A ngava iea i valai na Viri i matakari a hanuna Vure i polorua, i nugu a hada i polorua. A lohoka na narone mua. E huriki ri pahaluhoi ta mu tahoka a nimahuri, pali mu mate pali. 2 Mu hadongo. Ranga naro kamumu ne mua i tabana, pali i popote ri gi mate. Mu vakatora ria, a vuhuna a leho ne mua, i uka ma mu vakalobo kamumu na matana Vure nau. 3 *Mat 24:43-44; 1Tes 5:2; Kap 2:5; 16:15Mu luhoi tabu a ngava mu longoa, mu longototoa hosi. Mu longototoa, mu pulo a vilone mua. Mua bara mu koi ni hadongo, bara valai manga a viri i panaho. Bara valai vakaturutu, a habi a nimadihi ne mua.

4 *Iud 23Pali e huriki ranga ne mua o Sardis ri tabana ri tahoka a rane ria, i uka ma ri vakakatoki a varakia ne ria. Muri bara ri rodo a varakia keakea, ri gi laho turagu, a vuhuna i kara ria ri gi rata mavonga. 5 *Nim 32:32-33; Mat 10:32; Luk 12:8E rei a viri i mulangi, ga vakarodoa na varakia keakea. A rana bara i tabuli vakaroro na buk na nimahuri. I uka ma ga ravunu vurokia. Ga taki tala a rana na matane Tata, na matane huriki a agelo vona. 6 E rei a viri i ngaru ni longokilala, ge longo kamumu, ge luhoi kado a ngava a Hanu Kiripiripi i taki virihi e huriki a tara na Vure.”

A ngava iea i valai na Viri Malamala, a Viri Muholi, ra viri i tahoka a ki*A ki iea i vakasiri manga i tahoka a nitora ni matakaria a harikianga ne Davit, ra ni ta muholi vona hosi. Isaia 22:22 ne Davit. A maki a talea, i uka tara viri ge tukari mulea. Pali a maki a tukaria, i uka tara viri ge talea. 8 *1Ko 16:9A lohoka na narone mua. Mu longo! A ru na ngalane mua a dua i mata ka. I uka tara viri ge tukaria. A lohoka ne mua, mu uka nitora. Pali mu longototo a nitagu, i uka ma mu lohopilea a ragu. 9 *Ais 45:14; 49:23; 60:14; Kap 2:9Mu longo! Re huriki a tara ne Satan, ri taki ta ria a Iuda, pali ri tatami. I uka ma ria a Iuda. Mu longo! Ga rata ria ri gi valai mai mua, ri gi turume puru na vahane mua. I mavonga, ri gi matakilaka vona iau a ngaru hateka mua. 10 *Luk 21:19; 2Tim 2:12Mu longototo iau na tahuna a taki mua mu gu hatenono, mu gu pesi tora na maregoa. I mavonga ga matakari mua, i uka ma mu gu dili na tahuna na nitoni, ra popote ge valai na tanga lobo na malala, ge toha e huriki lobo ri made na malala.

11 Iau ga bele malaviriri. A maki mu tahoka, mu nugu tata torea. A mapane mua, ma ge radia a bakovi tara. 12 *Ais 62:2; 65:15; Kap 14:1; 21:2E rei a viri i mulangi ga vakapesia, ge manga a butu na roho na Vure nau. I uka ma ge pagitala vona a roho iea. Ga here vona a rana Vure nau, a rana tanga na Vure nau, re Ierusalem karaba, ra ge puru valai na Vure nau meli na hunu, ga here vona a ragu karaba. 13 E rei a viri i ngaru ni longokilala, ge longo kamumu, ge luhoi kado a ngava a Hanuna Vure i taki virihi e huriki a tara na Vure.”

A ngava iea i valai na viri ni gale I Muholi, ra viri i ta muholi, i taki tala a ngava lobo a Vure i takia ge taki. Ia a vuhuna maki lobo a Vure i ratarike. 15 *Rom 12:11A lohoka vona a narone mua. I uka ma mu piu, i uka ma mu rongo. A ngaru mu gu piu, o mu gu rongo! 16 I uka ma mu piu, i uka ma mu rongo, mu nami hurari. I mavonga ga muta tala mua na ngavagu, 17 *Luk 12:21; 1Ko 4:8a vuhuna mu taki ta mu tahoka a mahala, mu ru kadolu a maki i kupo, i uka ma mu ngarua tara maki. Pali mu matasia hateka, mu bala a maki, mu kepa, mu kabobo. 18 *Ais 55:1Ngane a taki mua, a gol nau ni gutu na kanono i maga hateka. Mu konea, mu gu tahoka a mahala. Mu kona nau a varakia keakea, mu gu kavitagu mua vona, i uka ma mu gu kabobo, i uka ma mu gu maruhu tabu. Mu kona nau a marasin na matane mua, mu gu matai tabu.

19 *1Ko 11:32; Hib 12:6; Kap 2:5Iau a tahate e huriki a bakovi a ngatavine a ngaru hateka ria, a habi a nimadihi ne ria. I mavonga, mu habi a hatene mua ni pulo a vilone mua. 20 *Ion 14:23Mu longo! A pesi na logo, a tutulidi. E rei a viri i longo a lohogu, i talea a logo, iau bara dili, a kani turana.

21 E rei a viri i mulangi, bara ratea ge made turagu na gula hariki nau, i manga a hini iau tara a mulangi hosi, a made turane Tata na gula hariki vona. 22 E rei a viri i ngaru ni longokilala, ge longo kamumu, ge luhoi kado a ngava a Hanu Kiripiripi i taki virihi e huriki a tara na Vure.”