35
Yaubada, Iyakobo ena Loholoho ya Felen
Aba Fatubu 35:9-15
9 Iyakobo ya fuyoma Padan Alam,*Padan Alam Hesana hesa mate Mesopotamia. na Yaubada ya taumahata fuyo lisina yai be ena faloholoho ya felen.† Padam Alam gonuna mate Mesopotamia tefa lidilidina yai. Halan nuꞌuna mate nuʼu te ganahewana yai.
10 Yaubada ya libalau Iyakobo lisina iyen,
Hesam “Iyakobo,” in moho hesam ibege ti atahi fuyoi “Iyakobo.” Hesam haba “Isalaela.”‡ Iyakobo aniyona mate ahe geduna ya abi. Na Isalaela aniyona mate Yaubada maꞌena sa faiꞌabi.
Logena Yaubada, Iyakobo hesana ya tole Isalaela.
11 Na Yaubada ya libalau lisina iyen,
Yau Hewa Wananaha Yaubadana. U talu fanafanatu! Nuʼu boludi u fatubudi yo kin haba lisim yai sa tubu. 12 Tanohi Abelaham yo Isako E feledi haba E felem hinaga, yo tanohina te haba E fele faꞌawa wahawaham lisidi yai.
13 Habahim edi aba libaliba nuꞌuna yai, Yaubada ya lau afulen.
14 Iyakobo fafaꞌilala umeꞌehuna ya bono edi aba libaliba nuꞌuna yai. Ena antalasam wain yo oliwe ya fagoidi ya hin hewana yai, be ya famala Yaubada ena Nuʼu Fafatabuna. 15 Edi aba libaliba nuꞌuna mate Iyakobo hesana ya tole Beteli.§ Bethel Hebelu alinadi yai aniyona mate Godꞌs House.
Leisulu ya Peꞌi
35:16-21
16-17 Habahim Beteli yai sa aulaha. Efalati hola ma lofana na Leisulu taulina ya faꞌoitagu. Ena labalaba ya pilipili be ena kamkamna ganahewana yai tau abi falabalaba ya libalau lisina iyen,
Tabu u ꞌwasabu paꞌana natum taumoho hesa.
18 Hanahanau haba ya peꞌi, na natuna hesana ya tole Ben-Oni. In moho tamana, Iyakobo hesana ya tole Beniyamin.* Hebelu alinadi yai, Ben-Oni aniyona mate natugu egu pilipili. Na Beniyamin aniyona mate natugu taumoho in tau saguhigu.
19 Leisulu ya peꞌi be Efalati edaꞌedana sadaina yai sa boꞌusai, (logena Betelehem). 20 Boꞌusana yai Iyakobo umeꞌehu ya bono. Umeʼehuna aho te mate Leisulu boꞌusana fafaʼilalana.
21 Iyakobo ya aulaha boda, ya lau Migidali Edeli† Migidali Edeli mate luma lofalofana, aba itaꞌita lau. Ai luma ni haba sa itaꞌita lau suisui sa itadi ya famuli, be ena palai ya faʼobiyo bodai.
Iyakobo Nanatuna
Aba Fatubu 35:22-29
(1 Koleniko 2:1-2)
22 Iyakobo nuꞌuna yai hola ya gogogo na lahuna Bilaha yo natuna, Leubena sa luma gwaꞌu na wasadi ya atahi. (Aba Fatubu 49:22)
Iyakobo nanatuna tatau mate safuhudohudoꞌi luwaga.‡ na hinaga natuna waihin esega hesana Daiyana.
23 Liya nanatuna mate:
tau tuwaha, Leubena,
Simiyon,
Lewi,
Diuda,
Isaka yo
Sebulun.
24 Na Leisulu nanatuna mate Diyosepa yo Beniyamin.
25 Leisulu ena paula tau abina, Bilaha nanatuna mate Dan yo Nafatali.
26 Liya ena paula tau abina Silipa nanatuna mate Gada yo Asela. Iyakobo nanatuna te Padan Alam yai sa yosidi.§ Nuʼuna hesana kiukiu mate Padam Alam, na hesana laꞌilaꞌi mate Mesopotamia
27 Iyakobo ya lau tamana, Isako lisina, Mamale nuꞌuna yai, Kiliyati-Aba sadaina yai. Aho te hesana Hebelon, Abelaham yo Isako edi aba gogo beyabeyana. 28 Isako ya miya ee–, ena boliman 180. 29 Ya tautaulaꞌi wananaha, habahim ya peꞌi be nanatuna Isowa yo Iyakobo sa boꞌusai.
*35:9 Padan Alam Hesana hesa mate Mesopotamia.
†35:9 Padam Alam gonuna mate Mesopotamia tefa lidilidina yai. Halan nuꞌuna mate nuʼu te ganahewana yai.
‡35:10 Iyakobo aniyona mate ahe geduna ya abi. Na Isalaela aniyona mate Yaubada maꞌena sa faiꞌabi.
§35:15 Bethel Hebelu alinadi yai aniyona mate Godꞌs House.
*35:18 Hebelu alinadi yai, Ben-Oni aniyona mate natugu egu pilipili. Na Beniyamin aniyona mate natugu taumoho in tau saguhigu.
†35:21 Migidali Edeli mate luma lofalofana, aba itaꞌita lau. Ai luma ni haba sa itaꞌita lau suisui sa itadi
‡35:22 na hinaga natuna waihin esega hesana Daiyana.
§35:26 Nuʼuna hesana kiukiu mate Padam Alam, na hesana laꞌilaꞌi mate Mesopotamia