12
Si Gi Habi Mule Hita na Vure
1 *Rom 6:11,13; 1Pe 2:5I mavonga, mua e huriki a turagu, a ngaru mu gu habi mule mua na Vure, ge manga a nihabi mahuri, a vuhuna a Vure i dodo hateka mua. Mu habi mule mua na Vure ge manga a nihabi malamala a Vure ge vivi vona. I kamumu mu gu rata mavonga, a vuhuna a Vure i kori hateka mua. 2 Nahea mu gu laho manga a bakovi na malala. Mu takia a Vure ge pulo a niluhoi ne mua, mu gu lohoka vona a ningaru na Vure, lakea bara mu matakilaka vona a ningaru na Vure, a ra maki i kamumu, a ra maki i ngaru mu gu ratea.
3 *Epe 4:7; Pili 2:3A Vure i rata kamumu iau, i rata iau a apostolo vona. I mavonga, a taki mua, nahea tara viri ge luhoi ta ia a bakovi dagi hateka. Mua lobo mu pelekado mule mua, mua a bakovi navai, i ramai a hini a Vure i habi ne mua takutaku a hini mu gu luhoi tora navia e Kristo. 4 *1Ko 12:12,27A kakaine hita i tahoka a tabekena i kupo. A maka tabekena kakaine hita takutaku ri tahoka a leho legelege ne ria. 5 I mavonga kunana a tara ne Kristo. Hita a tara ne Kristo, si ala kupo, pali si vatuhori. 6 *1Ko 12:4-11; 1Pe 4:10-11A Vure i rata kamumu hita, i habi ne hita takutaku a leho legelege. A ra leho i habi ne hita takutaku, si gi rata. A viri a Vure i habi a ngava vona, ge taki polo ne huriki ranga, ge muri mai a hini i luhoi torea a Vure, i dagi o i kiroko. 7 E huriki a mari ni tuhori, ri gi tuhori e huriki. E huriki a mari ni tovo e huriki na Vure, ri gi tovo e huriki. 8 E huriki a mari ni vara, ri gi vara e huriki. E huriki a mari ni habi, ri gi hatebalala. E huriki a mari ni muga ne huriki, ri gi habi a hatene ria na leho iea. E huriki a mari ni dodo, ri gi vivi ni kori e huriki.
Si Gi Ngaru Muholi e Huriki
9 Mu ngaru e huriki, naha ni tamilalu ni ngaru ria. Mu marikoi a naro hale. Mu rata vakaroro a naro kamumu. 10 *1Pe 1:22Mu vangaru ge manga a kabu i taku ri vangaru. Mu varangi ni vatogo. 11 Naha ni made tavula. Mu habi a hatene mua ni ratea a leho ne Bakovi Dagi. 12 *1Tes 5:16-18Mu vivi, a vuhuna mu pasimata ne Kristo. Mu hatenono na tahuna mu bole a maregoa. Mu vasileki vakaroro. 13 *Hib 13:2E huriki a tara na Vure ri bala vona tara maki, mu tuhori ria. E huriki a mosi ri gi bele taho mua, mu matakari ria.
14 *Mat 5:44; 1Ko 4:12Naha ni ruduraha e huriki ri vakamadihi mua. Mu vakabagetu ria. 15 Mu vivi turana e huriki ri vivi, mu tangi dodo turana e huriki ri tangi dodo. 16 *Snd 3:7Mu made na nivalemu. Naha ni rata polo muga muga, mu made kamumu turana e huriki a bakovi tavula. Naha ni bibi rike mule mua.
17 *1Tes 5:15Naha ni koli a naro hale. Mu rata a naro i kamumu na matane huriki lobo. 18 Mu toni a bulune mua ni made na nivalemu turana e huriki lobo. 19 *Vin 32:35; Mat 5:39Mua e huriki a hategu, naha ni koli a naro hale. Mu davea a rongova na Vure ge koli, a vuhuna a ngava ni here puru na Hinere, i ta maea,
“E Bakovi Dagi i ta maea, ‘A nikoli, a leho nau kunana. Iau kikeri a viri bara koli a vilo hale ne huriki ri rata virihi mua vona.’ ”
20 *Snd 25:21-22; Mat 5:44Naha ni koli. Mu rata manga a hini ni here puru na Hinere, i maea,
“Na tahuna a pile vomu i vitolo, o vakania.
Na tahuna i marohu, o habi a naru vona.
O rata mavonga, bara i maruhu.”
21 Nahea a naro hale na pile vomu ge rangi ioe, go koli. O rangi a naro hale vona na naro kamumu vomu.