1 Na tahuna a Tuna Sipsip i laga vuroki a poloruana buluka ni pipikari a mapiluna raukea vona, e huriki na hunu ri mangaulu tata, i uka ma ri ta, i harena na minit i 30. 2 Muri a matai a agelo ala polorua nga, ra ri pepesi na ngalana Vure. Ni habi ne ria a tavure i polorua. 3 *Nim 30:1-3; Kap 5:8A agelo tara i valai, i pesi tabukoi na dede na nihabi. I nugu a ulo ni rata na gol. Ni habi vona a havu mangisipa i kupo ge habi turana maka nivasileki ne huriki a tara na Vure, ge habi na dede na nihabi, ra ni rata na gol, i pesi na ngalana gula hariki. 4 A pokona mangisipa, turana maka nivasileki ne huriki a tara na Vure, ru malaga rike na limana agelo, ru sike na matana Vure. 5 *Nim 19:16-19; Levi 16:12; Kap 11:19; 16:18Muri, a agelo i bolea a ulo iea, i tahonia na kanono na dede na nihabi. I voro purua na malala, lakea i kururu i pelaka, i maravila, a vuruke i pulua a malala.

6 Muri a agelo i polorua, ra ri nugu a tavure i polorua, ri dava ni vaki.

7 *Nim 9:23-26; Ese 38:22; Jol 2:30A agelo muga i vakia a tavure vona, lakea a vala kedo*A vala kedo a ais, i boru valai na hunu i manga a kedo. turana kanono, a dara, ni voro puru na malala. A maka maki ni nagi na tabeke i tolu. A tabekena malala i taku, a tabekena kai i taku ni gutu na kanono, i lobo. A varili lobo na malala i nono lobo liu.

8 A ruana agelo i vakia a tavure vona. Lakea a maki tara i manga a lolo dagi i nono ni voro puru na dari. 9 A maka maki ni nagi na tabeke i tolu. A tabekena tara na dari i mapulo i manga a dara. A tabeke tara na maka maki mahuri na dari ri mate. A maka sip ranga, a tabeke tara ne ria ri mabubu.

10-11 *Jer 9:15A toluna agelo i vakia a tavure vona. A maka naru ni nagi na tabeke i tolu. Lakea a hada dagi tara ni gale e Vingungu, i huvi dagi, i mapasi tala na hunu, i puru na tabekena tara na maka naru, a naru bele. Lakea a maka naru ri mapulo, ri vagole. Lakea e huriki ala kupo ri mate a vuhuna ri ninu a naru vagole iea.

12 *Ese 32:7; Kap 6:12-13A agelo i va i vakia a tavure vona. Muri a haro, a keva, a maka hada ni ubi, lakea a nipara ne ria i puru.†⅓ i manga a nipara ne ria ni ru na nagi i tolu, lakea a nagi tara ni ratapile, i uka ma i para. A haro, a rodo, ranga, ni ratapile. Na haro, i uka ma i para a haro na tahuna ranga. Na rodo, a keva a hada i uka ma ri para na tahuna ranga.

13 *Kap 9:12; 11:14Muri a masia a loha, i bebe polo meli, i gale tala dagi, i ta maea, “A vuranga! A vuranga! A vuranga i popote ge bele ne huriki ri made na malala na tahuna a agelo i tolu, ra to tabana, to go vaki a tavure ne tou!”