1 Mua e huriki a turagu, i uka ma mete ge taki mua vona a parava ge bele vona a maka maki nga, 2 *Mat 24:42-43; 2Pe 3:10; Kap 3:3a vuhuna mu lohoka vona pali a parava e Bakovi Dagi ge i hamule valai vona, bara i bele vakaturutu kunana, i manga a bakovi i panaho i bele vakaturutu na rodo. 3 *Mat 24:39; Luk 21:34-35Na tahuna e huriki ri taki ta ri made kamumu, ta ri made na nivalemu, i uka ma ge tabaka bara i bele vakaturutu ne ria a vuranga. Bara i bele vakaturutu i manga a nimadihi i bele vakaturutu na ngatavine i pahea a koma. Na tahuna a parava iea i bele, i uka tara viri ge lelea.

4 Pali mua e huriki a turagu, a parava iea i uka ma ge vakaturutu mua, ge manga a bakovi ni panaho i vakaturutu a tahona ruma. I uka ma ge vakaturutu mua, a vuhuna mua i uka ma mu made na uvo. 5 *Rom 13:12I uka ma si made na uvo na rodo. Mua e huriki a bakovi na haro, a hini palala. 6 I mavonga, nahea si gi mahita manga e huriki ranga. Si gi matapara, si gi matakari kamumu a nilaho ne hita. 7 Mu lohoka vona, e huriki ri mahita na rodo. E huriki a bakovi ni ninu a naru vagole, ri ninu na rodo. 8 *Ais 59:17; Epe 6:14,17Pali hita e huriki a tara na haro. I mavonga, si gi matakari kamumu a nilaho ne hita, si gi luhoi torea a Vure, si gi vangaru. Na tahuna si rata mavonga, i manga si nugu a galeu, i matakari a ngalane hita. Si gi pasimata na Vure ge korimule hita. Na tahuna si rata mavonga, i manga si kube a hineva ge tora, i matakari a gine hita.

9 A Vure i vulaki hita i uka ma ge tahate hita. I vulaki hita, ge korimule hita e Isu Kristo a Bakovi Dagi ne hita. 10 *Rom 14:8-9; 1Tes 4:14I mate ge kori hita, lakea hita e huriki si mahuri, turana e huriki ri mate pali si gi made turana. 11 I mavonga, mu vatuhori a niluhoi ne mua, mu vadorike, ge manga a hini mu rata ngane.

12 Mua e huriki a turagu, mu togo e huriki ri leho hateka ne mua, ri matakari mua na rane Bakovi Dagi, ri vara mua nahea mu gu rata a naro hale. 13 Mu luhoi a maka leho ri rata, mu togo hateka ria, mu ngaru hateka ria. Mu valemu.

14 *2Tes 3:6,11Mua e huriki a turagu, mete ngaru mua mu gu taki tora e huriki ri laho tavula ri gi leho. Mu vakatora a niluhoi ne huriki ri mangenge. Mu tuhori e huriki ri uka a nitora. Mu hatenono vona e huriki lobo. 15 *Rom 12:17; 1Pe 3:9Na tahuna e huriki ri rata hale mua, naha ni koli. Na parava vakaroro mu rata a naro kamumu ne turane mua. E huriki polovavo ranga, mu rata a naro kamumu ne ria.

16 *Pili 4:4Mu vivi na parava vakaroro. 17 Mu vasileki vakaroro. 18 *Epe 5:20A ra maki ge bele ne mua, mu kavurike kunanea a Vure, a vuhuna a Vure i ngaru mua e huriki a tara ne Isu Kristo mu gu rata mavonga.

19 *Epe 4:30Naha ni hehe vona a leho na Hanu Kiripiripi. 20 Naha ni biu a ngavana viri i rata a nita propet. 21 *1Ion 4:1Pali mu pelekado kamumu a ngava lobo ne ria. A ngava ge muholi, mu longo mai. 22 A ngava ge hale, mu malele ha vona.

23 *2Tes 3:3A Vure a vuhuna a nivalemu. Ia a viri ge rata mua mu gu malamala liu na matana. Ge matakari a hanune mua, a niluhoi ne mua, a kakaine mua, lakea na tahuna e Isu Kristo a Bakovi Dagi ne hita ge hamule valai, bara i matai mua mu laho malamala. 24 A Vure, ra viri i gale mua, bara i rata a maki nga, a vuhuna i taki ge rata. I ramai vakaroro a nitana.

25 *Kol 4:3; 2Tes 3:1Mua e huriki a turagu, mu vasileki na Vure ge tuhori mateu.

26 Mu tagui e huriki iene ri luhoi torea a Vure.

27 A taki tora mua na matane Bakovi Dagi, mu gia ra raukea iea, ge longoa e huriki a tara na Vure.

28 E Isu Kristo a Bakovi Dagi ne hita ge rata kamumu mua.