24
Paulo Diusi sa Falau Fatala.
Paisowa 24:1-9
1 Lahai faligigi mulidi yai Tau Antalasam Baꞌisana, Ananiya, yo babada haisa maꞌedi loiya, hesana Tetulusi sa lidi Sesaliya sa lau Gawana Filiki matana yai, be Paulo sa sadi. 2 Habahim Paulo sa yoga lawen na Tetulusi ya fatubu ya libaliba iyen,
Baꞌisa! Em ita wata ganahewana yai ꞌe miya komakoman fuya lofalofa, yo em sibasiba yai ema miyamiya haꞌa wa fadudulaidi. 3 Filiki! Laulau hesa - hesa yai yo tefa ouꞌouli yai ema lautoꞌi laꞌilaꞌi um lisim yai. 4 Hige ya fanuha bena amnam ya faheyaya. Aee–, E anꞌetaim moho ibe ema liba tupotupona te wa atahi. 5 Doga te E lobahi mate, in heyaheyaya tau laulau fatubu; Diusi dodogadi nuꞌu hesa - hesa yai, in tau eli fasifasinadi yo Nasaleta Pelena tau foyahina hesa. 6-8 Yo Dubu Tabuna hinaga ya anpate bena ya faheyaya, logena ꞌe tohai. Dogana te ena libaliba hola u fadosi yo ena laulau u ita sipoi, haba iyabom wa sibai somo halana be ꞌe sadi.* Beyabeyana Uliꞌuli haisa yai mate, lausoisoi tefana yai te hige ti uli. Ya fatubu lausoisoina 6b na ya lau lausoisoina 8a. Debana yai ema laugagayo yai ꞌe fanuha bena ꞌe falau fatala. 7. In moho, Komanda Laisiya maꞌena tau hiyala sa laoma be nimamai yai sa mupafahi. 8a. Laisiya ya liba be tau sadina sa laoma um lisim.
9 Tetulusi somo ya libaen mate Diusi sa ehe watawatan. Tiyen,
Ii–, Logena!
Paulo Ena ya Tona Galagala Filiki Matana yai
Paisowa 24:10-23
10 Habahim Gawana nima yai Paulo ya faliba be ya libaliba.
Yo fede Paulo iyen,
E siba mate, um tau fafadudulai bolima lofalofa nuꞌu yai te. Be ma nuwa loholohogu egu E tona galagala. 11 Ibom, gonowana wa yoꞌoi be wa fawananaha mate lahai safuhudohudoꞌi luwaga ganahewadi yai Yaubada fadebasaena ana halulu E hasai Yelusalem, 12 hige sai laꞌi maꞌegu ai faibayaho na ti lobahimai Dubu Tabuna dobidobina yai e dodoga ya eli fasifasinadi Diusi edi aba oiꞌoigogo lumadi yai e duhu laꞌi mahudoꞌina ganahewana yai. 13 Sadi somo sa ginauli lisigu yai, hige gonowana ti fawananahadi lebem yai. 14 E faliba dudulaim moho mate afa wahamai edi Yaubada E fafadebasae, na “Edaꞌeda” mate yau E fafamuli watan.† Fuyanna yai, safaluma “Keliso edaꞌedana” sa famuli watan, hesana tupotupo sa tole: “Edaꞌeda.” Diusi safaluma Keliso hige ti famuli watan, edi nuwatuhu mate Yesu ena lau faꞌata mate bwalabwala. Yo hinaga ginauli mahudoꞌidi Mose ena Laugagayo yai yo Peloweta sa ulidi mate E kawawananahaꞌedi. 15 Egu sunuma Yaubada lebena yai gonogonowana doha tau sadigu te. Logena, tau laulau dudulai yo tau heyaya haꞌa sa peꞌi, haba sa obiyo fuyo. (Diyobi 14:14)
16 Fuya ouꞌouli E anpate adidili bena egu laulau sa dudulai Yaubada matana yai yo dodoga matadi yai hinaga.
17 Yelusalem E lau afulen bolima fisa, habahim E fuyom. E laoma bena egu antalasam E ginauli yo egu dodoga tau deha bena E ainauyaidi. 18 Dubu Tabuna ganahewana yai egu lau faꞌaꞌa haꞌa E abi, ya ofi na sa lau lobahigu. Hige bobohalahala yo hige baiwa ma afa haidagu. (Paisowa 21:24)
19 In moho, Diusi haisa Eisiya yai sa miyamiya, iti ibe aiteꞌi, haba edi sadigu mata paꞌana somo ai matam sa libaen. 20 Yena higeꞌe, beti, salumadi iti amaiteꞌi, fuyanna E obiyo Sanhedeli matadi yai, na lau pono somo E ginauli bena sa libaen. 21 Ginauli esega moho mate nuwana fuyanna matadi yai E obiyo na E yoga, yawa, “E kawawananaha mate, tau peꞌipeꞌi haba sa mwahuli fuyo! Logena, aho te wa fadudulaigu.”
22 Habahim Filiki, in “Edaꞌeda Dodogadi” tau sibaina mate,‡ Au italau Paisowa 24:14 lau fatala ya golu boda na iyen,
Yena Komanda Laisiya ya mahanoma, haba fadudulai ofiꞌofina E ginauli ai lisim.
23 Be hiyala tau lau kulukuluwenna ya faliba, iyen,
Paulo u gatin, na fuya haisa u soꞌe fahi haba haidana sa laoma ena fanuha somo ena sa felen.
Filiki maꞌena Dusila, Paulo ena Liba sa Atahi
Paisowa 24:24-27
24 Lahai fisa sa ofi, mulidi yai, Filiki lahuna Dusila ya aulen be maꞌena sa laoma. In mate Diusi waihinina.§ Dusila tamana mate Kin Heloda Agilipa. Paulo ana liba ya fatamali be ya laoma, Yesu Keliso sunumaꞌenna libana bena ya dedei be sa atahi.
25 Laulau dudulaina, eda amna tabu i foya faheyayada, yo fakasa lahaina ya laolaoma, mate Paulo ya guguyaꞌen.
Ma libalibana na Filiki ya ꞌwasabu, be iyen,
Aꞌai, na u lau! Yena egu solasola haba E yoga fuyoꞌim.
26 Fuyanna yai ni mate, ena nuwatuhu bena haba Paulo ya nuwa liui be moni ena ya felen. Logena, ya yogayoga fuyoiyama be fuya ouꞌouli maꞌena sa libaliba. 27 Bolima luwaga sa abi didin mulidi yai, Posiu Fesitu, Filiki ya falau damahi be ya gawana. In moho Filiki bena Diusi nuwadi ya faloholoho be Paulo, hige i soꞌe fahi.
*24:6-8 Beyabeyana Uliꞌuli haisa yai mate, lausoisoi tefana yai te hige ti uli. Ya fatubu lausoisoina 6b na ya lau lausoisoina 8a. Debana yai ema laugagayo yai ꞌe fanuha bena ꞌe falau fatala. 7. In moho, Komanda Laisiya maꞌena tau hiyala sa laoma be nimamai yai sa mupafahi. 8a. Laisiya ya liba be tau sadina sa laoma um lisim.
†24:14 Fuyanna yai, safaluma “Keliso edaꞌedana” sa famuli watan, hesana tupotupo sa tole: “Edaꞌeda.”
‡24:22 Au italau Paisowa 24:14
§24:24 Dusila tamana mate Kin Heloda Agilipa.