1-2 E huriki a Israel ri mariu tala o Repidim ri vano. Na mugana parava na toluna keva na tahuna ri pe e Egipto, ri bele na tabeke i ngeki ne Sinai, ri rata a mada tabukoi na lolo.

3 Muri e Moses i sike na lolo ge taguia e BAKOVI DAGI, lakea a Vure i galea, i takia, “O vakalongo e huriki a hamone Iakop, ra kabu ne Israel, vona a maka ngava nga. 4 Mu matai a maki a rata pali ne huriki a Egipto. A boko mua manga a loha i boko e tuna na karapana, a taparaki valai mua koea. 5 *Vin 4:20; 7:6; 14:2; 26:18; Tit 2:14*1Pe 2:9Mua bara mu longo mai iau, mu ramaia a ngava dagi nau, bara vulaki mua ge mua a tara nau. A maki lobo, e huriki lobo na malala, ria ranga ne nau. 6 *Kap 1:6; 5:10A ngaru mua mu gu made malamala, ge mua e huriki a viri nau, mu gu rata a leho manga a prister. Ra ngava nga o vakalongo e huriki a Israel vona.”

7 E Moses i pea a lolo, i puru, i gale palupu e huriki a gare ne Israel, i taki ria vona a ngava lobo ne BAKOVI DAGI. 8 Ri ta palupu ri ta maea, “Mi gi rata a maki e BAKOVI DAGI i taki.” Muri e Moses i vano, i taki e BAKOVI DAGI vona a ngava ne huriki ri taki.

9 Lakea e BAKOVI DAGI i takia e Moses, “Iau ga made na bubu dagi ga valai vomu. E huriki ri gi longo iau a ta turamu, bara ri luhoi vakaroroa a nitamu i muholi.” Muri e Moses i taki e BAKOVI DAGI vona a maka ngava i taki e huriki.

10 E BAKOVI DAGI i takia e Moses, “O vano o taki e huriki, mona, kuduvi ri gi taki tala a naro hale ne ria, ri gi loi na naru a maka varakia ne ria. 11 Girira na toluna parava ri gi dava iau, ga puru valai na lolo e Sinai, ria lobo ri gi matai iau. 12 *Hib 12:18-20O ru haluia na lolo a nagi, o taki ria nahea a viri ge pagepoloa, ge sike na mapana lolo. A viri ge pagepoloa a nagi iea, bara ni rabalaki. 13 Pali nahea ni gi ubi na lima. Ni gi padimate na kedo o na maheto. A bakovi o a sipsip a bulmakau ge pagepoloa a nagi iea, i uka ma ge mahuri. I tahoka a parava bara mu sike valai na lolo, na tahuna mu longo a tavure i sidi.”

14 Lakea e Moses i pe a lolo, i puru i taki e huriki ri gi loi a varakia ne ria, ri gi pelekado ria, ri gi kavurikea a Vure. 15 Muri e Moses i taki ria, “Mu kisi puru mua, ge vakatubu mona ge harena girira. Naha ni mahita turana a ngatavine.”

16 *Kap 4:5*Vin 4:11-12Na hatelanga na toluna parava, a bubu i kururu i pelaka, i maravila lae, i kavitagua a lolo. A tavure i tangi dagi hateka. E huriki ri made na mada ri mangenge hateka. 17 Muri e Moses i tuli tala ria na mada, ri pesi na dahana lolo, ri taguia a Vure. 18 A lolo e Sinai i vuruke, a pokona kanono i kavitagua, a vuhuna e BAKOVI DAGI i puru valai turana a kanono dagi i made pololilo vona. 19 A nangina tavure i tangi dagi hateka. Muri e Moses i ta turana Vure. A bubu i kururu i pelaka. E Moses i longoa a Vure i ta pololilo na bubu i koli a nitana. 20 Muri e BAKOVI DAGI i puru na mapana lolo, i galea e Moses i valai vona. Lakea e Moses i sike na lolo. 21 Lakea e BAKOVI DAGI i takia, “O puru o taki tora e huriki, nahea ge ruru a vurene ria ri gi polo taroa a nagi, ri gi valai ri gi matai iau. A viri ge polotaroa a nagi iea ge matai iau, bara i mate. 22 E huriki a prister ra ri valai tabukoi nau, ria ranga, ri gi pelekado ria, ri gi valai tabukoi na matagu. Ge uka bara a ratapile ria.”

23 E Moses i takia e BAKOVI DAGI, “E huriki i uka ma ri gi sike valai na lolo e Sinai, a vuhuna o habi tora a ngava ne ria nahea ri gi sike valai. O taki iau ga ru halui a nagi na lolo, ga vakalongo ria vona ra tabeke ni ru halui a nagi vona o tabea pali.”

24 E BAKOVI DAGI i koli, i ta maea, “O puru o takia e Aron, ge sike valai turamu. Pali e huriki a prister, a bakovi a ngatavine nahea ri gi polotaroa a nagi, ri gi sike valai nau. E rei i longotaro a ngava bara ratapilea.”

25 Lakea e Moses i puru i vakalongo e huriki.