3
Heyaheyaya ena Aba Fatubu
Aba Fatubu 3:1-13
1 Guyau Yaubada suisui yekoyekodi ya ginaulidi, na ganahewana yai mate weso lau bwalabwala yai ya sonoga wananaha, habahim suisui hahaisa.
Weso ya libalau waihin lisina iyen,
Oyagi gabu yai ni wananaha Yaubada ya falibamiu, “Tabu uludi au anidi?”
2 Waihin ya libalau weso lisina iyen,
Gonowana gabu yai oyagi uludi ꞌe anidi. 3 In moho, Yaubada iyen,
Oyagi gabu atipuna yai, tabu au an yo tabu au eliꞌina, doꞌata haba ami peꞌi.
4 Weso ya libalau waihin lebena iyen,
Ya bwala! Ibege au peꞌi. 5 Yaubada ya sibai mate yena oyagi ni uluna ami an, matamiu haba sa lahalahai, yo umi haba doha Yaubada, be heyaya yo loholoho ami sibaidi.
6 Oyagi uluna waihin ya ita mate ya fagado lelelehi, be iyen,
Yena E an, haba E sonoga.
Yo fede uluna ya losi be tefana ya an, na lahuna ana, tefana ya felen be ya an hinaga. 7 Oyagi uluna tefana sa an, mate nuwadi sa tasoꞌe be sa nuwatuhu lobahi iti ma tau afaꞌafadi, yo fede oyagi doha kuhou mate lugudi sa hinoꞌidi, be sa liꞌodi.* Edi nuʼu yai, kuhou lugudi begana sa laʼi, doha unuli lugudi.
8 Hwaya ya biga, na gabu yai Guyau Yaubada ya laolaoma, ahena daguguna taumoho ni ma lahuna sa atahi, yo fede oyagi fatau bulubuluhidi yai sa alasimo.
9 Na Guyau Yaubada ya yogalau taumoho lebena, iyen,
Um somo yai?
10 Alinana ya fafuyo iyen,
Gabu yai ahem daguguna E atahi, na E ꞌwasabu, paꞌana yau ma tau afaꞌafagu yo fede E alasimo.
11 Yaubada ya fatiꞌo, iyen,
Sai ya falibam ma tau afaꞌafam? Oyagi uluna E laugagayoꞌen, haꞌa wa an?
12 Taumoho iyen,
Waihin wa tole maꞌegu, in, oyagina uluna ya felegu be E an.
13 Yo fede Guyau Yaubada ya libalau waihin lisina iyen,
Somo wa ginauli?
Waihin iyen,
Weso ya bwalaigu be oyagi uluna E an.
Heyaya yo Ankamkamna
Aba Fatubu 3:14-21
14 Habahim, Guyau Yaubada ya libalau weso lisina iyen,
Paꞌana laulau ni wa ginauli,
kaumanana ya laowa hewam yai.
Suisui manamanasadi yo yekoyekodi ganahewadi yai
um haba heyaya laꞌilaꞌi wa fahoina.
Haba ai bogam wa felifeli.
Am kalahe, haba ma afusana wa an esegahi, fuya ouꞌouli.
15 Um yo waihin yo ami hiti mulita haba ami fawaiyunu.
In haba kulum ya bwaꞌi golugolu,
Na um haba ahe geduna wa nali.† Ite mate Yaubada ena liba fasunuma bwaꞌibwaꞌina. (Au itaꞌita lau: Isaiya 53:10 yo Loma 16:20)
16 Guyau ya libalau waihin lisina iyen,
Em fanatu yai haba kamkamna laꞌilaꞌi wa fahoina.
Kamkamna yai, haba nanatum wa yosidi.
Em gadosisi haba ya ota esegahi lahum lisina yai
be in haba am tanuwaga.
17-18 Hinaga ya libalau Adam lisina iyen,
Oyagi uluna E falaugagayoꞌen mate tabu u an!
In moho, lahum alinana wa lau watan be uluna wa an.
Debam yai tanohi E kaumananaen.
Gabu yai haba hawa nulinulidi sa tala inꞌin,
na haba wa ankamkamna,
be kalahe wa lobahi,
yo somo iyabodi sa in hinaga, am kalahe.
19 Haba wa an muyahasa
yo wa paisowa adidili
be kalahe wa lobahi, ya lau ee–,
ai muli haba wa peꞌi, wa fuyo tanohi.
Paꞌana tanohi yai E falasam.
Um afusa, be yena wa peꞌi haba wa famala afusa.
20 Adam lahuna hesana ya tole, Iwa paꞌana in tau mwahumwahuli tinadi.‡ Hebelu alinadi yai Iwa ataꞌatahina doha mwahuli.
21 Habahim edi kaleko suisui ꞌwapidi yai Guyau Yaubada ya ginaulidi, be ya faliꞌodi.
Adam yo Iwa, Guyau ya Weꞌaidi Iden Gabuna yai
Aba Fatubu 3:22-24
22 Habahim, Guyau Yaubada iyen,
Dodoga te sa famala doha Ita, paꞌana loholoho yo heyaya haꞌa sa sibaidi. Tabu nimadi ti lolon be mwahuli oyagina uluna ti abi be ti an. Doꞌata, haba sa miya ee–, hige anadan. (Aba Fatubu 2:9)
23 Yo fede Guyau Yaubada ya weꞌaidi Iden Gabuna yai. Tanohi lisina yai ya falasadi, mate lisina yai, hinaga adi sa uma. 24 Yaubada, gabu yai ya lau weꞌaidi, mulina yai gabu tefa saisaina yai, anelu ya toledi, hesadi Selubim. Baineti ya ala balabalelem hinaga ya tole ya taꞌitaꞌiꞌili asiꞌasi tefa ouꞌouli yai, be mwahuli oyagina edaꞌedana ya gudu.
*3:7 Edi nuʼu yai, kuhou lugudi begana sa laʼi, doha unuli lugudi.
†3:15 Ite mate Yaubada ena liba fasunuma bwaꞌibwaꞌina. (Au itaꞌita lau: Isaiya 53:10 yo Loma 16:20)
‡3:20 Hebelu alinadi yai Iwa ataꞌatahina doha mwahuli.