1 *Kap 9:1Muri a matai tabu tara agelo, i pea a hunu, i puru valai. I nugua a ki na lovo i marangeo turana sen dagi. 2 *Vuh 3:1; Kap 12:9I puru valai, i lakavua a Mata Dagi, ra mata i laho paru hosi, ra hanitu, e Satan. I lakavua, i kolotatea ge tabuli na pida i ravulu rangale (1,000). 3 I voro purua na lovo i marangeo, i tukari tahoa, i uka ma ge tami tabu e huriki, ge vano ge harena na tahuna a pida i ravulu rangale ge lobo. Muri na pida nga, bara ni puga, ge laho na parava popote kunana.

4 *Dan 7:9,22,27; 1Ko 6:2; Kap 13:17Muri a matai a maka gula hariki. E huriki ri made ne ria, a Vure i habi a leho ne ria, ri gi pelekado a narone huriki. A matai tabu a hanune huriki a bakovi. E huriki nga ri taki tala a ngava ne Isu, a nitana Vure, i uka ma ri kavurikea e Livoa, o a hanuna, i uka ma ri bole a kilakila vona na dumene ria, na limane ria, lakea ni palakudu a lohone ria. Ngane ri mahuri mule, ri matakari turane Kristo na pida i ravulu rangale. 5-6 *Kap 1:6Iea a mugana nimahuri mule na matenga. E huriki ri mahuri mule muga ri malamala, a Vure i vakabagetu ria, a vuhuna a ruana matenga i uka ma ge ratapile ria. Ge ria e huriki a prister na Vure, a prister ne Kristo. Ri gi matakari turana na pida i ravulu rangale. Pali e huriki ranga i uka ma ri mahuri mule ma. A pida i ravulu rangale ge lobo taro, muri ri gi mahuri mule.

7 Na tahuna a pida i ravulu rangale i lobo, e Satan ni gi puga, ni gi vakaha na bavi vona. 8 *Ese 38:2,9,15-16Bara i pagitala valai, i tami e huriki lobo na tabeke lobo na malala, re huriki a Gog, a Magog. Bara i gale valai ria, ri gi vapopo, ri gi vaubi. Ri ala kupo hateka, ni keri ni gi, i manga a hire na lavu. 9 *2Ki 1:10Ri laho na bila dagi na malala, ri pesi halui a mada ne huriki a tara na Vure, na tanga dagi a Vure i ngaru hatekea. Pali a kanono i mapasi tala na hunu, i gutu parina e huriki a nugumaheto nga, ri lobo. 10 *Sng 11:6; Kap 19:20; 21:8Lakea a hanitu, ra viri i tami e huriki nga, ni voro puru na darilomu na viku, a kanono, muga a nitamina propet turana e Livoa, ni voro puru vonga. To go bole a nimadihi dagi na haro, na rodo, na parava vakaroro, i uka nilobona.

11 Muri a masia a gula hariki keakea dagi, i made vona tara viri. A malala a hunu ru ha taroa, i uka ma ni matai tabu. 12 *Dan 7:9-10; Mat 25:31-46; Apo 17:31; 2Ko 5:10; Kap 13:8Lakea a matai e huriki ri mate pali, re huriki a bakovi dagi, e huriki a bakovi tavula, ria lobo ri pesi na ngalana gula hariki. A maka buk ni veve. A buk tara tabu ni veve, ra buk na nimahuri. Ni pelekado a narone huriki lobo ri mate pali, i ramai a ngava ni here na buk nga, ra a maka narone ria ri rata hosi na malala. 13 *Rom 2:6; 1Pe 1:17; Kap 2:23; 22:12E huriki ri mate na dari, ri mahuri mule na matenga. E huriki ri mate pali, ri made na murine huriki ri mate pali, ri pesi rike mule na matenga, lakea ni pelekado ria takutaku, i ramai a narone ria ri rata na malala. 14 Muri, a matenga, a muri ne huriki ri mate pali, ni voro puru na darilomu na kanono. A naro iea ni gale a ruana matenga, a darilomu na kanono. 15 E rei a viri, a rana i uka ma i tabuli na buk na nimahuri, ni voro puru ria na darilomu na kanono.