1 *Vuh 14:17-20Hosi, e Melkisadek a hariki na tanga dagi e Salem. Ia a prister dagi na Vure Meli Liu. E Abraham i vaubi turane huriki a hariki ranga, i rabalaki ria. Muri i laho hamule lakea na tanga vona. E Melkisadek i taguia na dala, i vakabagetua. 2 Lakea e Abraham i ru na naguna i ravulu a maka maki i bole na vabinga, i habia ne Melkisadek a naguna i taku. A rane Melkisadek, na nita Hibru, i manga i maea, “a Hariki Na Naro Malamala”. E Melkisadek a hariki na tanga dagi e Salem. A ngava e Salem na nita Hibru i manga i maea, “Nivalemu”. I mavonga e Melkisadek a hariki na Nivalemu. 3 I uka tara viri ge lohoka vona e tamane e kinane Melkisadek. A hamona tara i uka ma ni lohoka vona. A parava ni poda ia vona, a parava i mate vona, ngi ranga i uka ma ni lohoka vona. I mavonga, i manga a prister vakaroro, manga kunana a Tuna Vure.

4 Mu masia e Melkisadek, i tahoka a rana i dagi hateka. A gare ne hita, e Abraham, i ru na naguna i ravulu a maki i bole na vabinga, i habia vona a naguna i taku. 5 *Gi 18:21A vinara i taki e huriki na kabu ne Levi kunana ri gi bole a naguna i taku ne huriki a Israel, a vuhuna ria e huriki a prister. I muholi, e huriki a Israel, e huriki a hamone Abraham, pali e huriki a prister bara ri bole ne ria a naguna i taku. 6 E Melkisadek i uka ma ia a hamone Levi, pali i bole ne Abraham a nihabi iea. Muri i vakabagetua e Abraham, ra bakovi a Vure i ta muholi vona na ngava dagi. 7 Si lohoka vona a bakovi i vakabagetu a viri, ia a bakovi dagi. A viri ni vakabagetu, a bakovi tavula kunana. 8 E huriki a Levi ri bole a naguna i taku ne huriki, ria e huriki a bakovi kunana. Bara ri mate. Pali e Melkisadek i bole a naguna i taku, a nita na Vure i taki i uka ma i mate. 9 Bara si ta maea, e Levi, ra viri i bole a naguna i taku ne huriki a Israel, ia tara, i manga i habi a naguna i taku vona i lakea ne Melkisadek. I manga i habi polo ne Abraham, 10 a vuhuna i tabana i pololilo na kakaina gare vona, e Abraham, na tahuna e Abraham i taguia e Melkisadek.

11 A vinara, a leho na prister, rua varago ru valai na Vure. Pali a leho na prister i keri ni rata hita si gi malamala na matana Vure. I mavonga, a Vure i rudu vilia a prister karaba. I uka ma i manga e Aron. I manga e Melkisadek. 12 Na tahuna ni gi kuloi a prister, a vinara tara bara ni kuloi. 13-14 *Ais 11:1; Mat 2:6; Kap 5:5A ngava iea ni taki virihi e Isu vona. Pali a Bakovi Dagi ne hita i uka ma i valai na kabu ne Levi. I valai na kabu ne Iuda. Hosi, i uka tara bakovi na kabu ne Iuda ge leho manga a prister. A vinara ne Moses, tara, i uka ma i taki e huriki a Iuda ri gi rata a leho na prister.

15 A ngava iea i kavakava hateka ngane, a vuhuna tara prister i manga e Melkisadek i valai pali. 16 Ia a prister, i uka ma i ramai a vinara, ra i taki e huriki a Levi kunana ri gi rata a leho na prister. Ia a prister a vuhuna i tahoka a nitora ni pesi rike mule na matenga. 17 *Hib 5:6Si lohoka vona, a vuhuna a Vure i ta tora, i ta maea,

18 A Vure i bole vuroki pali a vinara na prister, a vuhuna i uka nitora, i uka leho. 19 *Hib 10:22; Iak 4:8A vinara i uka ma i rata hita si gi malamala na matana Vure. Muri a Vure i vakasiri ne hita a dala kamumu si gi bele tabukoi na Vure vona.

20-21 *Hib 5:6Na tahuna a Vure i vulakia e Isu ge ia a prister, i uka ma i ru tavulea. I ta muholi, i kaba, i ru ia ge ia a prister. E huriki a prister hosi i uka ma i mavonga. I uka viri ge kaba langa ne ria, ri gi bele manga a prister. Pali e Isu, a Vure i kaba, i ta maea,

23 Hosi e huriki a bakovi ala kupo ri leho manga prister. I uka ma ri leho vakaroro, a vuhuna bara ri mate, muri a viri tara bara i bole a murina. 24 Pali e Isu i mahuri vakaroro, i leho manga prister vakaroro, i uka ma ge lobo. 25 *Rom 8:34I mavonga i tahoka a nitora ni korimule e huriki ri luhoi torea, ri valai tabukoi na Vure, a vuhuna i mahuri vakaroro, i takia a Vure ge kori hita.

26 E Isu a prister dagi kamumu hateka. I malamala, i uka ma i ratea tara naro hale. I made herehere ne hita e huriki a bakovi na malala. A Vure i vakamadea polomeli liu na hunu. 27 *Hib 5:3E huriki a prister dagi ri tahoka a leho ni habi a nihabi na parava vakaroro. Muga bara ri habi a nihabi ni puga vuroki a naro hale ne ria. Muri ri habi a nihabi ni puga vuroki a naro hale ne huriki. Pali e Isu i uka ma i tahoka a naro hale ge rata mavonga. I habi a nihabi balaka taku kunana. I habi mule ia na Vure, i mate, i manga a nihabi. 28 Hosi a vinara i ru e huriki a bakovi na malala ge ria a prister dagi. Pali muri, na tahuna a Vure i kaba, i ru a Tuna Vure ge ia a prister, re Isu, i rata lobo a maka maki a Vure i takia ge rata.