Peloweta
Isaiya
ena Uliꞌuli
Buka te hesana mate peloweta hesa laꞌilaꞌi lisina yai ya laoma. Pelowetana hesana Isaiya na boliman 750 B.C. mate Yelusalem yai ya miyamiya (B.C aniyona mate hola Yesu hige i tubu).
Asiliya edi kin adiꞌadidilina ma ena tau hiyala sa lau Isalaela yo Diuda tau miya fataꞌiꞌiꞌlidi suludi boludi sa luluidi be sa lei hafihafitidi dedena, buka yai te sa uli peina 1 ya lau ee–, peina 39. Peloweta, Diuda dodogadi ya falibadi bena, tabu kin yo tau hiyala ti sunumaꞌedi na bena Yaubada moho sa sunumaꞌen yo ena liba sa lau watan.
Babilon edi kin Diuda dodogadi ya lei hafihafitidi be boludi ya lawedi ya famiyadi Babilon yai na bolimandi mulidi yai dedena mate sa uli peina 40 ya lau ee–, peina 55. Peloweta amainiya nuwadi ya liba fataludi yo Yaubada sidohana haba Diuda dodogadi ena fafafuyodima Yelusalem be ainiya edi miya ya fafwaufwau fuyoꞌidi edi ya liba dedena mate hinaga peina 40 ya lau peina 55 yai.
Diuda dodogadi sa fuyo Yelusalem sa miya bolimandi mulidi yai dedena mate peina 56 ya lau ee–, peina 66 yai. Yaubada ena nuwatuhu Yelusalem enehena yo nuꞌu mahudoꞌidi tanoꞌubu yai enehena dededi mate hinaga peina 56 ya lau peina 66 yai.
2
Nuwa Esega Otaꞌota Fahina
Isaiya 2:1-5
Tautau yai, Yaubada ya taumahata Eimosi natuna Isaiya lebena yai be ena nuwatuhu somo Diuda yo Yelusalem lisidi yai ya faliba.
Iyen, “Fuya matada yai Dubu Tabuna
ena aba mwaito tuꞌana
haba tuꞌa hahaisa ya sai tawanidi.
Nuꞌu boludi haba sa fabaiwama ainiya”
be dodoga boludi haba tiyen,
“U laoma, ta lau Yaubada ena tuꞌa,
ta lau Isalaela edi Guyau ena Dubu Tabuna.
Ena laulau haba ya fatalahada
be gonowana te lau watanidi.
Yaubada ena lau faꞌata mate Yelusalem yai sa tulu beꞌuma;
be Saiyon Tuꞌana yai* Saiyon Tuꞌanamate Deiwidi ena tefa Yelusalem ganahewana yai. ena dodoga ya falibadi.”
Pilipili nuꞌu laꞌilaꞌidi yai haba ya tole fadudulaidi.
Edi kebolo haba sa bibidi be sa famala tanohi aba giyagiyali,
na edi baineti haba sa ginauli fuyoꞌidi
be sa famala umaꞌuma aba iboꞌibodi.
Nuꞌu hesa ibege i lau nuꞌu hesa i hiyala fuyoi,
hiyala sa lubulubui ibege ti lubulubui fuyo.
Iyakobo laulauwewena, aho te, Yaubada mala ya feleda bena te lau watan!

*2:3 Saiyon Tuꞌanamate Deiwidi ena tefa Yelusalem ganahewana yai.