1 E Isu i dili na tanga e Ieriko, ta ge laho polo. 2 A bakovi tara i made vona a tanga iea, a rana e Sakeus, a bakovi i muga ne huriki a bakovi ni bole a takis. Ia a bakovi na mahala. 3 I ngaru ni masia e Isu, pali i keri ni masia a vuhuna i kapo, i kupo hateka e huriki ri vapesihi halui e Isu. 4 Lakea e Sakeus i nunu muga na dala, i rike na kai a pik, ge made langa, ge matai kamumua e Isu na tahuna i laho polo.

5 Na tahuna e Isu i bele vona a hini nga, i mata rike, i masia e Sakeus, lakea i takia, “Sakeus, o puru valai malaviriri! Mona ga made turamu na ruma vomu.”

6 Lakea e Sakeus i puru malaviriri, i vivi hateka ni taguia e Isu. 7 *Luk 15:2E huriki ri masia ri ta barangungu, ri ta maea, “Re Isu, i navai i vano i made turana bakovi hale iea?”

8 *Nim 22:1; Gi 5:6-7Na tahuna ri made na ruma, e Sakeus i pesi rike, i takia e Bakovi Dagi, i ta maea, “Ga veru na naguna ge rua a maki lobo nau. A tabekena tara ga habi ne huriki a matasia. E huriki a tami ria hosi, a panaho a maki ne ria, ga koli balaka va tabu.”

9 *Luk 13:16; Apo 16:31Lakea e Isu i takia i ta maea, “Mona a Vure i korimule e huriki na ruma iea, a vuhuna ra bakovi iea, ia tara a hamone Abraham. 10 *Luk 15:4; Ion 3:17; 1Tim 1:15A Tuna Bakovi i valai ge matakana e huriki ri velu, ge korimule ria.”

11 E huriki ri talangaki a ngava i taki, lakea e Isu i taki tabua ne ria tara nita vaka­kika, a vuhuna i valai tabukoi pali o Ierusalem, e huriki ri luhoi ta a harikianga na Vure i popote ge valai. 12 Lakea e Isu i taki ria i ta maea, “A bakovi dagi tara ta ge havai lakea na tanga basi, ni gi rata ge ia a hariki, muri ge hamule valai, ge matakari a harikianga. 13 Lakea i gale valai a vora vona ala ravulu, i habi ne ria takutaku a moni dagi.*A moni i habi ne ria ni gale a ‘mina.’ A mina i taku i manga a mapana bakovi ge leho na keva i tolu. Lakea i taki ria i ta maea, ‘Mu rata a leho vona a moni nga ge harena na tahuna ga hamule valai vona.’ Muri i vano.

14 “Pali e huriki na tanga vona ri marikoi vona. Lakea ri rudu muri vona e huriki a vinuru, ri gi ta maea, ‘Mi marikoi vona a bakovi iea. Nahea ge ia a hariki ne mia.’

15 “Pali na tahuna i bele vona a tanga basi iea, ni rata ia a hariki. Na tahuna i hamule na tanga vona, i ta maea, ‘Mu gale valai nau e huriki a vora a habi a moni ne ria, ri gi vakasiri iau vona i riva tabu ri vakabele.’

16 “I valai muga a vora tara, i ta maea, ‘Bakovi dagi, iau a leho vona a moni vomu, a vakabele tabu a moni vomu i ravulu.’

17 *Luk 16:10“Lakea a hariki i takia a vora i ta maea, ‘Kamumu hateka! Ioe a vora kamumu. Ngane o matakari a tanga dagi ge ravulu, a vuhuna o rata kamumu a leho kiroko.’

18 “Muri i valai tabu tara vora, i ta maea, ‘Bakovi dagi, a leho vona a moni vomu, a vakabele tabu a moni vomu i lima.’

19 “Lakea a hariki i takia a vora i ta maea, ‘Ioe ngane o matakari a tanga dagi ge lima.’

20 “Muri i valai tabu tara vora, i takia a hariki, i ta maea, ‘Bakovi dagi, a moni vomu o habi nau, a sivu na marapena kala a ruhulolo. 21 A rata mavonga, a vuhuna a mangenge vomu, ioe a bakovi hateka. A mahala i vakabele e huriki, o bole. A maki ni kani i varo e huriki, o bole.’

22 “Muri a hariki i takia a vora, i ta maea, ‘Ioe a bakovi hale! Na ngavamu kunana ga vakasiri e huriki ne ioe o rata hale. Ioe o lohoka nau, iau a bakovi hateka, a bole tavula a mahala ne huriki, a bole tavula a maki ni kani ne huriki. 23 Pali i navai o uka ma o ru dili na tava a moni nau? Na tahuna a hamule valai, bara bole mule turana ranga moni o vakabele tabu.’

