1 *Kol 3:20Mua e huriki a koma, mu longototo e tamane mua e kinane mua, a vuhuna mu rihi e Bakovi Dagi. A naro iea i kamumu. 2 *Vin 5:16A Vinara i ta maea, “Mu togo e kinane mua e tamane mua.” Iea a vinara muga i tahoka a nita muholi vona, i ta maea, 3 “Bara mu rata mavonga, a maki lobo mu rata bara i bele kamumu, bara mu made tabaka na malala.” 4 *Sng 78:4; Snd 22:6; Kol 3:21Mua e huriki a tamana koma, naha ni rata e tune mua ri gi rihate. Pali mu tuhori ria na nitovo, na vinara ne Bakovi Dagi.

5 *Kol 3:22-23; Tit 2:9-10; 1Pe 2:18Mua e huriki a vora, mu togo, mu mangenge ne huriki a matakari ne mua koea na malala, mu longototo ria. Naha ni tamilalu. Mu longototo muholi ria i manga kunana mu longototoa e Kristo. 6 Naha ni longototo kunana na tahuna ri matai mua, ri gi vivi ne mua. Mu longototo ria manga mua a vora ne Kristo, mu rata na hatene mua a ningaru na Vure. 7 Na tahuna mu leho, mu vivi. Mu rata manga i uka ma mu kori kunana e huriki a bakovi, mu koria e Bakovi Dagi, 8 *2Ko 5:10; Kol 3:24-25a vuhuna mu lohoka vona, ioe a vora, o i uka ma ioe a vora, a ra maki kamumu o ratea, e Bakovi Dagi bara i habia vomu a mapamu.

9 *Rom 2:11; Kol 4:1Mua e huriki a matakari na vora, mua ranga mu rata kamumu e huriki a vora ne mua. Naha ni ta vakamangenge ne ria, a vuhuna mu lohoka vona ra Viri i made na hunu ia a matakari ne ria, a matakari ne mua. I matakari e huriki lobo na naro i taku kunana.

10 I pali. Mu rihi e Bakovi Dagi, mu gu kinigao na nitora dagi vona. 11 *Rom 13:12; 2Ko 10:4Mu rodo lobo a maki na vabinga na Vure, mu gu paha taga, mu gu gege a maka taminga na hanitu. 12 *1Pe 5:8-9I uka ma si vaubi ne huriki a bakovi. Si vaubi ne huriki a matakari, a nitora, e huriki a hanitu i uka ma si matai. Si vaubi na maka nitora dagi hale koea na malala hale, e huriki a hanitu meli na koropala. 13 I mavonga, mu bole rike lobo a maki na vabinga na Vure, lakea na tahuna a pile i valai i buroi mua, bara mu kara ni gegea. Muri, na tahuna i lobo a vabinga, bara mu tabana ni pesi tora. 14 *Ais 11:5; 59:17; 1Tes 5:8I mavonga, mu kisi mua mu gu paha taga. Mu vakarea mua na nita muholi. Mu rodoa a naro malamala, i manga a padirodo ni rata na aen, ge tagari a ngalane mua. 15 *Rom 10:15Mu rodo a vahapolo, ra naro ni vakalongo a Velenga Kamumu na nivalemu. 16 Mu nugu vakaroro a galeu, ra naro ni luhoi torea e Kristo. Na galeu iea, bara mu tutu mate lobo a maheto na kanono a Viri Hale i voro mai mua. 17 *Hib 4:12Mu kube a hineva ni rata na aen, ra hini a Vure i korimule mua pali. Mu nugua a bainat na Hanuna Vure, ra nitana Vure. 18 *Luk 18:1; Kol 4:2; 1Tes 5:17Mu mamata, mu matapara, mu vasileki, mu nanea a Vure na parava vakaroro na nitora na Hanu Kiripiripi. Mu rata mavonga vakaroro, mu vasileki ne huriki a tara na Vure. 19 *Kol 4:3-4; 2Tes 3:1Iau tara, mu vasileki nau, a Vure ge habi nau a ngava na tahuna a ta, i uka ma ga mangenge, ga vakalongo kavakava a Velenga Kamumu, ra a Vure i vakalongo pali ne hita. 20 *2Ko 5:20; Pmn 9Iau a vinuru ni vakalongo kavakava a Velenga Kamumu. I mavonga iau ni ru dili na bavi. Mu vasileki nahea ga mangenge, ga taki tala kavakava a Velenga Kamumu, i manga a hini a Vure i ngaru iau ga rata.

21 *Apo 20:4; Kol 4:7-8; 2Tim 4:12E Tikikus bara i vakalongo mua vona iau a made navai, a ra a ratea. Ia i manga e turagu. A ngaru hatekea. I rata kamumu a leho lobo e Bakovi Dagi i habi vona. 22 Iau a rudu lakenea, ge vakalongo mua vona a nimadegu koea, ge vakatora a hatene mua.

23 A Vure e Tamane hita, e Isu Kristo a Bakovi Dagi, ru gu habi ne mua e huriki a turagu, a nivalemu, a naro ni luhoi tora ia, a naro ni vangaru. 24 A Vure ge rata kamumu vakaroro e huriki lobo ri ngarua a Bakovi Dagi ne hita, e Isu Kristo.