1 E Kristo i rata hita si matukapaga pali na vinara, a vuhuna i ngaru si gi matukapaga. I mavonga, mu pesi tora. Nahea mu gu hamule tabu, ge mua a vorakato na vinara.

2 Mu longo kamumu. Iau e Paulus a taki mua, mua bara mu longototo ni gi pala a kuline mua, a leho e Kristo i ratea i uka ma ge kori mua. 3 A taki tala tabu ne huriki ri ngaru ni gi pala a kuline ria, a ta maea, e huriki ri rata mavonga, ri gi ramai a maka vinara lobo. 4 Mua e huriki mu ngaru ni ramai a vinara ne vona ni bele malamala, mu marava basi ne Kristo, mu pe pali a nidodo vona. 5 Pali mia, mi luhoi torea e Kristo na nitora na Hanu Kiripiripi, mi pasimata vona a hini a Vure ge gale mia a viri malamala. 6 *1Ko 7:19; Gal 6:15A viri i rihi e Kristo, ra hini ni pala a kulina o i uka, a maki tavula. A maki dagi, ge luhoi torea e Kristo, ge tahoka a naro na nivangaru.

7 I muga mu luhoi tora kamumu a narone Kristo. Pali e rei a viri i putu tagu a dala ne mua, i uka ma mu ramai tabu a ngava muholi? 8 Ra niluhoi ne mua, i uka ma i valai na viri i gale mua. 9 *1Ko 5:6A is popote kunana i rata a bret lobo i vava. 10 *2Ko 11:15; Gal 1:7Iau a luhoi hatekea e Bakovi Dagi mu gu ramai a niluhoi nau, lakea e rei a viri i vakamarego mua, a Vure bara i pelekadoa. 11 Mua e huriki a turagu, iau i uka ma a tovo e huriki ni gi pala a kuline ria. Mu luhoi iau a rata mavonga, pali i navai e huriki ri vakamadihi iau? Iau bara tovo e huriki ni gi pala a kuline ria, ngane a nitovo na kai tavalavala i uka ma ge vakarike a hatene huriki. 12 Re huriki ri vakamarogo a niluhoi ne mua na ngava ni pala a kuli, i kamumu ri gi pala vuroki mule ria!

13 *1Pe 2:16Mua e huriki a turagu, a Vure i gale mua mu gu matukapaga na vinara. Naha ni luhoi mu matukapaga ne vona ni ramai a ningaru hale na kakaine mua. Pali mu vangaru, mu vakori. 14 *Levi 19:18; Rom 13:9A maka vinara lobo bara o ramai na tahuna o ramai a ngava i taku kunana, ra i maea, “O ngarua e turamu i manga a hini o ngaru mule ioe.” 15 Naha ni vatahate, naha ni vagege, ma mu gu vakalobo tavula mua.

16 Pali iau a ta maea, mu laho turana Hanu Kiripiripi, lakea i uka ma mu gu ramai a ningaru hale na kakaine mua. 17 *Rom 7:15-23A maka ningaru hale na kakaine hita ri hehe a Hanu Kiripiripi. A ningaru na Hanu Kiripiripi tara, i hehe a maka ningaru hale na kakaine hita. Ri vahehe, ri kapi kari mua, i uka ma mu rata a maki mu ngaru ni rata. 18 Pali na tahuna a Hanu Kiripiripi i muga ne mua, a nitora na vinara i uka ma ge matakari mua. 19 *1Ko 6:9-10Si matakilala a maka ningaru hale na kakaine hita, ra a naro ni mole, 20 a naro ni kavurike a vure taminga, a muto, a naro na ni vapile, a naro ni vabiu, a naro ni marikoi vona a viri i tahoka a maki, a naro ni hate madihi, a naro ni rata polo muga, a naro ni vapida lae, ni vapida ni rata a tara karaba, 21 a naro ni masigoro, a naro ni ninu a naru vagole, a naro ni vapopo ni ninu a naru vagole, turana maka naro hale maea. Hosi a taki mua mu gu matadoko vona a maka naro hale nga. Ngane a taki tabu mua, e huriki ri rata a maka naro hale nga, i uka ma ri gi dili na harikianga na Vure.

22 Pali a kanena Hanu Kiripiripi, a naro kamumu nga: a naro na nivangaru, a nivivi, a nivalemu, a naro ni hatenono, a naro ni rata kamumu e huriki, a naro ni hate balala, a naro ni ta muholi, 23 a naro ni made madoru, a naro ni pahadanu a ningaru hale na kakaimu. Ra maka naro kamumu nga, i uka tara vinara ge ta pupukari hita vona. 24 *Rom 6:6; Kol 3:5E huriki a ngate ne Isu Kristo ri paditata pali na kai tavalavala a ningaru hale na kakaine ria.

25 A Hanu Kiripiripi i habi ne hita a nimahuri karaba. I mavonga, si gi muri mai a ningaru na Hanu Kiripiripi. 26 *Pili 2:3Nahea si gi bibi rike mule a rane hita. Nahea si gi vakarike a hatena viri si gi vaubi turana. Nahea si gi masigoro a maki na viri tara.