12
Eccles 12:1-14
Ma hewahewalimiu yo ma hasahasalamiu,
tabu Tau Ginaulimiu au nuwa fuiyen,
doꞌata emi fuya tautaulaꞌi yo tinatinalaꞌi yai auwe,
“Hige amna hesa loholohona ai lobahi.”
Bena ami nuwatuhui, doꞌata emi fuya tautaulaꞌi yo tinatinalaꞌi yai,
matamiu sa gafu doha maihala,
nawalahi yo kipwala sa ꞌwahuꞌwahuhuli
yo doha usa yadadi galewa sa fafakamumu.
Nimamiu, aba bobodiyemiu hola hige ti tabutabubu,
yo ahemiu sa fafaꞌadidilimiu hola hige ti belubelu,
moꞌamiu hola hige ti gabo
lisina yai ami anꞌan aba mamaina,
matamiu ma loholohodi lisina yai ami itaꞌita,
mate bena Tau Ginaulimiu, ami nuwatuhui.
Beyamiu lisina yai dagugu edaꞌeda yai emi aba atahiyenna. Hola hige ti doꞌo,
yo wawahin sa paipaisowa dagugudi, wana yo dagugu hesa - hesa,
hola ami ataꞌatahiyedi mate,
bena Yaubada ami nuwatuhui.
Ataiꞌa edi gwane yai haba sa fanohimiu
in moho ibege au atahi komakoman.
Tau Ginaulimiu bena ami nuwatuhui,
yo edaꞌeda launa ami ꞌwasabuwedi, doꞌata ami beꞌu.
Kulumiu hola hige ti fou ofi doha didiyali tayadi,
yo hola hige au lau welawelai.
Doha kupati hanahanau haba ya peꞌi,
yo emi amna hola hige ti tomatoma,
mate bena ami nuwatuhui.
Ma mwahumwahulimiu bena ami nuwatuhui.
Tabu au bagibagi ee–, peꞌi fuyana,
yena ami peꞌi,
haba ami lau Biula. * Siyola Alina Hebelu yai, mate doha Biula e Tanolai amaiteꞌi.
Na dodoga haba halamiu sa tan eloꞌelolosi.
Aho te, au nuwatuhui paꞌana haba ami peꞌi
doha mahina pwalana ya tamotu,
yo gulewa ya tamo golugolu
yo doha hoꞌowa aba yahiyahi ya tamo golugolu,
yo balawa, hoꞌowa aba yahiyahina ya tamotu.
Ami peꞌi, haba ami fuyo tanohi,
na yaluwamiu haba sa fuyo Yaubada lisina.
Yau, Tau lau faꞌata, yawa, “Ginauli mahudoꞌidi hige aniyona! Kufana!”
Yau, Tau lau faꞌata mate, E sibasiba wananaha be E anfatalahaen dodoga lebedi yai be haba sa sibasiba hinaga. Nuwatuhu te, E fadosi komakomanidi, wananaha e higeꞌe? Be gaimumu te E pei dailidi. 10 E anpate be E liba fadudulaidi, habahim E ulidi be sa famala gaimumu wananahadi.
11 Doga sibasibana ena liba sa faꞌankamkamna in moho ya fafadudulai doha tuꞌe, tau paisowa ya abi doha tuꞌe tau paisowa ya eliꞌeliyen bulumakau yai be haba ya foya dudulaiꞌi. Ibe ena gaimumu loholohona ya pei gogondi buka yai, haba ya ota hige anadan. Ibege i fatautau doha powati tau paisowa ya tutu fapatu lawen oyagi yai be ya abi didin. 12 Natugu, u itaꞌita komakoman! Ginauli hahaisa u lau afuledi.
Uliꞌuli paisowana ibege i ofi, na sibasiba anpatena ya faꞌamna heyaheyaya!
13 Gaimumu mahudoꞌidi haꞌa ami atahidi be egu liba E falafusofa doha ite:
14  Guyau emi laulau simosimodi haba ya fakasadi, loholohodi yo heyaheyayadi, be Yaubada au faꞌatitiyen yo ena laugagayo au famuli watanidi paꞌana ya ginaulimiu.

*12:5 Siyola Alina Hebelu yai, mate doha Biula e Tanolai amaiteꞌi.