1 E Isu i pea a tanga iea, i vano turana e huriki a murimuri vona, ri lakea na tanga vona. 2 *Ion 7:15Na Parava Nimalo e Isu i vakatubu ni vara pololilo na roho na vaponga. Na tahuna e huriki ri longoa ri turutu vona, ri nana, “Ra bakovi iea, i bole vai a naro nga? E rei i habia vona a lohokanga, a nitora ni rata a nivakasiri? 3 Ia a mari ni hae a roho kunana. Pali e kinana, e Maria, e tarina e Iakop, e Ioses, e Iuda, e Simon. Pali e huriki e kurabana ri made turane hita.” Lakea i madihi a hatene ria vona.

4 *Ion 4:44Pali e Isu i taki ria, i ta maea, “A propet ni togo na tanga lobo. Pali e huriki a bakovi a ngatavine na tanga vona i uka ma ri togoa.”

5 E Isu i keri ni rata vonga ranga nivakasiri. I ru langa kunana a limana ne huriki ranga ri giloa, i vakatavaga ria. 6 I turutu vona a hini i uka ma ri luhoi tora ia. Muri i vano, i laho lae, i vara na maka tanga takutaku.

7 Muri e Isu i gale valai vona e huriki a murimuri vona ala ravulu a polona i rua, i rudu tala ria ruarua, i habi a nitora ne ria ni lili tala a hanitu. 8 *Luk 10:4-11I taki ria nahea ri gi bole a maki na tahuna ri laho. I uka ma ri gi bole a maki ni kani, a hole, a moni. A maki ri gi bole kunana, a kodo ni laho. 9 I taki ria ri gi rodo a vahapolo, pali i uka ma ri gi bole a varakia. 10 Muri i ta maea, “Na tahuna mu lakea na ruma tara, mu made vonga ge harena na tahuna mu pe a tanga iea. 11 *Apo 13:51A tanga tara i uka ma ri tagui mua, i uka ma ri longo mai mua, mu kurudu pasi a habulo na vahane mua, mu vano. Mu rata mavonga, bara i vakasiri ria ri tahoka a ngava.”

12 Lakea ri vano, ri vara e huriki ri gi pulo a vilone ria. 13 *Iak 5:14Ri lili tala e huriki a hanitu, ri biri na nibiri e huriki ri giloa, ri vakamahuri ria.

14 *Mat 16:14; Mrk 8:28; Luk 9:19-20E Herod a hariki i longo a maka maki e Isu i rata, a vuhuna a rane Isu ni lohoka vona pali na tanga lobo. E huriki ranga ri ta maea, “Ra viri iea e Ioanes, a mari ni vahilolo, a Vure i vakamahuri mulea na matenga, lakea i tahoka a nitora ni rata a nivakasiri.”

15 Pali e huriki ranga ri taki ta ia e Elaisa. E huriki ranga ri taki ta ia a propet tara, i manga e huriki a propet hosi. 16 Pali e Herod, na tahuna i longo a ngava nga, i ta maea, “Iau a palakudua hosi a lohone Ioanes, pali ngane i mahuri mule tabu na matenga!” I ta mavonga, a vuhuna 17-20 hosi e Herod i parangi vona e Herodias, e girihine tarina e Pilip. Pali e Ioanes i takia e Herod, i ta maea, “I uka ma a vilo na vinara go parangi tabu e girihine tarimu.” E Herodias, i madihi a hatena vona e Ioanes, lakea i ngaru ni rabalakia. Pali i uka dalana, a vuhuna e Herod i mangenge ne Ioanes, i matakaria. I lohoka vona ia a bakovi kamumu, i kiripiripi a vilona. E Herod i vivi ni longoa a vinara ne Ioanes. Pali na parava ranga bara i loho lege vona a vinara ne Ioanes. Muri i rudu vakuku, ni gi lakavu e Ioanes, ni gi kolotata, ni gi ru dili na bavi.

21 Muri e Herodias i maragisi vona a maki i ngarua. Na parava ni poda vona e Herod, e Herod i ratea a habu, i gale palupu e huriki a bolekori vona, a ubu na tara vona, a bakovi dagi o Galili, ri gi valai na habu. 22 E tune Herodias a ngatavine i dili, i raulo, i rata e Herod turana e huriki ri valai na habu vona ri vivi. Lakea a hariki i takia a koma ngatavine, “A ra maki o ngarua bara habia vomu.” 23 Muri i kaba i ta maea, “A ra maki o nana vona, bara habia vomu. A tabeke na harikianga nau tara bara habia.”

24 A koma ngatavine i pagitala i nanea e kinana, “A ra maki ga nana vona?”

E kinana i koli, i ta maea, “O nana vona a gine Ioanes, a Mari ni Vahilolo.”

25 A koma ngatavine i malaviriri kunana, i laho hari dili mai a hariki, i ta maea, “A ngaru go palakudua a lohone Ioanes a mari ni vahilolo. Muri o habia nau a gina.”

