1 E Iabin a hariki na tanga e Hasor i longo a maka nuverei na maka maki e Iosua i rata. I talo rike a ngava lakea ne Iobap a hariki na tanga e Madon, a hariki na tanga e Simron, a hariki na tanga e Aksap. 2 I talo rike tabu a ngava ne huriki a hariki na tanga na lolo na tabeke mule sike, ne huriki a hariki na bilane Iordan na tabeke mule puru na darilomu e Galili, ne huriki a hariki ri made na kupona na tabeke na nirolona haro, ne huriki a hariki ri made na lavu tabukoi na tanga e Dor. 3 I talo rike a ngava tabu lakea ne huriki a Kenan ri made tabukoi na naru e Iordan, ne huriki a tara ri made na maka tanga na lolo, re huriki a Amor, a Hiti, a Peres, a Iebus. I talo rike tabu a ngava lakea ne huriki a Hivi ra ri made tabukoi na lolo e Hermon na malala ne huriki a Mispa. 4 E huriki a hariki nga ri longoa a ngava iea, ri valai turane huriki a nugumaheto ne ria. E huriki a nugumaheto ne ria ri ala kupo hateka manga a hire na lavu. A maka hos a karis ne ria ranga i kupo hateka. 5 Ri ru palupu e huriki a tara ne ria, ri vaubi turane huriki a Israel. A mada ne ria ri ratea tabukoi na naru e Merom.

6 Lakea e BAKOVI DAGI i takia e Iosua, “Naha ni mangenge ne ria. Kuduvi na tahuna maea ga tuhori e huriki a Israel ri gi rabalaki e huriki a pile. Mu toloputu a maka vahana hos ne ria, mu rungani a maka karis ne ria.” 7 Na tahuna e huriki a pile ri tababana ni kisi puru a maki na vabinga ne ria, e Iosua turane huriki a nugumaheto vona ri malaviriri kunana ri vakatubu a vabinga ne ria na naru e Merom. 8 E BAKOVI DAGI i tuhori e huriki a Israel ri mulangi na vabinga, ri rangi e huriki a pile. E huriki a Israel ri valili sike ne ria i harena na tanga e Sidon e Misrepot-Maim. Muri ri valili ne ria, ri lakea na tabeke na nirikena haro na maloku ne Mispa. Ri vaubi turane ria, ri vakalobo liu ria. 9 Lakea e Iosua i toloputu a maka vahana hos i rungani a maka karis ne ria, i ramai a ngava i takia e BAKOVI DAGI.

10 Na tahuna iea e Iosua i hamule, i bolea a tanga e Hasor, i rabalakia a hariki vona. E Hasor i matakari a robo lobo nga. 11 E huriki a Israel ri rabalaki lobo e huriki a tahotanga ne Hasor, i uka tara viri ge mahuri. Muri ri rungania a tanga iea.

12 E Iosua i nugutata lobo e huriki a hariki i bole a maka tanga ne ria. I rabalaki lobo e huriki a tahona, i manga a ngava i taki e Moses a vora ne BAKOVI DAGI. 13 Pali e huriki a Israel i uka ma ri rungani a maka tanga ni rata na maka kupona. A tanga i takia e Iosua ni gi rungani kunana e Hasor. 14 E huriki a Israel ri bole lobo a mahala a bulmakau na tanga nga. I uka ma ri togoa tara viri. Ri rabalaki lobo ria. 15 Muga e BAKOVI DAGI i habi a ngava na vora vona e Moses. Muri e Moses i habi ne Iosua a ngava nga, lakea e Iosua i ramai lobo. E Iosua i rata lobo a maki i manga a ngava e BAKOVI DAGI i taki e Moses vona.

16 E Iosua turane huriki a nugumaheto vona ri bole loboa a malala iea, i vakatubu meli i harena tano. Ri bole lobo a maka tabeke na lolo a rihuhu, a maka tabeke lobo ne Negev ne Gosen, a maka kupona na tabeke na nirolona haro, a maloku ne Iordan, ra maka bila a kupona ne Israel. 17-18 A kilakilana malala iea i tubu na lolo e Alak tabukoi o Idom na tabeke mule puru, i lakea liu na tanga e Bal-Gad na maloku ne Lebanon tabukoi na lolo e Hermon na tabeke mule sike. E Iosua i vaubi tabaka turane huriki a hariki nga, i rabalaki lobo ria. 19 Pali e huriki a Hivi na tanga e Gibeon, ri valongo mai a ngava turane huriki a Israel, ri made turane ria na nivalemu. Pali e huriki na maka tanga ranga, i uka ma ri rata mavonga, lakea e huriki a Israel ri ratapile ria. 20 *Vin 7:16E BAKOVI DAGI kunana i rata e huriki a pile ri pesi tora na vabinga, lakea e huriki a Israel i uka ma ri dodo ria. E huriki a Israel ri ramai a ngava hosi e BAKOVI DAGI i habia ne Moses, lakea ri vakalobo liu ria.

21 Na tahuna iea e Iosua i vano i ratapilea a kabu ne Anak,*E huriki a Anak ri koru dagi hateka, ri made o Palestina muga ne huriki a Israel ri valai. ra ri made na maka lolo na tanga e Hebron, e Debir, e Anab na maka tabeke ranga ne Iuda, ne Israel. E Iosua i vakalobo liu e huriki nga, i ratapile a maka tanga ne ria. 22 I uka tara Anak ge made o Israel. Pali i tahoka kunana a viri popote ri made na tanga e Gasa, e Gat, e Asdod. 23 E Iosua i bole loboa a malala iea, i manga a ngava e BAKOVI DAGI i taki e Moses vona. E Iosua i habia ne huriki a Israel ga robo ne ria liu. I ru a nagi na malala iea, i veru tala takutaku na kabu ne Israel. Muri i uka tabu a vabinga vona a malala iea.