12
Neitan, Deiwidi ya Liba Suꞌui
2 Samuwela 12:1-25
1 Guyau, peloweta hesa hesana Neitan ya fatamali lawen Deiwidi lisina. Ya laoma lisina be iyen,
Tatau luwaga taon hesa yai. Hesa ya fagogo na hesa higeꞌe. 2 Tau fagogo mate ena sipi yo bulumakau sa ouli, 3 na tau fagogogo gesagesa mate sipi gubugubufwauna tinabawa esega moho ya une. Hige somo hesa. Taumoho te, nanatuna yo sipi maꞌedi ya itaꞌita watanidi be–, ya laꞌi. Ana anꞌan tefana mate ya soiyen be sipi ana ya felefelen. Ana kaputi yai ya nom yo ai nimana ya enoꞌeno hinaga. Itaꞌitana doha natuna waihin.
4 Fuya hesa tau antaumana ya laoma tau fagogogo ena luma. Hige i fanuha bena ena sipi e bulumakau laꞌi i fapaisowa be taumana ana i lau buꞌa. Yo fede, ya lau be tau fagogo gesagesa ena sipi gubugubufwauna tinabawa ya abi, sa wunui be taumana ana anꞌan sa abi nonohai.
5 Deiwidi ya manabala heyaya tau fagogo lebena yai be ya libalau Neitan lisina iyen,
Guyau wananaha ya mwahumwahuli, hesana yai E liba mate somo taumoho ya ginauli ni, ibe moho ya peꞌi! Somo ya ginauli te, mate hige ena nuwatohatoha tau gogo gesagesa lebena yai. 6 Debana yai, bena sipi nanatudi fati tau gogo gesagesa ya felen ena maisa, paꞌana hige i nuwatohatohaen.
7 Habahim, Neitan ya libalau Deiwidi lisina iyen,
Um taumohom, logem! Guyau, Isalaela eda Yaubada ya liba doha ite: “Yau E fasinabom Isalaela edi kin yo Saulo ena gigibwali yai E fofofahim. 8 Am tanuwaga Saulo ena luma yo lalahuna E fele afuledi nimam yai. E faꞌobiyom Isalaela yo Diuda wa tanuwagaidi. Na yena hige gonowam, yau gonowagu haba ginauli haisa E felem. 9 Paꞌana somo Guyau ena liba wa ꞌwaiyoꞌoꞌen be heyaya wa ginauli matana yai? Hiyala yai Ulaiya wa ita afulen be Amon dodogadi edi baineti yai, sa wunui. Na lahuna wa abi, lahum. 10 Egu liba hige u lau watan, na wa ita lidilidiyegu be Ulaiya, Hiti dogana, lahuna wa abi, lahum. Logena be, laulauwewem aho te na fuya matadi yai, baineti yai haba sa wunuidi.”
11 Guyau ya liba doha ite: “Am boga ganahewana yai haba E fapilipilim. Ai matam haba lalahum E abidi be lahai esega - esega taumoho hesa E felen be maꞌena ai mahata sa luma gwaꞌu. 12 Um simosimo yai laulau te wa ginaulidi be dodoga ibege ti siba. Na Yau E ginauli haba ai mahata, Isalaela dodogadi mahudoꞌidi ai matadi.”*Au italau 2 Samuwela 16:22 Sidohana Yaubada ena fafamaisa Deiwidi lisina yai.
13 Habahim, Deiwidi ya libalau Neitan lisina iyen,
Yau heyaya E ginauli Guyau matana yai.
Neitan, Deiwidi alinana ya bui iyen,
Guyau em heyaya ya nuwa afulen. Um ibege u peꞌi. 14 In moho, laulau te wa ginauli mate, wananaha Guyau hige u faꞌatitiyen. Logena, natumiu taumoho ami yosi haba ya peꞌi.
15 Neitan ya lau ena luma mulina yai, Deiwidi natuna, Ulaiya lahuna ya yosi. Guyau ena gigibwali yai ya faꞌasiyebo, be asiyebo heyaya ya abi. 16 Deiwidi enehena ya anꞌeta gadogadola Guyau lebena yai. Ya waiyoꞌo kalahe na iꞌipadi ena ai luma mate ya laulau eno ai matu. 17 Babada ena luma yai sa paipaisowa Deiwidi bena sa abi famwaito na ya waiyoꞌo yo hige i fanuha ma afa haidana ti kalahe.
18 Nogeya! Lahai fafaligigi luwagana yai, gwama ya peꞌi. Ena tau lau fayofayo, Deiwidi falibana sa ꞌwasabu be nuwadi yai tiyen,
Gwama hola ma mwahumwahulina, Deiwidi te fafaliba, in moho, hige gonowana i ataꞌatahi. Haba sidohana eda fafalibana mate gwama haꞌa ya peꞌi? Ibe somo hesa i ginauli be i faheyaya fuyoi?
19 Tau laufayofayo sa fafaꞌasu fenafena. Ya itadi be ya nuwatuhui mate gwama haꞌa ya peꞌi. Yo fede, iyen,
Gwama ya peꞌi?
Alinana sa bui tiyen,
Ii–, ya peꞌi.
20 Habahim Deiwidi matu yai ya obiyo be ya lau ya sigu. Tauna ya famaꞌi yo ena kaleko ya senisidi na ya lau Guyau ena luma yai ya fadebasae. Habahim, ya fuyo ena luma. Ya anꞌeta anꞌan be ana sa lau dala be ya kalahe. 21 Ena tau lau fayofayo sa fatiꞌoi tiyen,
Somo wa ginauli te, mate ꞌe nuwa ponoꞌen. Gwama hola ma mwahumwahulina mate wa anhudi yo wa tan na aho wawaya ya peꞌi mate wa obiyo be wa anꞌan!
22 Alinadi ya bui iyen,
Gwama hola ma mwahumwahulina mate E anhudi yo E tan. Yau yawa, “Bena Guyau haba i nuwatohatohaegu be wawaya i famwahuli.” 23 Na aho ya peꞌi. Paꞌana somo be haba E anhudi? Hige gonowagu haba ya famwahuli fuyoi. Ibe yau E peꞌi haba E lau lebena, na in peꞌi yai hige gonowana i fuyoma lebegu.
24 Habahim Deiwidi lahuna, Betesiba ya fanuwa loholoho, be ya lau maꞌena sa eno. Natuna taumoho hesa ya yosi be hesana sa tole Solomon, be Guyau ya fanuha wananahai. 25 Guyau ena Peloweta Neitan ya faliba bena hesana hesa sa tole Dedidaiya paꞌana Guyau ya gadosisiyen.†Solomon hesana hesa Dedidaiya Hebelu alinadi yai, aniyona mate “Guyau ya gadosisi wananahaꞌen.”