1 Ngane ga koli a ngavane mua mu here puru na raukea. A bakovi, i kamumu i uka ma ge mahita turana ngatavine. 2 Pali a vuhuna a naro na molenga i bele dagi hateka, i kamumu a bakovi takutaku ge tahoka e girihina, a ngatavine takutaku ge tahoka e girihina. 3 A kakaina bakovi ne vona e girihina, i uka ma ge vakatokua. I mavonga kunana, a kakaina ngatavine ne vona e girihina. I uka ma ge vakatokua. 4 A ngatavine i uka ma i matakari mulea a kakaina. E girihina i matakaria. I mavonga kunana, a bakovi i uka ma i matakari mulea a kakaina. E girihina i matakaria. 5 A mata girihina rua i uka ma ru gu valohopile. Pali bara ru ngaru ni varodo a ngava, ru gu malo popote taro, ru gu vasileki, i uka ngava. Pali muri, ru gu made palupu tabu, ma ge toni rua e Satan, a vuhuna ru keri ni pahadanu a ningaru hale na kakaine rua. 6 I uka ma a vakuku mua. A ta kunana, a naro iea, mu ngaru ni ramaia, mu ramaia. 7 I kamumu e huriki lobo ri gi manga iau. Pali a Vure i vakabagetu hita takutaku na ningaru si gi ramaia.

8 Mua e huriki a bakovi i uka ma mu parangi, turana mua e huriki a havuri, a ta maea, i kamumu mu gu made manga ori, manga iau. 9 *1Tim 5:14Pali a viri i keri ni pahadanu a ningaru na kakaina, i kamumu ge parangi, ma ge ratapilea a ningaru dagi na kakaina.

10 *Mat 5:32Mua e huriki mu parangi pali, a vakuku mua (i uka ma i iau, e Bakovi Dagi i vakuku mua): mua e huriki a ngatavine, naha ni ha taroa e girihine mua. 11 (Pali a ngatavine ge ha taroa e girihina, nahea ge parangi tabu. O i kamumu ge hamule mai e girihina). Pali mua e huriki a bakovi, naha ni pile e girihine mua.

12 Pali e huriki ranga ri parangi pali, a ta maea (i uka ma e Bakovi Dagi, iau a ta maea): e rei a bakovi, a turane teu, e girihina i uka ma i luhoi torea e Kristo, pali ra ngatavine iea i vivi kunana ni made turana, nahea ge pilea. 13 I mavonga kunana, a ngatavine tara, e girihina i uka ma i luhoi torea e Kristo, pali a bakovi iea i vivi kunana ni made turana, nahea ge pilea. 14 A bakovi i uka ma i luhoi torea e Kristo, pali e girihina i luhoi torea e Kristo, ngane a bakovi iea, a Vure i matakaria. E huriki e tuna ranga, a Vure i matakari ria. A ngatavine i uka ma i luhoi torea e Kristo, pali e girihina i luhoi torea, ngane a ngatavine iea a Vure i matakaria. E huriki e tune rua, ranga a Vure i matakari ria, i uka ma i biu ria. 15 *Rom 14:19Pali a bakovi o a ngatavine, ra i uka ma i luhoi torea e Kristo, i ngaru ni ha taroa e girihina, naha ni ta karia. Ge vano. Ge bele maea a hini, a viri i luhoi torea e Kristo i matukapaga ne girihina, a vuhuna a Vure i gale mua mu gu made na nivalemu. 16 *1Pe 3:1Mua e huriki a ngatavine, ma ge matai a naromu e girihimu, ge pulo a vilona. Pali mua e huriki a bakovi, ma ge matai a naromu e girihimu, ge pulo a vilona.

17 A ra nimade e Bakovi Dagi i habi ne hita takutaku, si gi ramai kunana. A ra nimade a Vure i gale hita takutaku vona, si gi laho vona. A vinara iea, a vakuku mua e huriki a tara ne Kristo vona. 18 E huriki a Vure i gale ria, ni pala pali a kuline ria, naha ri gi pulo a kuline ria ni pala. E huriki, a Vure i gale ria, pali i uka ma ni pala ma a kuline ria, nahea ni gi pala a kuline ria. 19 *Rom 2:25; Gal 5:6; 6:15A viri ni pala a kulina, o i uka ma ni pala a kulina, a maki tavula. A maki dagi, a viri ge longototo a vinara na Vure. 20 Si made navai na tahuna a Vure i gale hita, si gi made kunana vona ra nimade iea. 21 A Vure i gale ioe na tahuna ioe a vorakato? Naha ni loho lege. Pali ge tahoka tara dala go matukapaga vona, o ratea, go matukapaga. 22 *Pmn 16; 1Pe 2:16A viri a Vure i galea na tahuna ia a vorakato vona, ngane i rihi e Bakovi Dagi, i matukapaga pali na matane Bakovi Dagi. Pali a viri i uka ma a vorakato na tahuna e Bakovi Dagi i galea, ngane ia a vora ne Kristo. 23 A Vure i kona mua na mapa dagi, i mavonga, nahea mu gu bele manga a vorakato ne huriki a bakovi. 24 I mavonga, mua e huriki a turagu, mu made navai na tahuna a Vure i gale mua, mu made mavonga kunana turana Vure.

