2
E Isu Kristo Ia a Nikori ne Teu
* Hib 7:25-26Mua e huriki e tugu, a here lakene ne mua a nita iea, nahea mu gu rata a naro hale. Pali a viri tara ge rata a naro hale, si tahoka a Viri i made turane Tamana, i takia ge puga vuroki a naro hale si rata. Ra viri iea, e Isu Kristo a Viri malamala. * Ion 1:29; Kol 1:20; 1Ion 4:10Ia kunana a dala ne hita, ge puga vuroki a naro hale ne hita. I uka ma a dala ne hita kunana. Ia a dala ne huriki lobo na malala.
Si gi matakilaka navai na viri i lohoka na Vure? A viri i lohoka na Vure bara i longototo a vinara vona. E rei a viri i taki ta i lohoka na Vure, pali i uka ma i longo mai a vinara vona, a bakovi iea a bakovi na taminga. I marikoi na nita muholi. * Ion 14:21,23Pali e rei a viri i longototoa a nitana Vure, ia i ngaru muholia a Vure. A kilakila na viri i madoko turana Vure i maea,
a viri i madoko turana Vure bara i laho manga e Kristo i laho.
A Vinara Karaba
* Ion 13:34; 2Ion 5-6Mua e huriki a turagu, a vinara a vakalongo mua vona i uka ma a vinara karaba. A vinara a vakalongo mua vona a vinara hosi, mu lohoka vona pali. A vinara hosi a ngava mu longoa pali. * Ion 1:9; Rom 13:12I muholi, a vinara iea, a vinara hosi. Pali a vinara iea, ia tara, a vinara karaba. A narone Kristo i vakasiri a vinara iea i muholi. A narone mua ranga, i vakasiri i muholi, a vuhuna a uvo i vakatubu ni lobo, a nipara muholi i para pali. * 1Ion 4:20E rei a bakovi i taki ta i laho na hini palala, pali i marikoi ne turana, a bakovi iea i tabana ni made na uvo. 10  * Rom 14:13A viri i ngarua e turana, i made na hini palala. I uka naro ge sibo vona ge boru. 11  * Ion 12:35Pali e rei a viri i marikoi e turana, a viri iea i made na uvo, i laho na uvo. I ruru, a vuhuna i uvo a matana.
12 Mua e huriki e tugu, a here lakea ne mua,
a vuhuna a Vure i puga vuroki na rane Kristo a naro hale ne mua.
13 Mua e huriki a tamana koma, a here lakea ne mua
a vuhuna mu lohoka vona e Kristo, ra Viri i made hosi, muga na maki lobo ni ratarike.
Mua e huriki a riau, a here lakea ne mua
a vuhuna mu rangia pali e Satan.
Mua e huriki e tugu, a here lakea ne mua
a vuhuna mu lohoka vona e Tamane hita.
14 Mua e huriki a tamana koma, a here lakea ne mua
a vuhuna mu lohoka vona a Viri i made hosi, muga na maki lobo ni ratarike.
Mua e huriki a riau, a here lakea ne mua
a vuhuna mu pesi tora ni luhoi torea a Vure,
mu loho doko vona a nitana Vure
mu rangia pali e Satan.
Naha Ni Ngaru a Maki na Malala
15  * Rom 8:7Naha ni ngaru a naro na malala. Naha ni ngaru a maka maki na malala. E rei a viri i ngaru a maka maki na malala, i uka ma i ngarua e Tamane hita. 16  * Rom 13:14A maki lobo na malala, i manga a ningaru hale na kakaine hita, a ningutu na maki na viri tara, a naro na viri i bibi rike mule ia na hini i tahoka a mahala i kupo, a naro nga i uka ma ri valai ne Tamane hita. Ria a naro na malala. 17  * Mat 7:21E huriki a bakovi a ngatavine na malala bara ri velu. A ningaru lobo na malala bara ri lobo. Pali e rei a viri i ratea a ningaru ne Tamane Hita, bara i made vakaroro.
A Pile ne Kristo
18  * Mat 24:5,24; 2Ion 7Mua e huriki e tugu, ngane a nilobo­na parava i tabukoi. Mu longo pali vona a pile ne Kristo ge valai na nilobona parava. Mona e huriki a pile ne Kristo ala kupo ri bele pali. I mavonga, ngane si lohoka vona, a nilobona parava i tabukoi. 19  * Apo 20:30Ranga e huriki a pile ne Kristo, muga ri dili turane hita, pali i uka ma ria e huriki e turane hita muholi. Bara ria e turane hita muholi, i uka ma ri gi ha taro hita, bara ri tabana ni made turane hita. Pali ri ha taro hita pali, i vakasiri manga i uka ma ria a turane hita muholi. 20  * 1Ko 2:15; 2Ko 1:21; 2Ion 2Pali mua, a Viri Malamala i habi ne mua a Hanu Kiripiripi. Mu tahoka a lohokanga. 21 A here lakea ne mua a vuhuna mu lohoka vona a ngava muholi. A ngava muholi i uka ma ge vakabele a ngava taminga. 22  * 1Ion 4:3; 2Ion 7E rei a viri i takia e Isu, ta a Vure i uka ma i rudua ge korimule e huriki, a viri iea a bakovi na taminga. Ia a pile ne Kristo. I ngalahere varago ne Tamana, ne Tuna. 23  * Ion 5:23; 1Ion 4:15; 5:1A viri i ngalahere na Tuna Vure, i ngalahere ne Tamana. A viri i luhoi torea a Tuna Vure, i luhoi torea e Tamana. 24 A ngava mu longo muga, mu loho doko vona. Na tahuna mu rata mavonga, bara mu rihi e Tuna, e Tamana. 25 E Isu i ta muholi ne hita ge habi ne hita a nimahuri vakaroro.
26 A ngava nga, a here virihi e huriki a bakovi ri ngaru ni tami mua. 27  * Ion 16:13Pali mua, e Kristo i habi pali ne mua a Hanu Kiripiripi, i made turane mua. A Hanu Kiripiripi i tovo mua na maki lobo, lakea i uka ma ge tovo mua tara viri. I muholi hateka a hini i tovo mua vona, ra mu gu rihi e Kristo. I mavonga mu rihia.
Ngane Hita a Tuna Vure
28 Mua e huriki e tugu, mu rihi e Kristo. Mu rata mavonga, i uka ma mu gu maruhu na tahuna ge hamule valai. 29  * 1Ion 3:10E Kristo i malamala. I mavonga, e huriki ri ramai a naro malamala, ria e huriki a tuna Vure.

*2:1: Hib 7:25-26

*2:2: Ion 1:29; Kol 1:20; 1Ion 4:10

*2:5: Ion 14:21,23

*2:7: Ion 13:34; 2Ion 5-6

*2:8: Ion 1:9; Rom 13:12

*2:9: 1Ion 4:20

*2:10: Rom 14:13

*2:11: Ion 12:35

*2:15: Rom 8:7

*2:16: Rom 13:14

*2:17: Mat 7:21

*2:18: Mat 24:5,24; 2Ion 7

*2:19: Apo 20:30

*2:20: 1Ko 2:15; 2Ko 1:21; 2Ion 2

*2:22: 1Ion 4:3; 2Ion 7

*2:23: Ion 5:23; 1Ion 4:15; 5:1

*2:27: Ion 16:13

*2:29: 1Ion 3:10