1 *Apo 7:40E Moses i made tabaka hateka na lolo, i uka ma i malaviriri ni puru valai. Lakea e huriki ri pesi halui e Aron ri takia, “I uka ma si lohoka vona a ra maki i bele ne Moses meli na lolo. I tuli tala hita o Egipto, i taparaki valai hita koea. Pali ngane si gi rata ranga vure, ri gi muga ri gi vakasiri a dala ne hita.”

2 Lakea e Aron i taki ria, “Mu paru tala a maka pato ni rata na gol na talingane girihine mua, e tune mua, mu bole valai nau.” 3 Ri longo maia a nitane Aron, ri paru tala na talingane huriki a ngatavine a maka pato ni rata na gol, ri bole valai vona. 4 *1Ki 12:28; Apo 7:41E Aron i bole a maka gol, i gutu na kanono ri naru. I guru dili na lovo ni keli i manga a bulmakau, i ratea a hanuna bulmakau. Muri e huriki a Israel ri ta maea, “Ra maki iea, a vure ne hita. I tuli tala hita o Egipto, i taparaki valai hita koea.”

5 Na tahuna e Aron i masia, i ratea a dede tabukoi vona. Lakea i ta maea, “Kuduvi si gi ratea tara habu, si gi kavurikea e BAKOVI DAGI.” 6 *1Ko 10:7Na hatelanga pokopoko na parava muri, e huriki ri bole valai a maka sipsip a bulmakau, ge a nihabi gutu-vuro. Ri bole valai tabu a nihabi na nivalemu. Muri ri kani, ri ninu, ri rehi turane huriki a ngatavine.

7 Lakea e BAKOVI DAGI i takia e Moses, “O puru malaviriri. E huriki o tuli tala o Egipto ri rata hateka a naro hale. 8 Ri longokaburungia a dala a takia ne ria ri gi ramaia. Ri ratea na gol a tuna bulmakau, ri kavurikea, ri habi a nihabi vona. Lakea ri ta maea, ‘Ra maki iea a vure ne hita, i tuli tala hita o Egipto, i taparaki valai hita koea.’ ”

9 Lakea e BAKOVI DAGI i takia e Moses, “Iau a lohoka vona e huriki nga, ri tagege hateka. 10 Iau, i madihi a hategu ne ria. Ngane ga ratapile ria, naha ni hatekakari iau. Muri ga rata ioe, turane huriki a hamomu bara mu kuloi ria, mu bele kupo.”

11 *Gi 14:13-19Pali e Moses i vasileki tora ne BAKOVI DAGI, a Vure vona, i ta maea, “BAKOVI DAGI, nahea ge madihi hateka a hatemu, go ratapile ria. Ioe kunana o bole tala ria o Egipto na nitora dagi vomu. 12 Ioe bara o ratapile ria, e huriki a Egipto bara ri ta maea, ‘A Vure i tami e huriki a viri vona, i bole tala o Egipto, i tuli lakea ria na lolo, i rabalaki ria.’ Pali naha ni ratea ra naro iea. I kamumu hateka o taparakia a rongova o puloa a niluhoi vomu, naha ni rabalaki e huriki a viri vomu. 13 *Vuh 17:8; 22:16-17O luhoi mule a vora vomu e Abraham, e Isak, e Iakop. O kaba, o taki tou o ta maea, ‘A ta muholi hateka, e huriki a hamone matou ge kupo manga a hada na hunu. Ra malala a ta muholi vona, ga habia ne matou, bara habia ne huriki a hamone matou.’ ” 14 E Moses i vasileki maea, lakea e BAKOVI DAGI i puloa a niluhoi vona, i uka ma i ratapile e huriki a viri vona.

15 Muri e Moses i ngalakapulo, i bole a tabekena kedo i rua e Bakovi Dagi i here a Ngava Dagi vona, i puru. 16 A Vure kunana i rata ra kedo nga, i here vona a vinara.

