1 E BAKOVI DAGI i takia e Moses, 2  * Levi 11:44-45; 1Pe 1:16ge taki e huriki a Israel, ge ta maea, “Mu ramai a naro malamala, a vuhuna iau e BAKOVI DAGI, a Vure ne mua, a malamala. 3  * Nim 20:8,12; Vin 5:12,16Mua takutaku mu togo e kinane mua e tamane mua. Mu malo na Parava Nimalo. Iau e BAKOVI DAGI a Vure ne mua, a takia a ngava iea. 4  * Levi 26:1; Nim 20:23; 34:17; Vin 27:15Naha ni ha taro iau mu gu kavurike a vure ranga. Naha ni kau na kai, na aen a vure, mu gu kavurike. Iau e BAKOVI DAGI a Vure ne mua, a takia a ngava iea.

5 “Na tahuna mu rata a nihabi na nivalemu ne BAKOVI DAGI, mu ramai a vinara a habi ne mua. Mua bara mu rata mavonga, bara ngaru a nihabi ne mua. 6 A bobona kanirau na nihabi na nivalemu ni gi kani na parava ni rabalaki vona, o na parava muri. I ranga ge tabuli polo na toluna parava, naha ni kani, mu gutu na kanono ge vuro. 7 A viri i kani a bobona kanirau na toluna parava, i uka ma ga ngarua a nihabi vona, a vuhuna i muto. 8 E rei a bakovi i kani a bobona sipsip, a bulmakau na toluna parava i vakahale a maki ni habi nau, i tahoka a ngava, bara ni tono tala na kabu vona.

9  * Levi 23:22; Vin 24:19-22“Na tahuna mu mirio a vit, naha ni mirio na harena hania, naha ni hamule mu gu poi a masigo. Ge tabuli ngi. 10 Na tahuna mu pasi pali a kanena vain, naha ni hamule tabu ni poi kado a masigo, a kanena mu pasi kaleva na rahana. Ge tabuli ngi ne vona e huriki a matasia, a mosi. Iau e BAKOVI DAGI a Vure ne mua, a takia a ngava iea.

11  * Nim 20:15-16; Vin 5:19-20“Naha ni panaho a maki, naha ni tami a viri ni rata marogo a maki vona. Naha ni ta marapusi.

12  * Nim 20:7; Vin 5:11; Mat 5:33“Na tahuna mu ta muholi ni rata a maki, naha ni kaba tavula na ragu ni tami a viri. I uka ma mu ramai a nita muholi mu rata, mu vakahale a ragu. Iau e BAKOVI DAGI a Vure ne mua, a takia a ngava iea.

13  * Vin 24:14-15“Naha ni rata hale a viri mu gu panaho a maki vona. Na tahuna mu taki a viri ge rata a leho ne mua, mu kona liu ia na parava iea. Naha ni nugu mule a mapana, mu gu habi kuduvi.

14  * Vin 27:18“Naha ni harogi a viri i vou. Naha ni ru na dala a maki, ge sibo vona a kepa ge boru. Mu mangenge vona a Vure ne mua. Iau e BAKOVI DAGI, a takia a ngava iea.

15  * Nim 23:6-8; Vin 16:19“Na tahuna mu varamai na ngava, mu rata a naro kamumu na nipelekado a ngava. Naha ni tuhori a matasia, o go mangenge na bakovi na mahala. A ngava mu rata ge malamala kunana.

16 “Naha ni laho viliha ni padimomo a turamu. A bakovi tara ni vakapesi na ngava ni gi pelekado, pali ra ngava ni padi virihi ia vona i uka ma i muholi, mu ta tala mu tuhoria. Bara mu ngavarubu, bara ni rabalaki tavula a bakovi iea. Iau e BAKOVI DAGI, a takia a ngava iea.

17  * Mat 18:15“Na tahuna a viri i rata hale ioe, naha ni mata robo vona. O pelekado a ngava muru vatahate vona. Ma go ru mavongea na niluhoi vomu a ngava muru vatahate vona, bara o dili na naro hale.

18  * Mat 5:43; 19:19; 22:39; Mrk 12:31; Luk 10:27; Rom 13:9; Gal 5:14; Iak 2:8“Naha ni koli a naro hale na viri i rata virihi ioe vona, naha ni tepu vakaroroa. O ngaru e huriki a turamu, i manga a hini o ngaru mule ioe. Iau e BAKOVI DAGI a takia a ngava iea.

