1 E BAKOVI DAGI i takia e Moses, 2 “O vakuku e huriki a Israel o ta maea, ‘Mua o huriki a Israel, mu bole a maki ni kani, mu gutu na dede, ge a nihabi. Mu rata a nihabi ge manginoro, ga ngaru. A nihabi nga, mu rata na parava a taki mua vona mu gu rata.’ 3 Moses, o taki e huriki a Israel o ta maea, ‘Na parava vakaroro mu bole a tuna sipsip a toga gavutuvutu ge rua, ru tahoka a pida i taku, ge a nihabi gutu-vuro. 4 Mu habia ne BAKOVI DAGI na hatelanga tara, na malunga tara. 5 Na hatelanga mu bole a kilo na plaoa ge taku, mu vuli turana a namona oliv a lita ge taku, mu habi turana a sipsip ge taku. 6 Ra nihabi gutu-vuro iea mu ratea na parava vakaroro. Hosi ni vakatubu na lolo e Sinai ra nihabi iea. Ge a nihabi ni gutu na kanono. Na tahuna e BAKOVI DAGI i burongi a mangina, bara i vivi. 7 Mu bole a lita na naru vagole ge taku, mu habi turana a sipsip iea, mu guru tala na tabeke ni taba. 8 Na malunga liu mu habia nau a sipsip tara turana a nihabi na vit, a nihabi na vain, i manga a hini mu rata na hatelanga. Ra nihabi ni gutu na kanono, e BAKOVI DAGI i ngaru a mangina.

9 “ ‘Na Parava Nimalo mu habi a sipsip gavutuvutu ge rua, a toga, ru gu tahoka a pida ge taku. Mu bole a kilo na plaoa ge rua, mu vuli turana a namona oliv, ge a nihabi na vit. Muri mu rata a nihabi na vit, a nihabi na vain turana a sipsip. 10 Ra nihabi gutu-vuro mu rata na maka Parava Nimalo lobo, ge turana ra nihabi mu habi na parava vakaroro, ra nihabi gutu-vuro, a nihabi na vain.

11 “ ‘Na mugana parava na maka keva lobo mu rata a nihabi ne BAKOVI DAGI, ra nihabi gutu-vuro. Mu habi a bulmakau karaba a toga ge rua, a sipsip a toga ge taku, a tuna sipsip gavutuvutu a toga ge polorua, ri tahoka a pida i taku. 12 A nihabi na vit turana a sipsip a bulmakau mu rata maea. Mu bole a kilo ge tolu na plaoa, mu vuli turana a namona oliv, mu habi turana a bulmakau ge taku. Mu bole a kilo na plaoa ge taku, mu vuli turana a namona oliv, mu habi turana a sipsip a toga. 13 Mu bole a kilo na plaoa ge taku mu vuli turana a namona oliv, mu habi turana a tuna sipsip ge taku. Ra nihabi gutu-vuro, e BAKOVI DAGI i ngaru a mangina. 14 Mu bole a lita ge rua na vain, mu habi turana a bulmakau a toga. A lita na vain ge taku a kalavana mu habi turana a sipsip a toga. A lita na vain ge taku mu habi turana a tuna sipsip. Mu rata maea kunana na maka nihabi gutu-vuro, na mugana parava na keva takutaku na pida lobo. 15 Mu habi turana a nihabi gutu-vuro, a nihabi na vain, a meme a toga ge a nihabi na naro hale.

16 *Nim 12:1-13; Vin 16:1-2“ ‘Na ravulu a polovana parava (14th) na mugana keva a Habu na Nipagepolo ne BAKOVI DAGI. 17 *Nim 12:14-20; 23:15; 34:18; Vin 16:3-8Na parava i ravulu a polona i lima (15) a nivakatubuna a habu. Na parava i polorua mu kani a bret i uka is. 18 Na mugana parava na parava dagi nga e huriki lobo ri gi vapopo ri gi vasileki. Naha ni rata a leho mu rata na parava vakaroro. 19 Mu rata a nihabi ne BAKOVI DAGI. Mu habi a bulmakau a toga karaba ge rua, a sipsip a toga ge taku, a tuna sipsip gavutuvutu, a toga ge polorua, ri tahoka a pida ne ria i taku. Mu gutu ria na kanono, ge a nihabi gutu-vuro. 20 Mu habi a kilo ge tolu na plaoa, mu vuli turana a namona oliv, mu habi turana a bulmakau a toga takutaku. Mu habi a kilo na plaoa ge rua, mu vuli turana a namona oliv, mu habi turana a sipsip a toga takutaku. 21 A kilo i taku na plaoa mu vuli turana a namona oliv, mu habi turana a tuna sipsip takutaku. 22 Mu habia tara meme a toga, ge a nihabi na naro hale. Ra nihabi iea bara i kavitagu mua. 23 Mu rata a nihabi nga turana a maka nihabi mu rata vakaroro na hatelanga. 24 Na naro iea kunana, mu kisi a kinani na nihabi na kanono na parava takutaku, na parava ge polorua. Na tahuna e BAKOVI DAGI i burongi a mangina, bara i vivi. Ra nihabi na kinani ni gi habi langa tabu na nihabi gutu-vuro, a nihabi na vain ra mu rata na parava vakaroro. 25 Na poloruana parava, mu vapopo mu vasileki. Naha ni rata a leho mu rata na parava vakaroro.

26 *Nim 23:16; 34:22; Vin 16:9-12“ ‘Na parava dagi na Habu na Nimirio, mu bole a vit i moro muga mu habi ne BAKOVI DAGI. Mu vapopo ni kavurikea e BAKOVI DAGI, naha ni rata a leho mu rata na parava vakaroro. 27 Mu bole a bulmakau karaba a toga ge rua, a sipsip a toga ge taku, a tuna sipsip a toga ge polorua, ri tahoka a pida i taku. Mu habi ge a nihabi gutu-vuro. Na tahuna e BAKOVI DAGI i burongi a mangina, bara i vivi. 28 A bulmakau takutaku a kinina a nihabi na vit, ra kilo na plaoa i tolu ni vuli turana a namona oliv. A sipsip a toga, a kinina a nihabi na vit, ra kilo i rua na plaoa, ni vuli turana a namona oliv. 29 Mu habi a kilo na plaoa ge taku, turana a sipsip ge taku. 30 Mu habi a meme a toga ge taku, ne vona ni kavitagu mua. 31 Na tahuna mu rata a maka nihabi nga, a maka sipsip a bulmakau mu habi ge gavutuvutu. A nihabi na vain, a nihabi gutu-vuro, a nihabi na vit ranga, mu rata, i manga a hini mu rata na parava vakaroro.’ ”