5
A Raukea, a Tuna Sipsip
1 *Ais 29:11; Ese 2:9-10Muri a matai a viri i made na gula hariki, i nugu na limana a kanena a raukea ola ni pilu. A raukea iea ni here a ngava na ngalana, na bitona varago. Ni tango kapi na tabeke i polorua na buluka na kadel. 2 Muri a masia a agelo hateka i gale tala dagi, i nana maea, “E rei a bakovi kamumu, i kara ia ge laga vuroki a buluka na kadel ni tango kapi a raukea iea, ge vevea?” 3 Pali i uka tara viri meli na hunu, o na malala, o polotano na malala ge kara ia ge vevea a raukea iea, ge masia. 4 Lakea a vakatubu ni tangi dagi, a vuhuna i uka tara viri ge kamumu, ge kara ni vevea a raukea iea, ge masia. 5 *Vuh 49:9; Ais 11:1,10; Kap 22:16Pali tara ne huriki a nupesi nga i taki iau, “Naha ni tangi. O mata lakea! A viri ni gale a Laion na kabu ne Iuda, ra Hamone Davit, i mulangi. Ngane i kara ia ge laga vuroki a buluka na kadel i polorua, ra ri kapi karia a raukea, ge vevea.”
6 *Sek 4:10; Ion 1:36; Kap 13:8Muri a masia a Tuna Sipsip, i mata manga ni rabalaki pali. I pesi na kurukuruna gula hariki, e huriki a maki mahuri i va. E huriki a nupesi ri pesi haluia. I tahoka a tupina i polorua, a matana i polorua, ra hanuna Vure i polorua ni rudu tala na tabeke lobo na malala. 7 A Tuna sipsip i laho lakea, i bolea a raukea iea na limana kanena viri i made na gula hariki. 8 *Sng 141:2; Kap 8:3-4I bole loboa a raukea iea, muri a maki mahuri i va, turana e huriki a nupesi ala ravulu rua a polona i va, ri tabuli puru na ngalana Tuna Sipsip. Ria lobo ri nugu a hap*A hap i manga popote a gita. turana ulo ni rata na gol ri vona a havu mangisipa. A havu iea a maka nivasileki ne huriki a tara na Vure. 9 *Sng 33:3; 40:3; 96:1; 98:1Lakea ri kaloloa a linge karaba, ri kalolo maea,
“Ioe kunana, i kara ioe go bolea a raukea iea,
go laga vuroki a buluka ni pipikari vona,
a vuhuna ni rabalaki ioe, a daramu i konamule e huriki a bakovi a ngatavine, ri gi ne vona a Vure.
O kona tala ria na kabu lobo na malala, a tabele lobo na malala, a kuli lobo na malala, na robo lobo na malala.
10 *Nim 19:6; Ais 61:6; Kap 1:6; 20:6O rata ria ri bele manga a harikia, a prister na Vure ne hita.
Ri gi matakari na malala.”
11 *Dan 7:10; Hib 12:22Muri a mata lakea, a longo a lohone huriki a agelo ala kupo, ala kupo hateka, ni keri ni gi! Ri pesi halui a gula hariki, a maka maki mahuri, e huriki a nupesi, 12 ri gale tala dagi, ri ta maea,
“E huriki lobo ri gi kavurikea a Tuna Sipsip, ra ni rabalaki!
Ri gi matakilaka vona a nitora dagi vona, a mahala dagi vona, a lohokanga vona, a harikianga vona!
Ri gi togoa, ri gi vakabagetua, ri gi kavurikea!”
13 Muri a longo a maki mahuri lobo na hunu, a maki mahuri lobo na malala, polotano na malala, pololilo na dari, ria lobo ri ta maea,
“A viri i made na gula hariki, turana Tuna Sipsip,
si gi vakabagetu, si gi togo, si gi kavurike vakaroro rua!”
14 A maki mahuri i va ri ta maea, “I muholi!” Lakea e huriki a nupesi ri tabuli puru, ri kavurike rua.