1 *Luk 12:35; Kap 19:7 “Na tahuna iea a harikianga na hunu bara i manga a sirula ala ravulu ri bole a lam ne ria, ri vano ri gi tagui a bakovi i parangi karaba. 2 A sirula ala lima ri manga manga, pali a sirula ala lima ri lohoka. 3 E huriki a sirula manga manga ri bole a lam, pali i uka ma ri bole a karasin. 4 E huriki a sirula ri lohoka ri guru na ulo a lingena karasin, ri bole turana lam ne ria. 5 A bakovi i parangi karaba i uka ma i valai malaviriri, lakea e huriki a sirula ri matatulu, ri mahita. 6 Na kuru rodo ngane, a bakovi tara i gale tala, i ta maea, ‘A bakovi i parangi karaba i valai ngane! Mu valai mu tagui ia!’

7 “Lakea ri hadongo, ri kisi a lam ne ria. 8 E huriki a sirula manga manga ri nongi a karasin ne huriki a sirula lohoka, ri ta maea, ‘Mu habi ne mia ranga karasin. I para hoho a lam ne mia.’

9 “Pali ri koli ria, ri ta maea, ‘I uka. A karasin i uka ma i kara hita lobo. Mu vano mu lakea ne huriki ri habi a karasin, mu kona ranga ge ne mua.’

10 “Na tahuna ri vano ri gi kona a karasin, a bakovi i parangi i bele. Lakea e huriki a sirula, ra ri tahoka a karasin a lam ne ria, ri dili turana na habu na parangia. Muri a logo ni tukari.

11 *Luk 13:25-27 “Muri e huriki a sirula manga manga ri hamule valai, ri ta maea, ‘Bakovi dagi! Bakovi dagi! O talea a logo!’

12 *Mat 7:23 “Pali a bakovi dagi i koli, i ta maea, ‘Muholi hateka, i uka ma a lohoka ne mua.’

13 *Mat 24:42 “I mavonga, mu mamata, a vuhuna i uka ma mu lohoka vona a parava o a kilala e Bakovi Dagi ge valai vona.

14 “Mu mamata, a vuhuna na tahuna a Tuna Bakovi ge hamule valai, bara i manga a bakovi tara i havai. I gale palupu e huriki a vora vona, i vakasiri tou vona a mahala vona to go matakari. 15 *Rom 12:6I vaveru ne tou a moni, i muri mai a lohokanga ne tou. I habi na vora tara moni gol i 5,000. I habi na vora tara moni gol i 2,000. I habi na viri tara moni gol i 1,000. Muri i vano, i havai. 16 A viri i bole a moni gol i 5,000 i vano, i rata a leho vona, i vakabele tabu a moni gol i 5,000. 17 A viri i bole a moni gol i 2,000 i vano, i rata a leho vona, i vakabele tabu a moni gol i 2,000. 18 Pali a viri i bole a moni gol i 1,000 i keli a malala, i tanu vonga a moni na bakovi dagi vona.

19 “I tabaka ngane, a bakovi dagi i hamule valai, i pelekado turane tou a moni i habi ne tou muga. 20 A vora i habi a moni gol i 5,000 vona i bole valai tabu a moni i 5,000, i ta maea, ‘Bakovi dagi. Ra moni i 5,000 o habi nau, ngane a vakabele tabu a moni i 5,000.’

21 *Mat 24:45-47; Luk 16:10 “Lakea a bakovi dagi i koli, i ta maea, ‘Kamumu hateka. Ioe a vora kamumu. O rata kamumu vakaroro a leho lobo a habi vomu! Ngane go matakari a maki ge kupo, a vuhuna o matakari kamumu a leho kiroko iea. O valai o vivi turagu!’

22 “A vora i bole a moni i 2,000, ia tara i valai, i ta maea, ‘Bakovi dagi, ra moni i 2,000 o habi nau, a vakabele tabu a moni i 2,000.’

23 “Lakea a bakovi dagi i koli, i ta maea, ‘Kamumu hateka. Ioe a vora kamumu. O rata kamumu vakaroro a leho lobo a habi vomu! Ngane go matakari a maki ge kupo, a vuhuna o matakari kamumu a leho kiroko iea. O valai o vivi turagu!’

24 “Muri a vora i bole a moni i 1,000 i valai, i ta maea, ‘Bakovi dagi, a lohoka vomu ioe a bakovi hateka. O mirio na hania i varo e huriki ranga. 25 Lakea a mangenge, a kelia a malala, a tanu vonga a moni vomu i 1,000. O mata valai, a moni vomu nga.’

