14
Isalaela Gabogabo Balebalelemna yai
Auꞌaulaha 14:5-18
5 Fuyana Idipi edi Baꞌisa sa faliba mate Isalaela haꞌa sa gela, yo fede maꞌena tau paisowa lalaꞌidi edi nuwanuwatuhu sa buidi. Na tiyen,
Paꞌana somo Isalaela te biya afuledi sa lau? Aho te hige gonowana ti paisowa boda.
6 Yo fede, ena saliyoti* Hosi felifeli mate saliyoti ya nonohaidi be ena tau hiyala ma afa haidana sa lau. 7 Ena saliyoti 600 loholoho wananahadi maꞌedi saliyoti hahaisa Idipi yai ya lawedi. Saliyoti mahudoꞌidi maꞌadi tanuwaga. 8 Guyau mate Idipi edi Baꞌisa Falo nuwana ya fapoꞌi be Isalaela ya lau weꞌa watanidi. Na Isalaela hige ti ꞌwasabu, ma nuwa adidilidi sa lau moho. 9 Falo ena hosi yo saliyoti, hosi tau gelugeluidi, yo tau hiyala mate, Isalaela dodogadi sa lau weꞌa watanidi, be somo yai edi an pei gwaꞌu Gabogabo Balebalelemna yai, Pi Hahiloti sadaina yai na Baꞌala Sefon mate tefa yai sa itaꞌita lawen. 10 Fuyana Falo ya kepa lau, na Isalaela sa itaꞌita hasa sa itadi sa laolaoma adi halulu, sa ꞌwasabu yo fede sa tan lau Guyau lisina.
11 Mose sa faliba tiyen,
Nuwana Idipi nuꞌuna hige boꞌusa, be logena wa foyaimai nuꞌu pitapitalina yai te bena ꞌe peꞌi?! Idipi yai wa foya fahimai mate somo haꞌa wa ginauli?! 12 Idipi yai haꞌa ꞌe falibam, aiyawa, “U lau afulemai! Haba Idipi dodogadi edi ꞌe paisowa. Ibe edi ꞌe paisowa nuwana haba i loholoho wananaha, habahim peꞌi nuꞌu pitapitalina yai.”
13 Mose dodoga alinadi ya bui iyen,
Tabu au ꞌwasabu. Au obiyo esegahimiu na Guyau aho te ya fofofahimiu haba ami ita. Idipi dodogadi aho te ami itadi ibege au ita fuyoꞌidi. 14 Guyau haba enehimiu ya hiyala. Nuwamiu moho bena sa adidili.
15 Habahim Guyau ya libalau Mose lisina, iyen,
Paꞌana somo be ami tantan laoma lisigu? Isalaela u falibadi be ti aulaha. 16 Em tuꞌe u lau hitini be nimam u lolon gabogabo ai hewana na gabogabo haba ya pei daili be Isalaela dodogadi haba ai tanohi pitapitalina sa dohe. 17 Idipi haba nuwadi E fapoꞌidi be Isalaela haba sa luhu watanidi. Falo ma ena tau hiyala, saliyoti, yo ena hosi tau gelugeluidi ai lisidi somo E ginauli haba sa noꞌoꞌegu. 18 Fuyanna somo E ginauli faꞌofi, Falo, ena saliyoti yo hosi tau gelugeluidi lisidi yai, haba Idipi sa sibai mate, Yau Guyau.
19 Yaubada ena anelu, Isalaela edi hiyala tataudi nuwanuwadi yai ya fuyo mulidi yai na yada piꞌana nuwanuwadi yai hinaga ya fuyo mulidi yai be ya todi, 20 Idipi yo Isalaela atiꞌatipudi yai, yadana Idipi ya fakamumudi, na Isalaela mala ya feledi be hiyala tataudi maihonana hige gonowadi ti sigilau Isalaela lisidi.
21 Mose nimana ya lolon lawen gabogabo hewana na Yaubada kaluwabu adiꞌadidilina ya fatowa be gabogabo ya tamo daili. Maihona ya towa ee–, tanohi ya pitali. 22 Yo fede, Isalaela sa sola gabogabo yai be tanohi pitapitalina sa lau watan. Hoꞌowa ya peiꞌi, tefa luwaluwaga yai doha bilibili.
23 Idipi sa lau weꞌa watanidi be sa tafo gayogayo gabogabo yai ma hosihosidi, edi saliyoti, yo tau awaidi.
24 Begana haba ya ifi tatatali, Yaubada oyagi balebalelemna piꞌana yai yo yada yai ya itaꞌita lidima be ya fanuwa ponoponodi.
25 Saliyoti ya falau sopudi be adi paisowa ya laꞌi.
Idipi tiyen,
Guyau Isalaela edi ya lau! Ta lau afuledi!
26 Yaubada ya libalau Mose lebena iyen,
Nimam u lolon lawen gabogabo ai hewana be haba ya didi fuyoma be Idipi ma salisaliyotidi yo hosi tau awaidi ai hewadi.
27 Yo fede, Mose nimana ya lolon lawen gabogabo hewana yai. Ya lahai mate, gabogabo ya didi fuyoma. Idipi bena sa gela, in moho, Guyau ya pei lidiyedi gabogabo yai. 28 Gabogabo ya didi fuyoma be Falo ena tau hiyala mahudoꞌidi sa lau weʼa wata be edi saliyoti, hosi yo tau awaidi mahudoꞌidi sa kapulolo, hige sai laʼi i mwahuli.
29 Isalaela ibodi moho sa sola gabogabo ganahewana yai, na gabogabo mate, tefa luwaluwaga yai ya peiꞌi. 30 Lahaina yai mate, Yaubada Isalaela ya saguhidi Idipi nimadi yai. Idipi sa faipeꞌipeꞌinidi, gelegele yai sa itadi.
31 Na fuyana Isalaela, gigibwali laꞌilaꞌi sa ita, Guyau ya famahata Idipi lisidi yai, mate dodoga Guyau sa ꞌwasabuwen, be edi sunuma sa tole lisina yai, yo ena tau paisowa, Mose lisina yai.