2
A Niluhoi ne Hita Ge Manga ne Kristo
E Kristo i vakatora a hatene mua. A hini i ngaru hateka mua i vakatora a niluhoi ne mua. A Hanu Kiripiripi i rata mua mu made kamumu palupu. Mu vangaru, mu vakori. I mavonga, mu rata iau ga vivi dagi. Mu pesi palupu na niluhoi i taku, mu vangaru, mu made na nivalemu, na niluhoi i taku kunana. * Gal 5:26Naha ni luhoi mua kunana. Naha ni vakadagi a rane mua. Mu vakakiroko mua, mu rata manga e huriki lobo ri dagi ne mua. * 1Ko 10:24Mua takutaku, naha ni luhoi ni korimule kunana mua. Mu vakori. Pali a vilone mua ge manga a vilone Isu Kristo. * Ion 1:1-2; 17:5E Kristo ia a Vure, pali i uka ma i luhoi ni nugu tata a murina ni made manga a Vure. * Ion 1:14; 2Ko 8:9I vakakiroko liu ia, i bele manga a vora. Ni poda ia, i bele manga a bakovi. Na tahuna i bele manga a bakovi, * Hib 5:8; 12:2i vakakiroko ia, i longototoa a Vure, i vano i harena na tahuna i mate na kai tavalavala. * Apo 2:33; Epe 1:20-21; Hib 1:3-4I mavonga a Vure i vakadagi hateka ia. I vunua a rana, ra i rangi a rana e huriki lobo. 10  * Rom 14:11Ngane e huriki lobo bara ri turume puru na ngalane Isu, e huriki meli na hunu, e huriki na malala, e huriki polotano na malala. 11  * Rom 10:9E huriki lobo bara ri taki tala ne Isu Kristo ia a Bakovi Dagi. Na naro iea ri gi kavurikea a Vure, e Tamane hita.
Si Gi Para
12 I mavonga, mua e huriki a turagu, mu longototo, i manga a hini mu longototo vakaroro. Ngane i uka ma a made turane mua, a ngaru mu gu longototo hateka. Mu mangenge na Vure, mu togoa, mu rura ni vakatora a niluhoi ne mua, lakea a Vure ge korimule mua, 13 a vuhuna a Vure i leho pololilo ne mua, i habi a ningaru ne mua, a nitora ne mua ni rata a maki i vivi vona.
14 A maki lobo mu rata, naha ni deke, naha ni hehe, 15  * Dan 12:3; Pili 1:10lakea i uka tara viri ge padi virihi mua. Bara mu malamala kunana. Bara mua e huriki a tuna Vure, mu uka ngava na kurukuruna e huriki a bakovi ri putu ngingi na tahuna mona. Bara mu para manga a hada na kurukurune ria. 16 Mu nugu tata tora a ngava na nimahuri, lakea na parava e Kristo i valai vona, bara vivi ne mua, i uka ma a nunu tavula, i uka ma a leho tavula. 17 Iau bara vivi kunana ni bele turane mua manga a nihabi na vain, ni gi guru tala langa na nihabi ne mua, a leho ne mua, ra hini mu luhoi torea e Kristo, bara vivi turane mua. 18  * Pili 3:1; 4:4Mua ranga, bara mu vivi turagu.
E Timoti Rua e Paproditus
19 E Isu a Bakovi Dagi bara i ngaru, bara rudu lakenea ne mua e Timoti. Muri bara vivi na tahuna i hamule valai nau, i vakalongo iau ne mua. 20 I uka a turagu manga e Timoti. I luhoi hateka mua. 21  * 2Tim 4:10E huriki ranga koea i uka ma ri luhoi a maki ne Isu Kristo. Ri luhoi kunana a maki ne ria. 22 Pali mu lohoka vona e Timoti. I vakasiri pali a narona i kamumu hateka. I leho turagu ni vakalongo a Velenga Kamumu, i manga a koma i tuhoria e tamana. 23 Na tahuna a longo a ra maki ge bele nau, bara rudu lakenea malaviriri. 24 A luhoi torea e Bakovi Dagi ge tuhori iau, lakea tabukoi bara lakene ne mua.
25  * Pili 4:18Pali muga ga rudu mulea ne mua e Paproditus. I manga e turagu muholi. Miri leho palupu ni tagari a Velenga Kamumu. Ia a vinuru ne mua, mu rudu vilia ge tuhori iau. 26 I dodo hateka mua. I loho lege ne mua, a vuhuna mu longo ta i giloa. 27 I muholi hateka, i giloa, i tabukoi ge mate. Pali a Vure i dodoa. I uka ma i dodo kunana ia. Iau tara, i dodo iau, ma ge mate, ga dodo hatekea. 28 I mavonga a ngaru hateka ni rudu mulea, mu gu vivi ni matai tabu ia. Iau tara, i uka ma ga loho lege lae vona. 29 I mavonga, na tahuna i bele, mu vivi, mu taguia na narone Bakovi Dagi. Mu togo e huriki a bakovi maea, 30 a vuhuna i tabukoi ge mate na leho ne Kristo. I putu purua a gilanga vona, i kori polo iau na rane mua.

*2:3: Gal 5:26

*2:4: 1Ko 10:24

*2:6: Ion 1:1-2; 17:5

*2:7: Ion 1:14; 2Ko 8:9

*2:8: Hib 5:8; 12:2

*2:9: Apo 2:33; Epe 1:20-21; Hib 1:3-4

*2:10: Rom 14:11

*2:11: Rom 10:9

*2:15: Dan 12:3; Pili 1:10

*2:18: Pili 3:1; 4:4

*2:21: 2Tim 4:10

*2:25: Pili 4:18