4
Si Gi Toha a Maka Nitovo
* Mat 7:15; 1Tes 5:21; 1Ion 2:18; 2Ion 7Mua e huriki a turagu, e huriki a nitamina propet ri laho lae. I mavonga, naha ni longo mai a nitovo ne huriki a bakovi lobo. Mu toni a niluhoi ne ria, ri valai na Vure, o i uka. * 1Ko 12:3A nitovo i valai na Vure, bara mu matakilaka vona maea: Bara i taki tala ne Isu Kristo i valai na Vure, i bele manga a bakovi. * 1Ion 2:18Pali a maka nitovo i uka ma ri valai na Vure bara ri takia e Isu, ta i uka ma i valai na Vure. A maka nitovo maea i valai na hanitu, a pile ne Kristo. Mu longo pali ta ge valai. Ngane i bele pali.
* Mat 12:29; 1Ion 5:4-5Mua e huriki e tugu, mua a tara na Vure. Mu rangi pali e huriki a nitamina propet nga, a vuhuna a Hanuna Vure, ra i made pololilo ne mua i rangi a hanitu, ra i made turane huriki na malala. * Ion 8:47; 15:19Ria a bakovi na malala. A ngavane ria a ngava na malala. I mavonga e huriki a bakovi a ngatavine na malala ri longo mai ria. Pali hita si valai na Vure. E huriki ri lohoka na Vure, ri longo mai hita. E huriki i uka ma ri valai na Vure, i uka ma ri longo mai hita. Na naro iea kunana, si matakilaka vona e huriki ri ramai a ngava muholi, e huriki ri ramai a ngava taminga.
A Vure i Ngaru Hita
Mua e huriki a turagu, si gi vangaru, a vuhuna a naro ni vangaru, a naro na Vure. E huriki ri ngaru e huriki e turane ria, ria a tuna Vure, ri lohoka na Vure. E rei a viri i uka ma i ngaru e huriki e turana, i uka ma i lohoka na Vure, a vuhuna a Vure ia a vuhuna naro na nivangaru. * Ion 3:16A Vure i rudu vilia na malala e Tuna a madiva, si gi bole a nimahuri vakaroro. Na naro iea kunana a Vure i vakasiri a ningaru dagi vona ne hita. 10  * Rom 5:8-10; 1Ion 2:2A naro ni ngaru muholi a viri i maea: Hita i uka ma si ngaru mugea a Vure. Pali a Vure i ngaru muga hita, i rudua e Tuna, ge a nihabi, ge kadoa a dala a Vure ge ravunu vuroki a naro hale ne hita. 11 Mua e huriki a turagu, a Vure i ngaru hateka hita. I mavonga hita ranga, si gi vangaru. 12  * Ion 1:18I uka tara viri ge masia a Vure. Pali na tahuna si vangaru, a Vure i made turane hita, i rata hita si gi vangaru hateka tabu.
13  * 2Ko 1:22; 1Ion 3:24A Vure i habi ne hita a Hanu Kiripi­ripi. I mavonga si lohoka vona si rihi a Vure. A Vure tara i rihi hita. 14 Mia, mi masia na matane mia e Tuna, lakea mi vakalongo mua vona e Tamana i rudu vilia, ge korimule e huriki. 15 E huriki ri taki tala ne Isu ia a Tuna Vure, a Vure i rihi ria, ria ranga ri rihi a Vure. 16 Si lohoka vona a Vure i ngaru hita. Si roe vona a hini i ngaru hita. A Vure kunana a vuhuna a naro na nivangaru. E rei a viri i rihi a Vure, a Vure tara i rihi ia.
17 Na tahuna si rihi a Vure, a naro na nivangaru i bele dagi ne hita. Muri, na parava a Vure ge pelekado e huriki vona, i uka ma si gi mangenge, a vuhuna si laho manga e Isu koea na malala. 18 E huriki ri ngarua a Vure, i uka ma ri gi mangenge na Vure. Na tahuna a naro na nivangaru i bele dagi ne hita, ra naro iea i valai na Vure, i uka ma si gi mangenge tabu na Vure. E huriki ri mangenge na Vure, a vuhuna ri rata hale. Ri lohoka vona a Vure ge habi a nimadihi ne huriki ri rata hale. E huriki ri mangenge na Vure ri vakasiri manga a naro na Vure na nivangaru i uka ma i leho pololilo ne ria.
A Vure i Ngaru Muga Hita
19 Si vangaru a vuhuna a Vure i ngaru muga hita. 20 E rei a viri i taki ta i ngarua a Vure, pali i mari koi e turana, ia i tatami. I uka ma i ngarua e turana, ra i masia na matana, pali ge ngaru navia a Vure, ra i uka ma i masia ma. 21  * Mrk 12:29-31A Vure i vakuku hita maea: E rei a viri i ngarua a Vure ge ngaru tabu e huriki e turana.

*4:1: Mat 7:15; 1Tes 5:21; 1Ion 2:18; 2Ion 7

*4:2: 1Ko 12:3

*4:3: 1Ion 2:18

*4:4: Mat 12:29; 1Ion 5:4-5

*4:5: Ion 8:47; 15:19

*4:9: Ion 3:16

*4:10: Rom 5:8-10; 1Ion 2:2

*4:12: Ion 1:18

*4:13: 2Ko 1:22; 1Ion 3:24

*4:21: Mrk 12:29-31