17 Na tahuna e Iosua i longo e huriki ri kalolo, i takia e Moses, “O longo puru! A longo a nangine huriki ri vaubi na mada.”

18 Pali e Moses i koli, i ta maea,

19 E Moses i valai tabukoi na mada i masia a tuna bulmakau ni rata na gol. I matai e huriki ri raulo haluia a bulmakau, i madihi a hatena. Lakea i voro puru ra tabekena kedo nga ru momo kesikesi na dahana lolo. 20 Lakea e Moses i bolea ra bulmakau i ratea e huriki, i rungania na kanono, i ubimomoa i havula kesi. Muri i bole a habulona, i voro puru na naru, i vakuku e huriki a Israel ri nua a naru.

21 Lakea e Moses i nanea e Aron, “Re huriki nga a ra ri ratea vomu, o mata taro ria ri ratea ra naro hale dagi iea?”

22 E Aron i kolia e Moses, i ta maea, “Bakovi dagi, naha ni tahate iau. O lohoka vona a narone ria. Ri ngaru hateka ni rata a naro hale. 23 Ri taki iau, ri ta maea, ‘I uka ma mi lohoka vona a ra maki i bele vona e Moses, ra bakovi i bole tala hita o Egipto. O rata puru ne mia ranga vure ge muga, ge vakasiri a dala ne mia.’ 24 Muri a taki ria, ‘E rei a viri i tahoka a gol ge kali tala.’ Lakea ri habi nau a gol, a voro rike na kanono, i bele a tuna bulmakau.”

25 E Moses i lohoka vona e huriki ri rata a naro hale, a vuhuna e Aron i matataro ria. I luhoi ma ge matai ria e huriki a pile bara ri biu, ri nongo vaki ria. 26 Muri i vano i pesi na poridala na mada i ta maea, “E rei i ngaru ni ramai e Bakovi Dagi, ge valai ge pesi turagu.” Lakea e huriki a bakovi na kabu ne Levi ri valai ri pesi halui ia.

27 Muri e Moses i taki ria, “E BAKOVI DAGI, a Vure ne hita a Israel i taki mu gu bole a maka bainat, mu lakea na tabeke lobo na mada mu rabalaki e huriki a turane mua.” 28 Lakea e huriki a kabu ne Levi ri rata manga a hini e Moses i taki. Na parava iea kunana ri rabalaki e huriki ri ala 3,000. 29 Muri e Moses i taki e huriki a hamone Levi i ta maea, “Ngane mu rabalaki pali e huriki, i uka ma mu togo e huriki e turane mua, e tune mua. Na naro iea kunana, mu bele manga e huriki a prister ne BAKOVI DAGI. Mona e BAKOVI DAGI i rata kamumu mua.”

30 Na parava muri e Moses i taki e huriki, “Ra naro hale mu ratea i hale hateka. Pali ngane ga sike tabu na lolo, ga takia e BAKOVI DAGI, ge puga vuroki a naro hale ne mua.”

31 Muri e Moses i sike na lolo i takia e BAKOVI DAGI, “A dodo hateka re huriki nga, ri rata a naro hale dagi. Ri ratea na gol a vure. 32 *Sng 69:28; Kap 3:5Pali ngane a nana ioe, ta go puga vuroki a naro hale ne ria. Pali ge uka, a ngaru ioe go ravunu vurokia a ragu na puhu vomu.”

33 Pali e BAKOVI DAGI i takia e Moses, “I uka ma ge mavonga. Iau ga ravunu vuroki kunana a rane huriki ri rata a naro hale. 34 O vano ngane, o tuli e huriki ri gi lakea vona a tanga, a taki ioe vona ri gi lakea vona. O longo kamumu. A agelo nau ge muga, ge vakasiri a dala ne mua. Pali na tahuna ga hamule valai, ga ratapile e huriki ri rata a naro hale.”

35 Muri e BAKOVI DAGI i rudua a gilanga dagi, i ratapile e huriki, a vuhuna ri simaia e Aron i ratea na gol a hanuna tuna bulmakau.