8
E Isu Ia a Prister Dagi
1 A vuhuna ngava nga i maea: Si tahoka pali a prister dagi. I made na limana kanena Hariki na hunu, i matakari. 2 Ngane i leho manga prister pololilo na kape muholi na Vure. A kape iea, i uka tara bakovi ge haea. A Vure kunana a viri i haea.
3 E huriki a prister dagi lobo ri tahoka a leho ni habi a nihabi na Vure. E Kristo tara, i habi a nihabi na Vure, a vuhuna ia a prister dagi. 4 Ia bara i made na malala, i uka ma ge ia a prister dagi, a vuhuna i tahoka e huriki a prister ri made pali, ri habi a maka nihabi na Vure, ri muri mai kunana a vinara. 5 *Nim 25:40; Kol 2:17; Hib 10:1Ri leho manga prister na kape na Vure koea na malala. Ra kape na Vure iea, i manga kunana a hanuna kape muholi na Vure i pesi na hunu. Hosi, muga ne Moses ta ge vakapesia a kape na Vure, a Vure i takia, i ta maea, “O lohotata vona a naro na kape a vakasiri ioe vona na lolo, o ramai kamumua.” 6 *Hib 7:22Pali ngane a leho i bolea e Isu na ngava dagi karaba i rangi a leho na ngava dagi hosi, a vuhuna a nita muholi a Vure i habi turana ngava dagi karaba i rangi a nita muholi na ngava dagi hosi. 7 A ngava dagi hosi bara i kamumu kunana, a Vure i uka ma ge vakabele tabu a ngava dagi karaba.
8 *Jer 31:31-34Pali a Vure i pukatala a naro hale ne huriki nga, i ta maea, “E Bakovi Dagi i ta maea,
‘Mu longo, iau a vulakia pali tara parava,
ga rata a ngava dagi karaba
turane huriki a Israel,
e huriki a Iuda.
9 Ra ngava dagi iea, i uka ma ge manga a ngava dagi hosi
a rata turane huriki a gare ne ria,
na tahuna a tuli tala ria o Egipto.
I uka ma ri muri maia a ngava dagi nau.
Lakea iau e Bakovi Dagi, a ngalahere ne ria.
10 A ngava dagi karaba ta ga ratea ne huriki a Israel i maea:
Iau e Bakovi Dagi a ta maea,
‘Muri ma ga ru a vinara nau ge tabuli na niluhoi ne ria,
ga here a ngava nau na hatene ria.
Iau, ge iau a Vure ne ria.
Ge ria e huriki a ngate nau.
11 Na tahuna iea, i uka ma ri gi vatovo ria na ngava ne Bakovi Dagi,
a vuhuna e huriki lobo bara ri lohoka nau,
i vakatubu ne huriki a matasia,
i lakea ne huriki a kakaina tanga.
12 Ga dodo ria, i uka ma ga habi a nimadihi ne ria vona a naro hale ne ria.
Ga longo kaburungi liu a vilo hale ne ria.’ ”
13 Na tahuna a Vure i taki talea a ngava dagi karaba vona, i ratea ngane a vinara hosi i uka lehona. A ra maki hosi, i uka lehona, bara i velu.