26 “A bakovi dagi i koli, i ta maea, ‘Ioe a vora hale, ioe a malai! O lohoka vona iau a mirio na hania i varoa e huriki ranga. 27 Pali i navai i uka ma o ru dili na roho na tava a moni nau? Na tahuna a hamule valai, bara bole mule turana a moni ranga ni ru langa tabu vona.

28 “Muri a bakovi dagi i ta maea, ‘Mu bole mulea vona a moni i 1,000, mu habi na viri i tahoka a moni i 10,000. 29 *Mat 13:12; Mrk 4:25; Luk 8:18Mu rata mavonga, a vuhuna a viri i tahoka a maki pali bara ni habi tabu ranga, ge tahoka a maki i kupo. Pali e rei a viri i uka ma i tahoka a maki, a maki popote vona i tahoka pali bara ni bole hamule vona. 30 *Mat 8:12; Luk 13:28Mu bolea a vora hale iea, mu voro talea na uvo. Ra hini nga, e huriki ri gi haloho, i vaheri mavonga a ngine ria, a vuhuna i madihi a hatene ria.’

31 *Mat 16:27; 19:28Muri e Isu i ta maea, “Na tahuna a Tuna Bakovi ge luve turana nipara dagi, ge valai turana e huriki a agelo vona, bara i made na gula hariki vona. 32 *Ese 34:17; Kap 20:11-13E huriki na tanga lobo bara ri pesi na matana. Bara i vakalipida e huriki na tara i rua, i manga a matakari na sipsip i vakalipida a maka sipsip, a meme. 33 Bara i ru na limana a kanena e huriki a sipsip. Bara i ru na limana a maurina e huriki a meme. 34 Muri a Hariki bara i taki e huriki ri pesi na limana a kanena, ‘Mu valai, mua e huriki e Tata i vakabagetu mua. Mu bolea a harikianga, ra ni rata puru ne mua na tahuna i ratarike a hunu a malala. 35 *Ais 58:7Mu bolea a harikianga, a vuhuna hosi na tahuna a vitolo mu habi a maki ni kani nau. Na tahuna a marohu mu habi a naru nau. Na tahuna iau a mosi mu tagui iau. 36 Na tahuna a uka maki ni rodo, mu habi a varakia nau. Na tahuna a giloa mu matakari iau. Na tahuna a dili na bavi mu valai mu gosi iau.’

37 “Muri e huriki a bakovi a ngatavine malamala bara ri nanea, ‘Bakovi Dagi, garika mi matai ioe o vitolo mi vakani ioe? Garika o marohu mi habi a naru vomu? 38 Garika mi matai ioe o made manga mosi mi tagui ioe? Garika mi matai ioe o uka a varakia, mi habi a varakia vomu? 39 Garika mi matai ioe o giloa, o dili na bavi mi vano mi gosi ioe?’

40 *Snd 19:17; Mat 10:42; Mrk 9:41 “A Hariki bara i koli, i ta maea, ‘A taki muholi mua, a ra maki mu rata virihi e huriki a turagu matasia vona, mu rata virihi iau.’

41 *Mat 7:23 “Muri bara i taki e huriki ri pesi na limana a maurina, i ta maea, ‘Mu ha nau. A Vure i ruduraha mua. Mu vano, mu puru na kanono i nono vakaroro. Ra kanono iea, ni tunu puru ge puru vona e Satan turana e huriki a agelo vona, re huriki a hanitu. 42 Hosi na tahuna a vitolo i uka ma mu vakani iau. Na tahuna a marohu i uka ma mu habi a naru nau. 43 Na tahuna iau a mosi, i uka ma mu tagui iau. Na tahuna a uka varakia i uka ma mu habi a varakia nau, ga rodo. Na tahuna a giloa, a dili na bavi i uka ma mu gosi iau.’

44 “Muri ria ranga bara ri nanea, ‘Bakovi Dagi, garika mi matai ioe o vitolo, o marohu, o uka murina ni mahita, o uka varakia, o giloa o dili na bavi, lakea i uka ma mi kori ioe?’

45 “E Bakovi Dagi bara i koli, i ta maea, ‘A taki muholi mua, a maki i uka ma mu rata virihi e huriki a turagu matasia vona, i uka mu rata virihi iau vona.’

46 *Dan 12:2; Ion 5:29 “Muri bara ri vano, ri bole a nimadhi vakaroro. Pali e huriki ri malamala bara ri bole a nimahuri vakaroro.”