15
Mose ana Wana
Auꞌaulaha 15:1-18
1 Habahim Mose yo Isalaela dodogadi wana te sa wanai Guyau lisina yai:
Haba E wana lau Guyau lisina
paꞌana in ya hasai wananaha.
In mate hosi yo tau awaidi
ya fakapulolodi gabogabo yai.
2 Guyau tau sagusaguhigu adiꞌadidilina;
yo in agu lili, in tau fofofahigu.
In egu Yaubada haba E fadebasae.
Tamagu ena Yaubada, haba E tole hitin.
3 Guyau mate, tau hiyala;
Hesana mate Guyau.
4 Falo ena saliyoti yo ena tau hiyala
ya peidi gabogabo yai.
Ena tau paisowa loholohodi mate,
Gabogabo Balebalelemna yai sa kapulolo.* Hebelu alinadi yai tiyen, Yam Sufu na aniyona mate “Hawahawa Gabogabona.” au italau lausoisoi 22 yai hinaga.
5 Gabogabo ya fakoudi;
sa bulu lidi badamna yai doha umeꞌehu.
6 Guyau, Agutoꞌi! Nima sibam ena adidili ya faꞌabi noꞌonoꞌo
be waiyunu ya lei hafihafitidi
yo ya fili pwaipwaidi.
7 Em adidili yai,
saluma sa fawaiyunum wa pei lidiyedi.
Em manabala doha oyagi alaꞌalana
be wa gabudi
doha hawahawa tuyatuyadi peꞌipeꞌidi
oyagi ya gabu faꞌala fofodi.
8 Wa yahafuwa hisum galidi yai
Hwayahwayau gabogabo ya peiꞌi, doha bilibili,
na badamna ya pitali.
9 Waiyunu ya nuwa saesae iyen,
“Haba E weꞌa watanidi be E fafuyodima;
edi gogo haba E soiyedi,
na somo E fanuha haba E abi aiꞌegu;
haba egu baineti E abi na E wunuidi.”
10 Wa yahafuwa lau, yo fede, Idipi sa kapulolo;
sa bulu gabogabo yai,
doha somo mwahumwahuna ya bulu.
11 Aee–, Guyau, yaubada ouꞌouli ganahewadi yai,
hige sai hesa doha um.
Um, tabuna wananahana,
yo em namanamali ya loholoho,
yo noꞌo abiꞌabidi wa lau ginauli!
12 Nima sibam wa lolon be tanohi ama waiyunu, ya domdi.
13 Em dodoga wa une fahidi,
haba wa foyahidi em gadosisi otaꞌota fahina yai.
Em adidili yai haba wa ita watanidi,
be sa lau em aba miya fafatabuna yai.
14 Dodoga sa atahi, be ꞌwasabu ya famohafudi;
Filisitiya dodogadi nuwadi sa dagugu.
15 Idom babadadi, aluwadi sa potifahi,
Mowabi edi tatau menamenadi, sa tabutabubu;
na Kanana dodogadi nuwadi sa welo.
16 ꞌWasabu, mahudoꞌidi ya famohafudi.
Aee–, Guyau nimam gigibwalina yai ibege ti mwahiu,
doha umeꞌehu hige gonowana ti mwahimwahiu ee–,
em dodoga wa une fafuyodi, sa bayawa.
17 Um haba wa ledima em tuꞌa yai wa famiyadi,
nuꞌuna, um Yaubada, haꞌa wa abi nonohai be em aba miya.
Lumana tabuna Iyabom wa faꞌobiyo.
18 Guyau haba wa kin ee–, hige ana siga.
Miliyam ana Wana
Auꞌaulaha 15:19-21
19 Fuyana Falo, ena hosi, saliyoti yo tau awaidi sa gayo gabogabo yai, Guyau ya fahin dagi fuyoi be Idipi sa kapulolo, na Isalaela tanohi pitapitalina yai sa dohe. 20 Habahim Peloweta Miliyam, Elon lofuna tambalin ya abi, na wawahin mahudoꞌidi ma tambatambalin sa lau watan yo sa leꞌileꞌi.† Elon yo Mose hinaga mate Miliyam lofudi luwaga.
21 Miliyam edi ya wana,
Au wana lau Guyau lisina,
paꞌana ada waiyunu haꞌa ya lei hafihafitidi;
hosi yo tau awaidi ya fakapulolodi.
Hoꞌowa Kalakalapina
Auꞌaulaha 15:22-25
22 Habahim Mose Isalaela dodogadi Gabogabo Balebalelemna yai ya foyahidi, be sa lau nuꞌu pitapitalina hesana Sula. Lahai faihona nuꞌu pitapitalina yai sa lau, na hige hoꞌowa laꞌi ti lobahi.
23 Sa mahano nuꞌu hesa hesana Mala yai. In moho, hoꞌowana mate ya kalapi, be hige gonowana ti nom. Logena, hesana sa tole: Mala.‡ Mala alinadi yai, aniyona mate: kalapi.
24 Dodoga sa fatalapili Mose lisina yai, tiyen,
Somo haba ꞌe nom?
25 Mose ya lauꞌuꞌula lau Guyau lebena, be Guyau oyagi piꞌana Mose ya faꞌita, na ya pei lawen hoꞌowa yai; yo fede, hoꞌowa wa, amnana ya loholoho. Amainiya, Guyau laugagayo ya feledi, be bena sa lau watanidi, yo amainiya hinaga ya lau itadi.