26 A hariki i lege a lohona, pali i uka ma i ngaru ni ta pupukari vona, a vuhuna i kaba na matane huriki ri bele na habu. 27 Lakea i malaviriri kunana i rudua a nugumaheto ge palakudua a lohone Ioanes, ge bole vilia a gina. A bakovi i vano, i palakudu pololilo na bavi a lohone Ioanes. 28 I ru langea na sika, i bole vilia na hariki. Lakea a hariki i habia na koma ngatavine. Muri a koma ngatavine i vano i habia ne kinana. 29 E huriki a murimuri ne Ioanes ri longoa a velengana, ri vano, ri bolea a podana, ri tanua.

Pali ngane, e Herod i pahaluhoia e Isu ta ia e Ioanes i mahuri mule na matenga.

30 *Luk 10:17E huriki a apostolo ne Isu ri vapopo turane Isu, ri vakalongoa vona a maka maki ri rata, ri tovo e huriki vona. 31 E huriki ala kupo ri laho viri varola, ri pahakari ria ni kani, lakea e Isu i taki e huriki a apostolo vona, “Mu valai turagu, si gi lakea na hini i ngeki, si gi malo taro vonga.”

32 Lakea ri rike na aga, ri vore lakea na tabeke i ngeki, ta ri gi made kikeri vonga. 33 Pali na tahuna ri vano, e huriki ala kupo ri matai ria, ri matakilala ria, lakea e huriki na tanga lobo ri nunu pololilo, ri bele muga vonga.

34 *Gi 27:17; Mat 9:36Na tahuna e Isu i bele, i matai ria, i dodo ria, a vuhuna ri manga a sipsip, i uka matakari ne ria. Lakea i vakatubu ni tovo ria na maki i kupo.

35 *Mrk 8:1-9I tabalahehe pali a haro, lakea e huriki a murimuri vona ri takia, ri ta maea, “Ra hini nga a tabeke i ngeki, i tabalahehe pali a haro. 36 O rudu e huriki, ri gi lakea na robo viliha nga, na maka tanga, ri gi kona a maki ni kani.”

37 E Isu i koli, i ta maea, “Mu vakani ria!”

Ri ta maea ria, “A moni ni kona a maki ni kani ne ria vona bara i vatovotovo turana mapana viri i leho na keva i polotolu!*A denari i 200 i manga a mapana viri ge leho na keva i polotolu. Pali i uka ma i kamumu si gi kona a maki ni kani ne ria.”

38 Lakea i nana ria, “I riva a bret mu tahoka? Mu vano mu matai.”

Ri matai pali, ri hamule, ri vakalongoa e Isu ri ta maea, “A bret i lima, a manu i rua.”

39 Lakea e Isu i vakuku e huriki ri gi made vapopo na varili gomagoma. 40 Ri made vapopo na tara ala ravulu mule ma a murina balaka taku (100) ranga, na tara ala ravulu lima (50) ranga. 41 I bole a bret i lima, a manu i rua, i mata rike na hunu, i kavurikea a Vure. Muri i keve a bret, i habi ne huriki a murimuri vona, ri veru ne huriki. A manu i rua ranga i putu, i veru ne huriki. 42 E huriki lobo ri kani, ri maru. 43 E huriki a murimuri vona ri tahoni na kulopi i ravulu a polona i rua, a kalavana bret a manu ri kani kaleva. 44 E huriki a bakovi lobo ri kani ri ala 5,000.

45 Malaviriri kunana e Isu i rudu e huriki a murimuri vona, ri gi rike na aga, ri gi muga lakea o Betsaida, na tabeke tara na darilomu. Pali i made mule ia, ge rupolo kamumu e huriki. 46 *Luk 5:16I rupolo lobo e huriki, lakea i sike na gagana lolo, i vasileki. 47 I rodo ngane a hini, e huriki a murimuri ne Isu ri vore na kurukuruna darilomu. Pali e Isu i tabana na lolo. 48 I matai e huriki a murimuri vona ri vanugu a vore, a vuhuna a vilu i pori valai muga. Na malabeonga e Isu i pori mai ria, i laho langa na dari. I popote kunana ge rede ria, 49 *Luk 24:37pali na tahuna ri masia i laho langa na dari, ri pahaluhoi ta ia a hanitu. Lakea ri haloho, 50 a vuhuna ria lobo ri masia, ri mangenge. I malaviriri kunana i ta maea, “Mu tuhaka! Iau kunana. Naha ni mangenge.”

51 *Mrk 4:39Muri e Isu i rike na aga, lakea a vilu i pasi puru. Ri turutu hateka, 52 a vuhuna i uka ma ri matakilaka vona a nivakasiri e Isu i ratea na bret. I tabana ni uvo a gine ria.

53 Ri vore kudu, ri bele o Genesaret, ri hori vonga. 54 Na tahuna ri raga na aga, e huriki lobo ri matakilalea e Isu. 55 Ri nunu lae na tabeke vonga, ri vakalongo e huriki. Na tahuna e huriki ri longo, ri kaloho na dede e huriki ri giloa, ri bole lakea vona. 56 Na tanga lobo e Isu i bele vona, na tanga kiroko, na tanga dagi, polovavo na tanga, bara ri taparaki na mada e huriki ri giloa. Ri taki tora ia ri gi padoi kunanea a harena varakia vona. Pali e huriki lobo ri padoi ia, ri tavaga.