1 *Apo 15:29Ngane ga taki mua vona a kania ni habi na vure ranga. Si lohoka vona a ngava iea, “Hita lobo si tahoka a lohokanga.” Pali a “lohokanga” iea i vakabele a tagenga. Pali a naro na nivangaru i vakatora hita. 2 *Gal 6:3E rei a viri i pahaluhoi ta i lohoka pali, i uka ma i lohoka kamumu ma. 3 Pali e rei a viri i ngarua a Vure, a Vure i matakilalea a bakovi iea.

4 *Vin 4:39; 6:4; Gal 4:8I mavonga, a naro ni kani a kania ni habi na vure ranga, si lohoka vona a ngava iea, “A maka vure ranga, i uka ma ri muholi.” A ngava tara i maea, “A Vure i taku kunana.” 5 I muholi, i tahoka a maki i kupo na hunu, na malala, e huriki ranga ri taki ta a vure. A maki ni gale a vure, a bakovi dagi, ri kupo. 6 *Epe 4:5-6Pali ne hita, a Vure i taku kunana, re Tamane hita, ra i ratarike a maki lobo. Hita a ngate vona. A Bakovi Dagi i taku kunana, re Isu Kristo. Na limana kunana, a Vure i ratarike a maki lobo. I habi ne hita a nimahuri karaba.

7 Pali e huriki ranga i uka ma ri lohoka vona a ngava nga. Hosi ri kavurike a maka vure tebi. Ri luhoi ta a vure muholi, lakea ngane na tahuna ri kani a kania ni habi lakea na vure nga, ri hataki hale, ri hataki ri katoki, a vuhuna ri loho lege, ri gi kani o i uka? 8 Pali a maki si kani, o i uka ma si kani, i uka ma ge rata hita si gi malamala na matana Vure. I uka ma si kani, i uka ma ge rata hita si gi hale. O si kani, i uka ma ge rata hita si gi kamumu.

9 *Rom 14:13-15; Gal 5:13Pali mu matadoko. A maki o lohoka vona i uka ma i hale go ratea, ma ge rata e huriki i uka ma ri luhoi tora hateka ri gi boru. 10 Ma ge matai ioe, ra ioe o tahoka a lohokanga, o kani na roho na vure tara. Bara o vakarike a hatena bakovi iea, ra i uka ma i tora a niluhoi vona, bara i kani a kania ni habi na vure tara. 11 *Rom 14:15,20I mavonga, a lohokanga vomu i ratapilea a bakovi iea, ra i uka ma i tora a niluhoi vona. Pali ia a turamu. E Kristo i mate vona. 12 Na naro iea, mu rata a naro hale ne huriki e turamu, mu vakavaroru a niluhoi ne ria, a vuhuna i uka ma ri tora. Ngane mu rata a naro hale ne Kristo. 13 *Rom 14:21I mavonga, a ra maki a kani ge ratea a turagu ge boru, bara pilea, i uka ma ge boru a turagu.