malala tara na lolo na robo e Gilead, turana a maka tanga ne ria. 13 A habi lobo tabu na kalavana kabu ne Manase a malala e Gilead e Basan. Hosi e Basan i matakaria a hariki e Og. Ra tabeke ne Argob o Basan, hosi a malala ne huriki a Repaim. 14 Muri e Iair, a hamone Manase, i bole loboa a malala ne Argob, iea o Basan. Ra malala iea i vano i harena na robo e Gesur e Makat. Lakea i vunu mule na rana a tabeke iea, a maka tanga ne Havot-Iair.

15 “Iau a habia ne huriki a Makir a malala e Gilead. E huriki a Makir a hamone Manase. 16 A habi tabu na kabu ne Reuben, na kabu ne Gad a malala i vakatubu na robo ne huriki a Gilead i vano i harena na naru e Arnon. A harena malala na tabeke tano i vano i harena vona a naru iea. A malala ne ria na nirikena haro, i vano i harena na naru e Iabok. Ra naru e Iabok, ia a harena robo e Amon. 17 Na tabeke na nirolona haro a nagi na robo ne ria i harena na naru e Iordan. Na tabeke meli a harena i vakatubu na darilomu e Galili i vano i harena na Dari Mate na tabeke tano, tabukoi na lolo e Pisga, tabukoi na nirikena haro na Dari Mate.

18 *Ios 1:12-15 “Na tahuna iea, a vakuku mua a ta maea, ‘E BAKOVI DAGI a Vure ne hita, i habia ne mua pali a malala iea i tabuli na nirikena haro na naru e Iordan, mu gu made vona. Ngane e huriki a bakovi ne mua ri gi bole a maki na vabinga, ri gi tulu poloa a naru e Iordan, ri gi tuhori e huriki a Israel ri gi bolea a malala iea. 19 E huriki e girihine mua, e tune mua, ri gi made vona a maka tanga a habi ne mua. A lohoka vona mu tahoka a maka sipsip a bulmakau i kupo, pali ria ranga ri gi dava taro na tanga. 20 Mu tuhori e huriki a turane mua, ge harena na tahuna ri bolea a malala e BAKOVI DAGI a Vure ne hita ge habi ne ria, na tabeke na nirolona haro na naru e Iordan. Mu made turane ria, ge harena na tahuna e BAKOVI DAGI ge vakamade ria kamumu na malala iea, i manga a hini i rata ne mua. Muri mu hamule mai a robo a habi ne mua pali.’

21 “Muri a takia e Iosua a ta maea, ‘O matai pali a maki e BAKOVI DAGI a Vure ne hita i rata na hariki e Og, na hariki e Sihon. A naro i taku kunana bara i rata ne huriki a hariki ranga mu vaubi ne ria, mu bole a malala ne ria. 22 Naha ni mangenge ne ria, e BAKOVI DAGI a Vure ne hita, ia kunana bara i tuhori mua, i vaubi polo ne mua.’

23 *Gi 27:12-14; Vin 32:48-52 “Na tahuna iea a vasileki tora hateka, a ta maea, 24 ‘Bakovi Dagi, ioe a Vure muholi, a lohoka vomu o tubu ni vakasiri iau na maka maki dagi bara o rata. E rei a vure tabu ge made na hunu o na malala ge rata a maka maki dagi o rata pali? 25 Iau a ngaru ioe go longo nau ga tulu poloa a naru e Iordan ga lokovonga na tabeke tara, ga masia ra malala i kamumu hateka ni varo a maka maki ni kani vona, a maka tanga kamumu na lolo turana a lolo e Lebanon.’

26 “Pali e BAKOVI DAGI i uka ma i longo maia a nivasileki nau, a vuhuna mua kunana mu ratea e BAKOVI DAGI i tahate, i uka ma i longo mai iau. Lakea i ta maea ‘Naha ni ta, ma go nana iau tabu vona a maki o nana vona. 27 O sike na mapana lolo e Pisga, o mata sike, o mata puru, o mata lakea na nirikena haro, o mata lakea na nirolona haro. O matai kamumu a hini nga, a vuhuna ioe i uka ma go tulu poloa a naru e Iordan, go dili vona a malala iea. 28 O matai kunanea pali a malala. O vakukua e Iosua o vakatorea a niluhoi vona, ge muga e huriki ri gi bole a malala ge ne vone ria.’ 29 Lakea si made na maloku tabukoi na tanga e Bet-Peor.”