24
A Vinara ni Matakari a Lam
1 E BAKOVI DAGI i takia e Moses, 2 “O vakuku e huriki a Israel ri gi bole valai a namona oliv, ne vona a maka lam ri tabuli pololilo na kape nau. E huriki a prister ri gi nami na rodo vakaroro a lam nga. 3 E Aron ge nami ria na malunga liu, ri gi para na rodo ge harena na hatelanga pokopoko. A lam nga ri gi tabuli polovavo na kala dagi i naviri mule a Tava na Ngava Dagi na Kape na Vaponga. A vinara iea, a habia ne mua, mu gu ramai vakaroroa. E huriki a hamone mua ranga, ri gi ramaia. 4 E Aron ge matakari kamumu a maka lam ri tabuli langa na butu ni rata na gol kabakaba, ri gi para vakaroro na matane BAKOVI DAGI.
A Bret Ni Habi ne BAKOVI DAGI
(Nimariu 27:20-21)
5 *Nim 25:30“O bole a plaoa kamumu o rata a bret ge ravulu a polona i rua. O guru tala a kilo ge rua na plaoa, o ratea a bret ge taku. 6 Muri o ru a bret nga na dede ni rata na gol na matagu. O ru na tete ge rua a maka bret, a bret ge polotara na tete i taku. 7 O ru ranga havu mangisipa ni gi rungani, ge huli a mangina turana a tete na bret ge rua, muri ri gi habi ne BAKOVI DAGI a havu mangisipa, ge a nihabi ni gutu na kanono, ge ratea e BAKOVI DAGI ge luhoi mule ra bret nga. 8 E Aron ge ru na dede na matane BAKOVI DAGI a maka bret na Parava Nimalo lobo. A nihabi iea, a nihabi ne huriki a Israel, ri gi ramai vakaroroa a ngava dagi iea, ri gi ratea a naro iea. 9 *Mat 12:4; Mrk 2:26; Luk 6:4Ra bret nga ne vona e Aron turane huriki a prister na kabu vona. Ri gi kani pololilo na Tabeke Nitaba, a vuhuna ra maki ni kani nga a kalavana nihabi ni taba hateka, ni gutu na kanono ni habi nau. Ra kalavana nga, ne vona e huriki a prister ri gi kani vakaroro.”
A Viri i Harogi a Vure Ni Gi Vakamadihi
10-11 A bakovi tara, e tamana a Egipto, e kinana a Israel. A rane kinana e Selomit, e tune Dibri na kabu ne Dan. Re tune Selomit i made na mada, i vaubi turana a Israel tara. Na tahuna ru vaubi, ra bakovi iea i kurahi a rane BAKOVI DAGI i harogia. Muri ri turari lakea ne Moses. 12 Lakea e Moses i ru dilia na bavi, ge davea e BAKOVI DAGI, ge takia na a ra naro ge rata virihia vona.
13 Lakea e BAKOVI DAGI i takia e Moses, 14 “O turari talea na mada a bakovi iea. E huriki ri longoa i harogi iau, ri gi ru langa na gina a limane ria. Ri rata mavonga, ri gi vakasiria ra bakovi iea i tahoka a maregoa pali, ri gi padimatea na kedo. 15 Muri o taki e huriki a Israel, e rei a viri i harogi iau, i tahoka a ngava. Bara i bole a vuranga vona. 16 A Israel, o a mosi i kurahi a ragu na tahuna i harogirogi, ra bakovi iea ni gi padimate na kedo.
A Naro ni Koli
17 *Nim 21:12“E rei a viri i rabalaki a bakovi, ni gi rabalaki. 18 E rei a viri i rabalaki a kanirau na bakovi tara, ge kolia a kanirau na bakovi iea. 19 Bara bakovi i ratapile a kakaina viri, mu koli mu ratapilea a kakaina. 20 *Nim 21:23-25; Vin 19:21; Mat 5:38Bara bakovi i ubiputu a tuhana viri, mu koli mu ubiputua a tuhana. A bakovi i ratapile a matana viri, mu koli mu ratapilea a matana. A bakovi i ubisigo a ngina viri, mu koli mu ubisigo a ngina. A bakovi i rata hale navai a viri, mu koli mu rata mavongea. 21 A bakovi i rabalaki a kanirau, ge kolia a kanirau i rabalakia. Pali a bakovi i rabalaki a viri, a bakovi iea ni gi rabalaki. 22 *Gi 15:16Ra vinara iea ne vona e mua e huriki a tahotanga ne Israel, turana a mosi ri made turane mua. Iau e BAKOVI DAGI, a Vure ne mua, a takia a ngava iea.”
23 Muri e Moses i taki e huriki a Israel, ri turari talea ra bakovi i harogia a Vure, ri padimatea na kedo. Na naro iea kunana e huriki a Israel ri ramaia a vinara e BAKOVI DAGI i vakuku e Moses vona.