24 “Lakea a hariki i taki e huriki ri pesi tabukoi i ta maea, ‘Mu bole mule vona a moni a habi vona rira, mu habia na viri i vakabele tabu a moni i ravulu.’

25 “Ri takia ri ta maea, ‘Bakovi dagi, a vora iea i tahoka pali a moni i ravulu.’

26 *19:26 Mat 13:12; Luk 8:18“Pali a hariki i ta maea, ‘E huriki ri tahoka pali a maki bara ni habi tabu ranga. Pali e huriki ri uka a maki bara ni bole mule lobo a maki popote ri tahoka. 27 Pali ngane i vai e huriki a gimagu ri koi nau ge iau a hariki ne ria? Mu bole valai ria mu rabalaki ria na matagu.’ ”

28 E Isu i taki loboa a nita vakakika iea, muri i laho lokovonga o Ierusalem. 29 Na tahuna i valai tabukoi na tanga e Betpage e Betani, na dahana lolo e Oliva, i rudu muga a murimuri vona ala rua, 30 i ta maea, “Muru muga lakea na tanga kiroko lake. Na tahuna muru dili vona, bara muru masia a tuna donki ni kolotata vonga. A tuna donki iea, i uka tara viri ge rike vona ma. Muru pugea, muru bole vilia. 31 A viri tara ge nana marua, ge ta maea, ‘I navai muru pugea a donki iea?’ Muru takia muru ta maea, ‘E Bakovi Dagi i tahoka a leho vona.’ ”

32 A murimuri nga ru vano ru dili na tanga, ru masia a tuna donki i manga a hini i takia ne rua e Isu. 33 Na tahuna ru pugea, i pagitala a tahona, i nana rua i ta maea, “I navai muru pugea a tuna donki iea?”

34 Lakea a murimuri nga ru koli, ru ta maea, “E Bakovi Dagi i tahoka a leho vona.”

35 Muri ru lalua a tuna donki lakea ne Isu, ru vulala na bitona a varakia ne rua, ru vakarikea vona e Isu. 36 Lakea e huriki ri vulala puru na dala muga na donki a varakia ne ria, i laho langa vona a donki.

37 I valai tabukoi ngane o Ierusalem, na tabeke na dala i raga valai na lolo e Oliva. Ngane e huriki a murimuri lobo ri gale dagi, ri kavurikea a Vure vona a maka nivakasiri ri matai, ri ta maea,

39 Lakea e huriki a Pariseo ranga, ra ri laho turane huriki, ri takia e Isu ri ta maea, “Mari ni tovo, o taki e huriki a murimuri vomu nahea ri gi taki a ngava nga.”

40 Lakea e Isu i koli, i ta maea, “A taki mua, ria bara ri ngavarubu, a maka kedo bara ri gale tala.”

41 Na tahuna e Isu i bele tabukoi o Ierusalem, i masia a tanga, i taringia, 42 i ta maea, “Mua o huriki a bakovi o Ierusalem, bara mu lohoka nau, bara mu made na nivalemu. Pali i uka ma mu matakilala iau. 43 Lakea a parava bara i valai, e huriki a pile ne mua bara ri pesi halui mua, ri gi keli kadolu rike a malala na nure, lakea e huriki a pile bara ri page poloa a nure, ri dili na tanga, ri bolea. 44 *Luk 21:6Bara ri ratapile a tanga turana e huriki ri made pololilo vona. I uka tara kedo ge tabuli langa vona tara kedo tara. Bara i bele a maki nga, a vuhuna i uka ma mu matakilaka vona a parava i valai vona a Vure ge korimule mua.”

45 Muri e Isu i dili na roho na Vure, i vaka­tubu ni lili tala e huriki ri vakona ri vahabi a maki pololilo. 46 *Ais 56:7; Jer 7:11I taki ria, i ta maea, “A ngava ni here puru na Hinere i ta maea, ‘A roho nau, a roho na ni vasileki.’ Pali mua mu ratea i manga a hini ri haniu vona e huriki a panaho.”

47 *Luk 21:37Muri e Isu i vara na roho na Vure na parava lobo. Lakea e huriki a prister dagi, a mari na vinara, a bakovi dagi, ri matakana a dala ri gi rabalakia e Isu vona. 48 Pali i uka ma ri matavisia tara dala, a vuhuna e huriki lobo ri ngaru hateka a ngavana.