25 Ngane ga here a ngava ne huriki i uka ma ri parangi ma. E Bakovi Dagi i uka ma i habi nau ranga vinara. Iau kunana a habi ne mua a niluhoi kamumu nau, a vuhuna e Bakovi Dagi i dodo iau, i rata iau, iau a bakovi ni ta muholi. 26 A parava mona, a tahuna na nimava, lakea iau a luhoi i kamumu e huriki i uka ma ri parangi ma, ri gi made mavonga kunana. 27 O parangi pali? Naha ni ha taroa e girihimu. Pali ioe i uka ma o parangi ma, naha ni matakana a viri go parangi vona. 28 Pali ioe o ngaru ni parangi, i uka maki. I uka ma o rata hale. A ngatavine i uka ma i parangi ma, lakea i parangi, i uka maki. I uka ma i rata hale. Pali e huriki ri parangi, bara i bele ne ria a maregoa na malala. A koi mu gu dili na maregoa, lakea a taki mua nahea mu gu parangi. 29 Mua e huriki a turagu, a pelegona ngava nau i maea: a parava i uka ma i kupo ngane. I vakatubu ngane, e huriki ri parangi, nahea ri gi luhoi hateka a naro na parangia. 30 E huriki ri tangi, nahea ri gi tangi hateka. E huriki ri vivi, nahea ri gi luhoi kunana a nivivi ne ria. E huriki ri kona a maki, nahea ri gi luhoi hateka a maki nga. 31 *1Ion 2:17E huriki ri leho na maki na malala, ri gi made manga a leho iea i uka ma i dagi hateka na matane ria, a vuhuna a malala, ra si masia mona, i popote ge lobo.

32 A ngaru ge uka tara maki mu gu loho lege vona. A bakovi i uka ma i parangi ma bara i luhoi hateka a leho ne Bakovi Dagi, a ra ge ratea, ge vivi vona e Bakovi Dagi. 33 Pali a bakovi i parangi pali, bara i loho lege vona a maka maki na malala, a ra ge ratea, ge vivi vona e girihina, 34 lakea bara i loho rua. A ngatavine i uka ma i parangi ma, bara i luhoi kunanea a leho ne Bakovi Dagi. I ngarua a kakaina, a hanuna ge ne vona a Vure kunana. Pali a ngatavine i parangi pali, bara i loho lege vona a maka maki na malala, a ra ge ratea ge vivi vona e girihina. 35 A ta maea, i uka ma ga ta pupukari mua. A ta maea, ga kori mua, mu gu ramai a naro kamumu, mu gu habi vakaroro a hatene mua ne Bakovi Dagi.

36 E rei a bakovi i luhoi ta i uka ma i rata kamumu hatekea a ngatavine ni habikari vona, a ningaru vona i kinigao hateka, lakea i masia bara i kamumu ru gu parangi, i uka maki. Ge ramai a ningaru vona, ru gu parangi. I uka ma ru rata hale. 37 Pali a bakovi iea ge pesi tora na niluhoi na hatena, i uka ma i ngaru ni parangi a vuhuna i matakari kamumu a ningaru na kakaina, i luhoi kado pali i uka ma ge parangi, ra bakovi iea i rata kamumu. 38 I mavonga, a bakovi iea ge parangi vona a viri ni habikari vona, i rata kamumu. Pali i uka ma ge parangi, bara i rata kamumu hateka.

39 *Rom 7:2-3A ngatavine ge made kunana turana e girihina, ge vano ge harena na tahuna i mate. Pali e girihina ge mate, ngane bara i parangi tabu na ningaru vona. Pali ge parangi vona a bakovi i luhoi torea e Bakovi Dagi. 40 Pali iau a luhoi, i uka ma ge parangi tabu, bara i vivi. A luhoi a Hanuna Vure i made turagu, lakea a ta maea.