1 E BAKOVI DAGI i takia e Moses, “Na mugana parava na poloruana keva, mu vapopo mu vasileki, naha ni rata a leho mu rata na parava vakaroro. Ra parava iea, a parava ni vaki a tavure. 2 Mu rata a nihabi gutu-vuro ge lakea ne BAKOVI DAGI. I ngaru hateka a mangina. Mu rata a nihabi na bulmakau karaba ge taku a toga, a sipsip a toga, a tuna sipsip gavutuvutu a toga ge polorua a pida ne ria ge taku. 3 Mu rata a nihabi na vit, ge a kinina maka nihabi nga. Mu bole a maka plaoa kamumu ni rata na vit, mu vuli turana a namona oliv, bara mu ratea vona a nihabi iea. Mu habi a kilo na plaoa ge tolu, ge a kinina bulmakau a toga, a kilo na plaoa ge rua, ge a kinina sipsip a toga, 4 a kilo i taku, ge a kinina sipsip takutaku. 5 Mu bole tabua a meme ge taku, ge a nihabi na naro hale, ge kavitagu mua. 6 Mu rata a maka nihabi nga, mu rata tabu a nihabi gutu-vuro, a nihabi na vit ra mu rata na mugana parava na keva lobo. Mu habi tabu a nihabi ni rata na parava takutaku, ra nihabi gutu-vuro, a nihabi na vit, a nihabi na vain. Na tahuna e BAKOVI DAGI i burongi a mangina a nihabi na kanono nga, bara i vivi.

7 *Levi 16:29-34“Na ravuluna parava (10th) na polo­ruana keva (7th), mu vapopo mu vasileki. Mu peremu ni kani, naha ni rata a petoanga, naha ni rata a leho vona a parava iea. 8 Mu bolea tara bulmakau karaba a toga, a sipsip a toga, a tuna sipsip gavutuvutu a toga ge polorua, a pida ne ria ge taku. Mu habi ne BAKOVI DAGI ge a nihabi gutu-vuro. Na tahuna e BAKOVI DAGI i burongi a mangina, bara i vivi. 9 Mu gutu a nihabi na vit turana a nihabi gutu-vuro. Mu bole a plaoa kamumu na vit, mu vuli turana a namona oliv, mu habi. Mu habi a kilo na plaoa ge tolu, ge a kinina bulmakau a toga, a kilo na plaoa ge rua, ge a kinina sipsip a toga, 10 mu habi a kilo na plaoa ge taku, ge a kinina tuna sipsip a toga takutaku. 11 Mu habi tabu a meme a toga, ge a nihabi na naro hale. Mu habi tabu a nihabi ni kavitagu mua, a nihabi gutu-vuro mu rata vakaroro turana a nihabi na vit, a nihabi na vain.

12 “Ne ravulu a pololimana parava (15th) na poloruana keva, mu vapopo mu vasileki. Naha ni rata a leho mu rata na parava vakaroro. Mu rata a habu ne BAKOVI DAGI na parava ge polorua. 13 Mu rata a nihabi ni gutu na kanono ne BAKOVI DAGI. I ngaru a mangina a maka nihabi nga. Mu habi a bulmakau karaba a toga ge ravulu a polona i tolu (13), a sipsip a toga ge rua, a tuna sipsip a toga ge ravulu a polona i va (14), ri tahoka a pida i taku. Ria lobo ri gavutuvutu. 14 Mu bole a plaoa mu vuli turana a namona oliv, ne vona ni rata a nihabi na vit. Mu bole a kilo na plaoa ge tolu ge a kinina bulmakau takutaku, a kilo na plaoa ge rua ge a kinina sipsip a toga ge takutaku, 15 a kilo na plaoa ge taku ge a kinina sipsip takutaku. 16 Mu habia tara meme a toga ge a nihabi na naro hale. Mu habi tabu a nihabi na parava takutaku, ra nihabi gutu-vuro, a nihabi na vit, a nihabi na vain.

17 “Na ruana parava, mu habi a bulmakau karaba a toga ge ravulu a polona i rua, a sipsip a toga ge rua, a tuna sipsip a toga ge ravulu a polona i va ri tahoka a pida ne ria i taku. Ria lobo ri gavutuvutu. 18 A nihabi na bulmakau a toga, a sipsip a toga, a tuna sipsip, a kinina ne ria ge a nihabi na vit, a nihabi na vain, ge ramai a ngava a taki mua vona. 19 Mu habi tabu a meme a toga, ge a nihabi na naro hale. A nihabi gutu-vuro tara, ra mu habi na parava vakaroro turana a nihabi na vit, a nihabi na vain, mu habi.

