1 *Apo 13:19E Moses i ta tabu i ta maea, “Na tahuna e BAKOVI DAGI a Vure ne hita, ge taparaki mua vona a malala mu gu bolea, bara i lili tala e huriki a tara ri made vona ngane. Na tahuna mu laho lokovonga na malala iea, bara i lili tala e huriki a tara dagi i polorua, a nigao ne ria i rangi a nigao ne mua. Re huriki a Hiti, a Girgas, a Amor, a Kenan, a Peres, a Hivi, a Iebus. 2 Na tahuna e BAKOVI DAGI a Vure ne hita ge tuhori mua, mu ratapile ria, mu rabalaki lobo ria. Naha ni rata a ngava dagi turane ria, naha ni dodo ria. 3 Naha ni vangoli a ngatavine turane ria, 4 a vuhuna bara ri turari e huriki e tune mua ri vano basi ne BAKOVI DAGI, bara ri kavurike a maka vure ne ria. E huriki a koma bara ri rata mavonga, e BAKOVI DAGI bara i madihi a hatena ne mua, bara i malaviriri kunana i ratapile mua. 5 *Vin 12:3Na tahuna mu bolea a malala ne ria, mu ratapile a maki na lotu ne ria. Mu puka a maka dede, mu ubikeve a maka butu-kedo, mu ubiputu a hanune Asera, a vure ngatavine, mu rungani a maka hanuna vure ne ria. 6 *Nim 19:5; Vin 4:20; 14:2; 26:18; Tit 2:14; 1Pe 2:9Mu rata mavonga, a vuhuna e BAKOVI DAGI a Vure ne hita i tabea a kabu ne mua ge vona kunana. A Vure i vulaki mua na kurukurune huriki lobo na malala, ge mua a ngate vona.

7 “Mua, i uka ma mua a tara dagi, ge rangi e huriki a tara ranga, lakea e BAKOVI DAGI ge luhoi mua, ge vulaki mua. Mua a tara kiroko kunana. 8 Pali e BAKOVI DAGI i ngaru hateka mua, i ngaru ni ramaia a nikaba i ratea ne huriki a gare ne hita. Na ngava iea kunana, i tuhori mua na nitora dagi vona, na tahuna mu leho manga a vorakato o Egipto, i bole mule mua na limane Parao, ra hariki o Egipto. 9 *Nim 20:5-6; 34:6-7; Gi 14:18; Vin 5:9-10Mu luhoi kamumua a maki iea. E BAKOVI DAGI a Vure ne hita, ia kunana a Vure muholi. I muri mai a nitana vakaroro, bara i ramai a nita muholi vona. A ngava dagi na ningaru na Vure i rata virihi e huriki ri ala rangale (1,000) ri ngarua ri ramai a vinara vona. 10 Pali bara i koli i ratapile e huriki i uka ma ri ngarua. 11 I mavonga mu ramai kamumu a maka nita mu bole pali, mu ramai kamumu a vinara a habi ne mua ngane.

12 *Vin 11:13-17 “Na tahuna mu longo a vinara nga mu ramai muholi, e BAKOVI DAGI a Vure ne hita bara i ramai a ngava dagi muholi vona, lakea bara i ngaru vakaroro mua, i manga a ngava i kaba vona ne huriki a gare ne mua hosi. 13 Bara i ngaru hateka mua, i rata kamumu mua, bara mu tahoka e huriki e tune mua ri ala kupo, ri vakabele e huriki a hamone mua ri ala kupo. Bara i rata kamumu a maka hania ne mua, bara mu tahoka a vit, a vain, a namona oliv. Bara i vakavole a maka bulmakau a sipsip. Bara i habi lobo ne mua a maka maki na robo iea, ra i ta muholi vona ne huriki a gare hosi ge habi ne mua. 14 I uka ranga viri na malala a Vure ge habi kupo a maki ne ria, ge manga a hini i rata virihi mua vona. E huriki a ngatavine a bulmakau ne mua, i uka ma ri gi lame, bara ri poda. 15 E BAKOVI DAGI bara i matakari kamumu mua, i uka ma mu gu bole a gilanga legelege. I uka ma ge rudu valai a maka gilanga hale, ra mu matai ne huriki a Egipto, ge bele ne mua. Ra gilanga nga bara i rata ri bele ne huriki a pile ne mua. 16 Mu vakalobo liu e huriki e BAKOVI DAGI a Vure ne hita i ru na limane mua, naha ni dodo ria. Naha ni kavurike a vure ne ria. Mua bara mu kavurike a vure ne ria, bara mu vurua.

17 “Naha ni luhoi e huriki nga ge ria a tara bulolo, i uka ma mu kara ni ratapile ria. 18 Naha ni mangenge ne ria. Mu luhoi mule ra maki nga e BAKOVI DAGI a Vure ne hita i rata virihi a hariki o Egipto turana a tara vona. 19 Mu luhoi mule a maka gilanga hale hateka mu matai ri bele o Egipto. Mu luhoi mule a maka nivakasiri a maka leho dagi e BAKOVI DAGI a Vure ne mua i rata. Mu luhoi mule ra leho dagi hateka a Vure i rata, ge bole mule mua o Egipto. A Vure bara i rata virihi ne huriki nga ra mu mangenge ne ria, ra naro i taku. 20 Pali na tahuna i ranga ne ria ri ha ri kapiloho, bara i rudu a maka vuvu ri gi vano ri gi kani ria. 21 Naha ni mangenge ne huriki a tara nga, a vuhuna e BAKOVI DAGI a Vure ne hita i made turane mua. I tahoka a nitora lobo, e huriki lobo ri gi mangenge vona. 22 Bara i lili tala gosigosi e huriki a tara nga na tahuna mu lokovonga tabukoi. Naha ni ratapile malaviriri ria. Na tahuna mu rabalaki malaviriri ria, a maka livoa hateka na robo bara ri bele kupo, ri rabalaki mua. 23 E BAKOVI DAGI a Vure ne mua ge tuhori mua mu gu ratapile e huriki a pile ne mua. Bara i rata ria ri mangenge hateka, ge harena na tahuna mu vakalobo ria. 24 E huriki a hariki ne ria ranga, bara i ru na limane mua. Mu rabalaki ria, muri e huriki i uka ma ri gi luhoi tabu ria. I uka tara viri ge tangotata mua, bara mu rabalaki lobo ria. 25 Mu rungani a maka vure ne ria ni kau na kedo. Naha ni ngutu ni bole a maka gol a silva, ra ni vakabagetu a vure ne ria vona, a vuhuna ri muma hateka ne BAKOVI DAGI a Vure ne mua. 26 Naha ni bole dili na ruma ne mua a maka maki ri muma hateka. A Vure i taki a maki nga ni gi ratapile, pali mua bara mu bole, bara mu tahoka a vuranga turane ria. Ra vure ne ria, ri muma hateka, mu ngalahere ne ria.”