11
Deiwidi yo Betesiba
2 Samuwela 11:1-17, 26, 27
1 Umaꞌuma fuyanna yai, kin edi fuya lau hiyala maihalana yai mate Deiwidi, Diyowabi maꞌena hiyala tau lau kulukuluwedi yo Isalaela edi tau hiyala mahudoꞌidi ya fatamalidi sa lau Amon dodogadi sa hiyalaidi. Sa lei hafihafitidi yo Laba taonna laꞌilaꞌi sa fasai bulubuluhidi. Fuyanna yai mate Deiwidi hige maꞌedi ti lau. Ya miya Yelusalem yai.
2 Fuya hesa maimailafi wananaha yai, Deiwidi ena aba eno yai ya obiyo be ya leu ya sae ena luma hewana yai.* Edi luma hewadi mate tabatabadi, edi aba lau bawa yo an hwayahwayau. Amainiya ya itaꞌita lau mate waihin hasalana loholohona ya sigusigu ya ita. 3 Yo fede, Deiwidi doga hesa ya fatamali ya lau be ya fatiꞌo kadada. Taumoho ya fuyoma be iyen,
Betesiba, Eliyam natuna, Hiti dogana Ulaiya lahuna.
4 Habahim, Deiwidi liba ya fatamali bena sa foyahi lawen lisina. Ya laoma lebena be maꞌena sa eno bili. (Nawalahi asiyebona ya ofi, na tauna ya kaikaisu.) Habahim, ya fuyo ena luma. (Lewitikusi 15:19 yo 28)
5 Waihin ya boga be liba ya fatamali lawen Deiwidi lisina iyen,
Yau E boga.
6 Yo fede, Deiwidi liba ya fatamali lawen Diyowabi lebena iyen,
Hiti dogana, Ulaiya, u faliba i laoma lebegu.
7 Fuyanna Ulaiya ya mahano ya fatiꞌo iyen,
Diyowabi yo tau hiyala sa loholoho? Na hiyala sidosidohana?
8 Habahim, Deiwidi ya libalau Ulaiya lisina iyen,
U lidi em luma be ahem u kaisu, na u anyawasi.
Yo fede, Ulaiya wa, Deiwidi ena luma loholohona ya lau afulen. Ya lau na mulina yai kin ena ainauya ya fatamali lawen Ulaiya ena luma.
9 In moho, Ulaiya hige i lau ena luma, na kin ena luma aba luhuluhu launa yai ya eno ma afa haidana kin ena tau paisowa.
10 Deiwidi ena sa liba mate Ulaiya hige i lau ena luma be ya fatiꞌoi iyen,
Edaꞌeda lofalofa yai wa laoma? Paꞌana somo hige u lau em luma?
11 Ulaiya ya libalau Deiwidi lebena iyen,
Laugagayo aba husanina ya otaꞌota palai yai, na Isalaela yo Diuda tau hiyaladi mate palaidi aba pei yai hinaga sa miyamiya. Egu hiyala tau lau kulukuluwena, Diyowabi maꞌena em tau hiyala mate edi palai sa peidi Laba taonna mulimulina yai. Logena, hige gonowana ya lau egu luma be ya anꞌan, ya nom yo ma lahugu ai eno. Yau ibege ya ginauli doha, higeꞌe wananaha!
12 Habahim, Deiwidi ya libalau Ulaiya lebena iyen,
Aho te, aiteꞌi u miya; bobon haba E fatamali fuyoim.
Yo fede, lahaina yai ni Ulaiya ya miya Yelusalem yai. 13 Deiwidi mate, Ulaiya ya anꞌetai be sa kalahe gogo na ya fanom yauyaule. In moho, iꞌipana mate Ulaiya hige i lau ena luma Ya lau Kin ena tau paisowa pwaludi yai be ena leiyafa yai ya eno.
14 Hwalahwalalana, Deiwidi wasa ya atahi mate iꞌipa yai, Ulaiya hige i fuyo ena luma, yo fede, leta ya uli, Diyowabi enehena, be Ulaiya ya lawen ya felen. 15 Wasa ni ganahewana yai ya uli iyen,
Diyowabi, Hiyala somo yai ya alaꞌala wananaha mate Ulaiya u fatamali bwaꞌiyen be tau hiyala ai nuwanuwadi. Habahim, tau hiyala ma afa haidam au muli suwasuwa be haba ami waiyunu iyabona sa tala funuhi.
16 Diyowabi maꞌena tau hiyala Laba taonna sa fafataꞌiꞌili be somo yai adi waiyunu edi tau hiyala adiꞌadidilidi edi aba naha mate Ulaiya ya fatamali lawen amaniya. 17 Fuyanna taon ni tataudi sa kalamahanoma be Diyowabi sa hiyalai mate Deiwidi ena tau hiyala haisa sa wunuidi. Yo Ulaiya hinaga sa wunu esegahi.
26 Betesiba lahuna Ulaiya wasana ya atahi mate ya tan eloꞌelolosi.
27 Logo fuyana ya ofi, Deiwidi doga hesa ya fatamali be waihin ya foyahiyama ena luma yai ya famala lahuna be natuna bogana yai ya yosi. In moho, somo Deiwidi ya ginauli mate Guyau hige nuwana i amnaen.