20 “Na toluna parava, mu habi a bul­makau ge ravulu a polona i taku, a toga, a sipsip a toga ge rua. A tuna sipsip a toga ge ravulu a polona i va, ri tahoka a pida ne ria i taku. Ria lobo ri gavutuvutu. 21 A maka nihabi na bulmakau a toga, a sipsip a toga, a tuna sipsip, a kinine ria ge a nihabi na vit, a nihabi na vain, ge ramai a ngava a taki mua vona. 22 Mu habi tabu a meme a toga, ge a nihabi na naro hale. A nihabi gutu-vuro tara, ra mu habi na parava vakaroro turana a nihabi na vit, a nihabi na vain, mu habi.

23 “Na vana parava, mu habi a bulmakau a toga ge ravulu, a sipsip a toga ge rua, a tuna sipsip a toga ge polorua, a pida ne ria ge taku. Ria lobo ri gavutuvutu. 24 A nihabi na bulmakau a toga, a sipsip a toga, a tuna sipsip, a kinine ria ge a nihabi na vit, a nihabi na vain, ge ramai a ngava a taki mua vona. 25 Mu habi tabu a meme a toga, ge a nihabi na naro hale. A nihabi gutu-vuro, tara, ra mu habi na parava vakaroro turana a nihabi na vit, a nihabi na vain, mu habi.

26 “Na limana parava, mu habi a bul­makau a toga ge polova, a sipsip a toga ge rua, a tuna sipsip a toga ge ravulu a polona i va, ri tahoka a pida ne ria i taku. Ria lobo ri gavutuvutu. 27 A maka nihabi na bulmakau a toga, a sipsip a toga, a tuna sipsip, a kinine ria ge a nihabi na vit, a nihabi na vain, ge ramai a ngava a taki mua vona. 28 Mu habi tabu a meme a toga, ge a nihabi na naro hale. A nihabi gutu-vuro tara, ra mu habi na parava vakaroro turana a nihabi na vit, a nihabi na vain, mu habi.

29 “Na polotarana parava, mu habi a bul­makau a toga ge polotolu, a sipsip a toga ge rua, a tuna sipsip a toga ge ravulu a polona i va, ri tahoka a pida i taku. Ria lobo ri gavutuvutu. 30 A nihabi na bulmakau a toga, a sipsip a toga, a tuna sipsip, a kinine ria ge a nihabi na vit, a nihabi na vain, ge ramai a ngava a taki mua vona. 31 Mu habi tabu a meme a toga, ge a nihabi na naro hale. A nihabi gutu-vuro tara, ra mu habi na parava vaka­roro turana a nihabi na vit, a nihabi na vain, mu habi.

32 “Na poloruana parava, mu habi a bulmakau a toga ge polorua, a sipsip a toga ge rua, a tuna sipsip a toga ge ravulu a polona i va, ri tahoka a pida ne ria i taku. Ria lobo ri gavutuvutu. 33 A maka nihabi na bulmakau a toga, a sipsip a toga, a tuna sipsip, a kinine ria ge a nihabi na vit, a nihabi na vain, ge ramai a hini a taki mua vona. 34 Mu habi tabu a meme a toga, ge a nihabi na naro hale. A nihabi gutu-vuro tara, ra mu habi na parava vakaroro turana a nihabi na vit, a nihabi na vain, mu habi.

35 “Na polotoluna parava, mua lobo mu vapopo ni vasileki, naha ni rata a leho mu rata na parava vakaroro. 36 Mu rata a nihabi na kanono ne BAKOVI DAGI. I ngaru a mangina. Ra nihabi iea, mu bolea a bulmakau a toga ge taku, a sipsip a toga ge taku, a tuna sipsip a toga ge polorua ri gi tahoka a pida i taku. Ria lobo ri gavutuvutu. Mu bole mu rata a nihabi gutu-vuro. 37 A maka nihabi na bulmakau a toga, a sipsip a toga, a tuna sipsip, a kinine ria ge a nihabi na vit, a nihabi na vain, ge ramai a ngava a taki mua vona. 38 Mu habi tabu a meme a toga, ge a nihabi na naro hale. A nihabi ni gutuvuro tara, ra mu habi na parava vakaroro turana a nihabi na vit, a nihabi na vain, mu habi.

39 “A nihabi nga, mu kisi turana a maki mu ta muholi mu gu habia ne BAKOVI DAGI, a maki mu ngaru ni habi ne BAKOVI DAGI. Mu kisi, mu habi na habu takutaku ne mua, ra a nihabi gutu-vuro, a nihabi na vit, a nihabi na vain, a nihabi na nivalemu.”

40 E Moses i taki e huriki a bakovi a ngatavine o Israel na maka maki e BAKOVI DAGI i vakuku ia vona.