46
E Iakop i Lakea o Egipto
E Israel i ru palupu lobo a maka mahala vona, i bole e huriki a kabu vona ri vano ri bele vona a tanga e Bersiba. Muri i bolea a sipsip a bulmakau i rabalaki, i habi na Vure ne tamana e Isak. Na rodo i vurena vona a Vure i bele vona i galea, “Iakop! Iakop!”
E Iakop i ta maea, “Iau ieni.”
Lakea a Vure i ta maea, “Iau a Vure, a Vure ne tamamu. Naha ni mangenge ni puru o Egipto. Ga rata ioe ge ioe a vuhuna kabu dagi tara. Ga puru turamu o Egipto, muri ga taparaki mule ioe. Na tahuna o mate, e Iosep ge tanu ioe.”
E huriki e tune Israel, ri vakarike na karis e tamane ria turana e huriki e tune ria, e girihine ria. A maka karis nga, i rudu sike e Parao, ge bole ria. Ngane e Iakop i pea e Bersiba. * Apo 7:15Ri vakamariu lakea o Egipto a maka sipsip a bulmakau, a mahala ra ri vakabele o Kenan. E Iakop i mariu lakea o Egipto turana e huriki e tuna bakovi, e tuna ngatavine, e tubuna mai.
A rane e huriki a hamone Israel ri puru o Egipto ra nga: E Iakop turana e Reuben, a tabua vona. E huriki e tune Reuben a bakovi ra nga: e Hanok, e Palu, e Herson, e Karmi.
10 E huriki e tune Simion a bakovi ra nga: e Iemuel, e Iamin, e Ohad, e Iakin, e Sohar, e Saul. E Saul, e kinana a ngatavine o Kenan.
11 E huriki e tune Levi a bakovi ra nga: e Gerson, e Kohat, e Merari.
12 E huriki e tune Iuda a bakovi ra nga: e Er, e Onan, e Sela, e Peres, e Sera. E Er rua e Onan ru mate na robo e Kenan.
E tune Peres a bakovi ra nga: e Hesron, e Hamul.
13 E huriki e tune Isikar a bakovi ra nga: e Tola, e Puva, e Iob, e Simron.
14 E huriki e tune Sebulun a bakovi ra nga: e Sered, e Elon, e Ialil.
15 E huriki tune Iakop nga i poda e Lea o Padan-Aram. E Daina e kurabane ria, ia tara ni poda vonga. E huriki a hamone Iakop rua e Lea ri ala ravulu tolu a polona i tolu.
16 E huriki e tune Gad a bakovi ra nga: e Sipion, e Hagi, e Suni, e Esbon, e Eri, e Arodi, e Areli.
17 E huriki e tune Aser a bakovi ra nga: e Imna, e Isva, e Isvi, e Beria. E kurabane ria a rana e Sera.
E tune Beria a bakovi ra nga: e Heber e Malkiel. 18 Re huriki nga ri ala ravulu a polona i polotara, a hamone Iakop rua e Silpa. Ra ngatavine iea, e Leban i habia ne Lea, ga vorakato vona.
19 E Iosep e Bensamin, e kinane rua e Resel, re girihine Iakop tara. 20  * Vuh 41:50-52Na tahuna e Iosep i made o Egipto, i parangi vona e Asenat, e tuna prister tara a rana e Potipera na tanga e Heliopolis. E Asenat i poda e Epraim rua e Manase.
21 E huriki e tune Bensamin a bakovi: e Bela, e Beker, e Asbel, e Gera, e Naman, e Ehi, e Ros, e Mupim, e Hupim, e Ard. 22 Re huriki a bakovi nga, a hamone Iakop rua e Resel, ri ala ravulu a polona i va.
23 E tune Dan a bakovi i taku kunana. A rana e Husim.
24 E huriki e tune Naptali a bakovi: e Iasiel, e Guni, e Ieser, e Silem. 25 Re huriki a bakovi nga, a hamone Iakop rua e Bila, ra ngatavine e Leban i habia ne Resel ga vora vona. Ni gi palupu, ri ala polorua.
26 E huriki a hamone Iakop, ra ri lakea o Egipto, ri ala ravulu polo tara a polona i polotara (66). I uka ma ni gi e huriki e girihine ria. 27  * Apo 7:14Ni gi turane tune Iosep ala rua ra ni poda o Egipto, ria lobo ri ala ravulu polo rua (70).* Na lain 26 i taki e huriki a bakovi ri ala 66. Pali koea ni bole dili tabu a viri ala rua. Ngane ni gi palupu lobo ri ala 68 kunana. Pali ne lain 27, i taki ria lobo ri ala 70. Ra viri ala rua tabu, i uka ma ni lohoka vona. Pali e huriki a bakovi na lohokanga ri luhoi ta e Iosep rua e Iakop. 28 E Iakop i rudua e Iuda ge muga ge takia e Iosep ge tagui ria o Gosen. Na tahuna ri laho lokovonga na robo e Gosen, 29 e Iosep i bolea a karis vona, i lakea o Gosen, ge taguia e tamana, re Israel. Na tahuna i masia e tamana, i rakoa i mate ni taringia. 30 Lakea e Israel i takia e Iosep, “Ngane iau ga mate, a vuhuna a matai ioe pali, o tabana ni mahuri.”
31 Muri e Iosep i taki e huriki e turana, a kabu vona, i ta maea, “Ga lakea ne Parao ga takia ga ta maea, ‘E huriki e turagu, a kabu nau, ra ri made na robo e Kenan, ri valai pali. 32 E huriki a bakovi nga ri matakari a sipsip. Ri bole valai ngane a kabu na sipsip, a bulmakau, a maka mahala lobo ne ria.’ 33 Na tahuna e Parao ge gale dili mua ge nana na a ra leho mu lohoka vona, 34 mu ta maea, ‘Bakovi dagi, mi matakari a sipsip a bulmakau na tahuna mi kiroko vona i valai i harena mona. I manga a leho i rata e tamane mia muga.’ Muri bara i longo vona a robo e Gosen bara mu made vona, a vuhuna e huriki a tahotanga ri marikoi hateka ni made turana e huriki ri matakari a sipsip.”

*46:6: Apo 7:15

*46:20: Vuh 41:50-52

*46:27: Apo 7:14

*46:27: Na lain 26 i taki e huriki a bakovi ri ala 66. Pali koea ni bole dili tabu a viri ala rua. Ngane ni gi palupu lobo ri ala 68 kunana. Pali ne lain 27, i taki ria lobo ri ala 70. Ra viri ala rua tabu, i uka ma ni lohoka vona. Pali e huriki a bakovi na lohokanga ri luhoi ta e Iosep rua e Iakop.