21
Isako ya Tubu
Aba Fatubu 21:1-7
1 Guyau ya loholoho Sala lisina yai, be somo Yaubada ya liba fasunuma wa, ya fawananaha. 2 Abelaham natuna taumoho, Sala ya yosi. Yaubada ena liba fasunuma ya fawananaha ena fuya tautaulaꞌi yai. 3 Sala natuna ya yosi, be Abelaham hesana ya tole: Isako.
4 Isako ena fuya tubu na ya lau ee–, lahai faligigi faihonana, Yaubada alinana Abelaham ya falau watan, be Isako mwagisana duduna ꞌwapina ya tomofahi. 5 Fuyana Abelaham ena bolima 100, Sala natudi Isako, ya yosi.
6 Sala iyen,
Yaubada agu liuhwa ya leyama, yo salumadi wasagu sa atahiyen, haba ma afa haidagu ꞌe liuhwa gogo.
7 Be Sala ya liba, iyen,
Hige gonowana sai hesa Abelaham i faliba mate Sala haba wawaya ya ita watandi! In moho, ena fuya tautaulaꞌi yai natuna E yosi.
Hagala yo Isamaiyeli sa Duidi
Aba Fatubu 21:8-21
8 Gwama ya laꞌi ofi be nom sa fadabu, lahaina yai, Abelaham anꞌangogo laꞌilaꞌi ya ginauli. 9 Fuya ma esega, Hagala Natuna Isamaiyeli ya fafamanabala Isako lisina yai, na Sala ya ita. 10 Yo fede, ya libalau Abelaham lisina, iyen,
Fayofayo tau abina waihinna ma natuna u duidi ti lau hudoꞌi paꞌana fayofayo tau abina natuna hige gonowana em ginauli tefana i abi.
11 Abelaham nuwana ya heyaya wananaha, natuna Isamaiyeli lisina yai. 12 In moho, Yaubada, Abelaham ya faliba, iyen,
Tabu nuwam u famode. Somo lahum Sala ya falibam, u lau watan, paꞌana Isako ai lisina haba hesam ya laꞌi yo haba wa tadada. 13 Na hinaga em tau paisowa Hagala natuna Isamaiyeli ai lisina haba am hiti mulita ya tadada nuꞌu tefa mahudoꞌina yai, paꞌana Isamaiyeli hinaga um natum.
14 Bobonna ma hwalahwalalana Abelaham ya eno obiyo be anꞌan yo hoꞌowa leduna ya abi nonohaidi be Hagala ya fabahei, na habahim ma natuna ya duidi, be nuꞌu sa lau afulen. Hagala ma natuna sa lau Belesiba, nuꞌuna pitapitalina yai sa laulau gaibu.