19  * Vin 22:9-11“Mu ramai a maka vinara nau. Naha ni mata taroa a sipsip ge radia a meme, ge vakabele a tuna. Naha ni varo palupu na hania ge taku a vutuna maki legelege. Naha ni rodo a nirodo i uka ma ni rata na maki i taku.

20 “Na tahuna a bakovi i mahita turana a vorakato ngatavine, ni taki ta ni gi habi na bakovi tara ge konea ge matukapaga, pali ra bakovi iea i uka ma i konea ma, mu tuli rua lakea na tabeke ni vapelekado. Muri ni gi vakamadihi rua. Pali naha ni rabalaki rua, a vuhuna ra ngatavine iea, i uka ma ni vakamatukapaga ma. 21 A viri i mahita turana a vorakato ge lavea tara sipsip a toga, ge bole lakea na matana Kape na Vaponga, ge a nihabi na rarenga. 22 A prister ge bolea a sipsip iea, ge rata a nihabi na rarenga na matane BAKOVI DAGI, ge kavitagua a bakovi iea, na naro hale i ratea. Lakea a naro hale vona bara ni puga vuroki.

23 “Na tahuna mu lakea na malala e Kenan, mu varo a maka kai i vona a kanena. Pali naha ni kani a kanena kai na pida ge tolu. 24 Na vana pida mu habi ne BAKOVI DAGI a maka kanena kai, ne vona ni kavurike iau vona. 25 Na limana pida mu kani a maka kanena kai. Mua bara mu ramai a maka ngava nau, a maka kai ne mua bara ri vua kupo. Iau e BAKOVI DAGI a Vure ne mua, a takia a ngava iea.

26  * Vuh 9:4; Levi 7:26-27; 17:10-14; Vin 12:16,23; 15:23; 18:10“Naha ni kani a bobona kanirau i vona a dara. Naha ni rata a malulu legelege.

27  * Levi 2:5; Vin 14:1“Naha ni pali a ivu na tabalane mua, naha ni palakudu ge kapo a ivu na sivane mua.

28 “Naha ni tolo a kuline mua na tahuna a viri i mate, naha ni siri a kuline mua. Iau e BAKOVI DAGI a takia a ngava iea.

29  * Vin 23:17“Naha ni ramai a narone huriki ri kavurike a vure ranga, ri mata taro e tune ria ngatavine ge ria a ngoi. Bara mu rata mavonga, mu ha taro iau, mu ramai a maka vure ranga, a maka naro hale bara ri bele kupo na tanga ne mua.

30  * Levi 26:2“Naha ni leho na Parava Nimalo. Mu rata kamumua mu togoa a mailo nau. Iau e BAKOVI DAGI a takia a ngava iea.

31  * Vin 18:11; 1Sam 28:3; 2Ki 23:4; Ais 8:19“Na tahuna mu ngaru a niluhoi kamumu, naha ni lakea ne huriki a bakovi na malulu, a bakovi na muto. Bara mu rata mavonga, mu muto na matagu. Iau e BAKOVI DAGI a Vure ne mua, a takia a ngava iea.

32 “Mu rata kamumu mu togo e huriki a gare. Mu mangenge nau, a Vure ne mua. Iau e BAKOVI DAGI a takia a ngava iea.

33  * Nim 22:21; Vin 24:17-18; 27:19“Naha ni rata hale e huriki a mosi ri made na malala ne mua. 34 Mu rata kamumu ria, i manga a hini mu rata kamumu a bakovi o Israel. Mu ngaru ria i manga a hini mu ngaru mule mua, a vuhuna hosi mu made manga a mosi o Egipto. Iau e BAKOVI DAGI, a Vure ne mua, a takia a ngava iea.

35  * Vin 25:13-16; Snd 20:10; Ese 45:10“Na tahuna mu rovai a maki, mu guru dili a maki, mu gi a maki ge kona e huriki, naha ni ta tami. 36 Mu rovai kamumu, mu guru kamumu, mu gi kamumu a maka maki. Iau e BAKOVI DAGI a Vure ne mua, a tuli tala mua na robo o Egipto, a takia a ngava iea.

37 “Iau e BAKOVI DAGI a Vure ne mua, a vakuku mua mu gu longototo a maka vinara nau, a nitagu.”