1 E Moses i ta tabu i ta maea, “A bakovi ni pala a dolena o ni pala vuroki a kapuna, i uka ma ge dili na vaponga ne BAKOVI DAGI.

2 “Na tahuna a bakovi i tulia a ngatavine i uka ma e girihina, muri i singou a ngatavine, i poda a koma, a koma iea i uka ma ge dili na vaponga ne BAKOVI DAGI. E huriki a hamona ranga i uka ma ri gi dili na vaponga ne BAKOVI DAGI, ge harena na hamona i ravulu.

3 *Neh 13:1-2 “E huriki a Amon, a Moab turana e huriki a hamone ria, ria ranga i uka ma ri gi dili turane huriki a tara ne BAKOVI DAGI, ge harena na hamone ria i ravulu. 4 *Gi 22:1-6A vuhuna na tahuna si pe e Egipto si valai, i uka ma ri habi a maki ni kani, a naru ne mua. Ri konea e Balam, ri takia ge takia a Vure ge ruduraha mua. E Balam, e tamana e Beor, a tanga vona e Petor na tabeke ne Mesapotamia. 5 *Gi 23:7–24:9Pali e BAKOVI DAGI a Vure ne mua, i uka ma i longototoa e Balam ge ruduraha mua. I gamai mua, a vuhuna a Vure i ngaru hateka mua. 6 I mavonga vakaroro, naha ni tuhori re huriki nga ri gi made kamumu ri gi tahoka a maki.

7 “I tahoka ranga Idom a Egipto bara ri made turane mua. Naha ni luhoi hale ne ria e huriki a Idom, a vuhuna ria a viri ne mua. E huriki a Egipto nga ranga, naha ni luhoi hale ne ria, a vuhuna hosi mu made manga mosi na robo ne ria. 8 Ge vakatubu ne huriki e tamarane ria, bara ri dili turane huriki a tara ne BAKOVI DAGI.”

9 “Na tahuna mu lakea na vabinga, e huriki a nugumaheto ne mua ri made na mada, ri gi mangenge vona a maki i uka ma i kamumu na matana Vure. 10 Na tahuna a bakovi i mahita na rodo i vurena guru, ge pagitala na mada ge made vonga. 11 Na malunga ge hilolo pasia. Na tahuna a haro ge rolo, ge hamule dili tabu na mada.

12 “E huriki a nugumaheto ri gi tahoka a tabeke ni ragilengi vona polovavo na mada. 13 Na tahuna ri ngaru ni ragilengi ri gi bole a aro, ri gi pagitala, ri gi keli na aro a lovo. Na tahuna ri ragilengi lobo ri gi kavitagu mule a lovo. 14 E BAKOVI DAGI a Vure ne hita, bara i made turane mua vakaroro na mada, ge tuhori mua bara mu rangi e huriki a pile. I mavonga a mada ni gi taba, ge ne BAKOVI DAGI kunana, lakea i uka ma ge masia tara maki ge muto na kurukurune mua, ge ngalahere ne mua.”

15 E Moses i ta tabu i ta maea, “Na tahuna a vorakato i ha na tahona, ge valai ge nana mua mu gu tuhoria, naha ni tono mulea. 16 Ia ge ngaru ni made vona tara tanga ne mua, i kamumu ge lokovonga ge vulakia tara tanga mua ge made vona, naha ni rata halea.

17 *Levi 19:29 “Mua o huriki a bakovi a ngatavine o Israel, naha ni rata mua ge mua a ngoi na roho ni vasileki na vure taminga. 18 Naha ni bole a moni na molenga mu gu bole valai na roho ne BAKOVI DAGI a Vure ne mua, ge vakaloboa tara ngava dagi mu ratea na Vure. A Vure ne mua i uka ma i ngarua a naro maea.

19 *Nim 22:25; Levi 25:36-37; Vin 15:7-11 “Na tahuna mu longo vona e turane mua tara ge koli a makoli ne mua na moni o na maki ni kani o na maki ranga tabu, naha ni takia ge ru langa tabu ranga moni ge kolia a makoli vona. 20 Pali e huriki a mosi, ri gi ru langa tabu na makoli ne ria ranga moni, ri gi koli a makoli ne ria. Ne huriki a kabukabu, naha ni taki ria ri gi ru langa tabu ranga moni. Mu ramaia a vinara ne BAKOVI DAGI a Vure ne mua, bara i gamai lobo a maki mu rata vona na malala bara mu vano mu made vona.

21 *Gi 30:1-16; Mat 5:33 “Na tahuna mu ratea tara ngava muholi turane BAKOVI DAGI a Vure ne mua, mu rata malaviriria. A Vure i uka ma ge lohopile vona a nita muholi iea, pali mua i uka ma mu ramaia, bara mu tahoka a ngava. 22 Mua i uka ma mu rata a ngava muholi turane BAKOVI DAGI, bara mu uka a ngava. 23 Pali mua mu rata a ngava muholi na ningaru ne mua kunana, mu ramai muholia a nita muholi mu ratea.

24 “Na tahuna mu polokudu a hania na vain ne turane mua, mu kani a kanena vain na ningaru ne mua. Pali naha ni tahoni na kulopi mu gu vano turana. 25 Na tahuna mu polokudu a hania na vit ne turane mua, a vutuna vit mu vila na limane mua mu kani. Pali naha ni vali ranga vit na vito.”